الموضوع: تقرير كامل عن تنظيف الكاربراتير عند مركز متخصص!!

المشاركة الأصلية كتبت بواسطة alking_2006

السلام عليكم

دلوقتى كان عندى مشكلة فى الماروتى
لما ببقى طالع على اى نقلة بحرك الفتيس بسهولة عادى لكن العربية ذات نفسها مش بتاخد النقلة على طول يعنى بقعد عمال ازود بنزين و فجأة العربية تاخد النقلة بعد ما اكون زودت بنزين جامد فتقوم ناطة و ناتشة من مكانها و شبة طالعه امريكانى و النطة دى بتبقى جامدة اوى فى الغيار الاول و المارشدير و بتقل مع التانى و اقل مع التالت و اقل مع الرابع

مع العلم انى مغير طقم الكهربا و الفلاتر كلها و السيور و منظف الكاربراتير

فأنا كنت شاكك فى الدبرياج الديسك و الاسطوانة و البلية مع العلم ان العربية بتشد معايا كويس لحد 100 و موديلها 99 و مشميتش ريحة شياط

رحت للميكانيكى الخميس اللى فات المهم ركب العربية و جربها قالى دا كاربراتير مش دبرياج خالص
و وصفلى واحد بتاع كاربراتير فى امبابة

المهم رحتله كانت الساعة 2 قالى لأ انا مش بقبل عربيات بعد الساعة 1

المهم اتصلت بمركز الصفا اللى فى جسر السويس قالى انا بقبل عربيات لحد الساعة 4 و نص
طلعت على مركز الصفا و قالولى هنكشف على العربية و نقولك مصاريف التصليح و لو مش عايز تصلح هتدفع 25 ثمن الكشف قلتلهم ماشى

اخدت دور و الراجل جه كشف على العربية قالى الكاربراتير عايز يتحل و نشوف فيه ايه قلتله ماشى قالى المصنعية 100 جنيه غير ثمن اى حاجة عايزة تتغير كمان قلتله ماااااااااشى
فك الكاربراتير و بعد حوالى ساعتين ركبه تانى قالى الكاربراتير كان عايز يتنظف و احنا ركبنالك حاجة اسمها "بلية تعجيل" كانت مش موجودة عندك + جوان قاعدة كاربراتير
المهم دفعت فى الاخر 121 جنيه كالأتى

100 مصنعية تصليح كاربراتير
5 بلية تعجيل
5 جوان قاعدة كاربراتير
11 ثمن ضريبة مبيعات 10%
و قالى لازم تغير سلك البوجيهات علشان بيقطع قلتله ماشى و لو فيه اى حاجة تعالى تانى فى خلال اسبوعين

و طلعت بالعربية و حسيت بفرق جامد ما شاء الله و التقطيعه راحت تماما لكن انا اعيب على المركز فى كذا حاجة

1- غالى طحن يعنى انا لولا انى مزنوق فى الوقت كنت رحت عند اى محل تانى و مكنش هياخد اكتر من 50 جنيه و مش هياخد ضريبة مبيعات !!!!
2- طريقه مكسر جامد يعنى هتصلح الكاربراتير و تبوظ العفشة
3- بعد ما روحت بفتح الكابوت لقيت العمه بتلعب فى مكانها المهم فكيتها لقيت الصنايعى النص لبه بتاعهم ضيعلى الجوان الكاوتش الاسود اللى بيبقى ما بين العمه و الكاربراتير و طبعا فصلت انا واحد جديد من شنبر كاوتش قديم
4- كل ما ادوس بنزين جامد البدال بتاع البنزين ما بيرضاش يرجع تانى قمت جايب wd40 و رشيت على الكاربراتير من برا الموضوع اتظبط
5- كان فيه جزء من اجزاء الكاربراتير بيقع من مكانه كل ما ادوس بنزين قمت جايب سلكه نحاس و ثبته

فالنتيجة انى طبعا مش هروحله تانى ابداااااااااا
و الحمد لله على كل حال

بسم الله الرحمن الرحيم
إلى صاحب الرسالة وإسمه / أحمد شرف
وصاحب السيارة ماروتي رقم / ف ج ي 128
وعملائنا الكرام و من يهمه الأمر
نوضح للسادة العملاء أن صاحب السيارة لديه مشكلة خاصة به وحده وموضح في الشكوى أنه قد تم أخذ الخدمة على أكمل وجه وقد تمت معالجة عيوب السيارة ولكن مشكلة الاسعار والطريق وخطأ المساعد في عدم تركيب جوان العمة فإنه من حق كل عميل مراجعتنا في حال أخطأ أحد الفنيين أو المساعدين ، ويتم معالجة أى خطأ وارد من المركز ، مع العلم أنه لايوجد مركز ليس به بعض الأخطاء ، ولا يمكن أن يتفق جميع الناس على تقييم شيء معين برأى واحد ، فمنهم من يتفق معه ومنهم دون ذلك .
أما الأمور الفنية برجاء من السادة العملاء عدم الإقرار بالإخطاء الفنية قبل الإطلاع على فنيات السيارة مثل الكهرباء وتحليل ومعالجة العوادم والكشف بالإجهزة على شبكة المعلومات - قال تعالى {فَاسْأَلُوا أَهْلَ الذِّكْرِ إِنْ كُنْتُمْ لَا تَعْلَمُونَ} [النحل: 43]
ويتضح أيضاً أن كل الشكاوى التى أرفقها برسالته تدور في مجال الأسعار مع أنه لم يتم العمل في أى سيارة إلا بعد الإتفاق على السعر ومن حق العميل الرفض أو القبول
ونحن نوضح لكم أسعار المركز لعام 2012 وإمكانيات المركز



و أخيراً لا نقول حسبنا الله ونعم الوكيل لصاحب الرسالة
بل نقول إنا لله وإنا إليه راجعون
ونلتقي يوم الحق ويأخذ كل ذي حق حقه
والسلام عليكم ورحمة الله وبركاته