تجار السيارات المستعمله على نايل موتورز

**mada121977** · 14-06-2008 06:06 PM

انا اسف اذا كان الكلام الللى هاقوله هايدايق حد بس من فتره لاحظت ان منتدى البيع والشراء اصبح مليان بالاعلانات من اعضاء مانعرفش حاجه عنهم غير انهم بيحطوا اعلاناتهم ويمشوا يعنى التاجر من دول يحط بيانات عربيته اللى عاوز يبيعها وطبعا يحط سعر عالى ومبالغ فيه ويدخل يشوف الردود على الموضوع وخلاص اما بقى انه يشارك فى اى قسم تانى او يفيد الناس ولو حتى بكلمه فده صعب عليه لانه مشغول ببيع عربياته .... هوا الاداره لما عملت منتدى البيع والشراء ده اكيد كان الهدف منه مساعده الاعضاء على بيع وشراء ما يحتاجونه من مستلزمات او عربيات او اكسسوارات او حتى قطع غيار بس للاسف فيه ناس بتستخدم الخدمه دى لصالحها الشخصى فقط وليس للصالح العام يعنى لما ييجى تاجر يعرض عربيته ويطلب فيها سعر عالى وبعدين يجى نفس التاجر يشوف اعلان واحد من المنتدى عارض فيه عربيته يقوم يديله سعر منخفض علشان يطلع بمصلحه من وراه فأعتقد ان ده مش مقبول خالص وخاصه ان التجار دول مابيشاركوش فى اى منتدى فرعى باى مشاركات غير مشاركاتهم فى منتدى البيع والشراء ...

فالى الساده تجار السيارات المستعمله رفقا بنا

**SEATLOVER** · 14-06-2008 06:34 PM

فعلاً يا mada معاك حق
انا فعلاً كنت هاكتب فى الموضوع دة ... بس المشكلة انى اعتقد انة كاتفكير ادارى .. هايقولك مفيش فى ايدك حاجة معينة تعملها هو عضو ذى باقى الاعضاء و مشاركاتة هو حر فيها بمجرد تسجيلة
يعنى العملية كلها ترجع للمتفاعلين معاة فى موضوع بيعة لسياراتة

بس عايز اقول حاجة للناس دى

انتوا هنا فى وسط ناس قضت عمرها فى وسط بيع و شرا وعكة سوق و حوارات تجار
وطلعات تخليص وافلامنات فى تثبيت ... وحاجات كتير مش عايز اقولها عشان الناس ماتتخضش من اللى بيحصل

يعنى انتوا مش جايين فى نزهة بين شوية شباب بيحبوا عربيات ...

وبنضرب من تحت ذى ماحنا عايزين وبنوقف سوق اى عربية (مشمومة ) بتدخل القسم

وياريت بقى اللى بيفهم فيكوا يرحمنا بقى من رفع الخمس تاشر سنة وفابركة الفابريقة
واستعمال الجاتوة واستعمال واحد فاقد الذاكرة واللى على وشك السفر والعربيات اللى كانت بتاكل ايس كريم قبل ما تيجى تتباع دى

وهى اصلاً عربيات مهجنة اتعاملت معاملة الحيوانات الاليفة فى حديقة الداينصورات
عربيات اترشت خمسين مرة بعلب الوان مية و مواتيرها اتلفت تحت بير السلم ومفهاش فانوس ماتعملوش تبيض اسنان

ارحمونا بقى و اللى عايز ياكل عيش ...ياكل عيش بما يرضى الله

لأما مش هانسيبة فى حالة و هانطلع القطط و الفيران اللى جاى بيها فى حوض الموتور بتاعة علية

**mada121977** · 14-06-2008 06:58 PM

اخى الفاضل الباشمهندش عمرو جزيل الشكر على مشاركتك ... لفتره من الزمن تعاملت مع تجار السيارات المستعمله دول وللاسف لقيت ان 99,9 % من كلامهم كله غش وخداع ونصب علشان يجيبوا رجل الزبون ويلبسوه العربيه ولما ييجى ياخد منك عربيه تلاقيه بيفطس سعرها وياخدها سحت علشان يكسب بالخمسه والعشر الاف مره واحده .... مره كنت مع واحد صاحبى عند معرض سيارات مستعمله عندنا فى المنصوره وكان عنده عربيه 504 وجه واحد علشان يتفرج والنصاب يقول للراجل دا العربيه فابريقه و مالمسهاش صانيعى (يحسسك ان الخواجه بيجو بعتله العربيه دى اسبيشيال اوردر ليه مثلا وان شريك فى مصنع بيجو مثلا ) وبعد ما الراجل مشى صاحبى قالى على فكره العربيه دى مغيره النص الامامى

**Ahmed Samy** · 14-06-2008 08:25 PM

المشاركة الأصلية كتبت بواسطة mada121977

اخى الفاضل الباشمهندش عمرو جزيل الشكر على مشاركتك ... لفتره من الزمن تعاملت مع تجار السيارات المستعمله دول وللاسف لقيت ان 99,9 % من كلامهم كله غش وخداع ونصب علشان يجيبوا رجل الزبون ويلبسوه العربيه ولما ييجى ياخد منك عربيه تلاقيه بيفطس سعرها وياخدها سحت علشان يكسب بالخمسه والعشر الاف مره واحده .... مره كنت مع واحد صاحبى عند معرض سيارات مستعمله عندنا فى المنصوره وكان عنده عربيه 504 وجه واحد علشان يتفرج والنصاب يقول للراجل دا العربيه فابريقه و مالمسهاش صانيعى (يحسسك ان الخواجه بيجو بعتله العربيه دى اسبيشيال اوردر ليه مثلا وان شريك فى مصنع بيجو مثلا ) وبعد ما الراجل مشى صاحبى قالى على فكره العربيه دى مغيره النص الامامى

لا وانت الصادق يا احمد
دا تلاقيى النص اللي قدام هو اللي فاضل من العربية الأصلية ........

ها ها ها ها ها ها

واحشني و الله العظيم

**mahamedaraby** · 14-06-2008 08:35 PM

طيب ليه ما تحسبهاش ان واحد عايز يشترى عربيه وبيشارك يبقى هو كده استفاد ولا ايه

وكمان فيه حاجه مهمه اوى السريش على جوجل يعنى لما حد يبحث عن عربيه مستعمله ويعرف المنتدى عن طريقه مش تبقى حاجه كويسه ولا انتوا ايه رايكم ؟

**Ahmed Samy** · 14-06-2008 08:45 PM

المشاركة الأصلية كتبت بواسطة mahamedaraby

طيب ليه ما تحسبهاش ان واحد عايز يشترى عربيه وبيشارك يبقى هو كده استفاد ولا ايه

وكمان فيه حاجه مهمه اوى السريش على جوجل يعنى لما حد يبحث عن عربيه مستعمله ويعرف المنتدى عن طريقه مش تبقى حاجه كويسه ولا انتوا ايه رايكم ؟

كلام سليم يافندم
بس احنا كنا بنعلق على صيغة الاعلانات و بعدها عن الحقيقة

**SEATLOVER** · 14-06-2008 08:58 PM

المشاركة الأصلية كتبت بواسطة mahamedaraby

طيب ليه ما تحسبهاش ان واحد عايز يشترى عربيه وبيشارك يبقى هو كده استفاد ولا ايه

وكمان فيه حاجه مهمه اوى السريش على جوجل يعنى لما حد يبحث عن عربيه مستعمله ويعرف المنتدى عن طريقه مش تبقى حاجه كويسه ولا انتوا ايه رايكم ؟

وبرضو لما يوقع فى عربية مشمومة عن طريق المنتدى
هيكرة اليوم اللى عرف فية اللينك دة
مش كدة والا اية يا محمد عرابى

**mohamed2002** · 14-06-2008 09:04 PM

اعتقد انة حيكون صعب انك تحدد موضوع الاعلانات دة ولكن
الادارة ممكن تحط تنبية عن عدم مسئوليتها عن الاعلانات دي
وممكن تكون تابعة لتجار او افراد
بس برضة انت لما بتروح تشتري عربية بيبان من طريقة البائع
اذا كان ركيب ولا تاجر

**aif** · 14-06-2008 09:26 PM

المشاركة الأصلية كتبت بواسطة SEATLOVER

وبرضو لما يوقع فى عربية مشمومة عن طريق المنتدى
هيكرة اليوم اللى عرف فية اللينك دة
مش كدة والا اية يا محمد عرابى

لكن المواقع والمنتديات عمرها ما بتضمن جودة السيارة ... كل واحد بيكشف علي السيارة بمعرفته ... ومش عيب في حق المنتدي ان العربية طلعت وحشة... المنتدي لا باع ولا اشتري ولا كسب اي شيء من البيع ...:)

-

الموضوع: تجار السيارات المستعمله على نايل موتورز

LinkBack

أدوات الموضوع

عرض

-

-

-

-

المواضيع المتشابهه

مركز نايل موتورز لدهانات وتجديد السيارات

مركز نايل موتورز لدهانات وتجديد السيارات

مركز نايل موتورز لدهانات وتجديد السيارات

مركز نايل موتورز لدهانات وتجديد السيارات

طريقة جديدة لبيع السيارات المستعمله (معارض تقسيط السيارات المستعمله)

الكلمات الدلالية لهذا الموضوع

المفضلات

المفضلات

ضوابط المشاركة