الموضوع: شوية حاجات عملتها في الماروتي ولسه مش عجباني

الف مبروك العربية يا باشا و تسلم ايديك ع الاسعار يا ريت تشاركنا بيها في موضوع اسعار قطع الغيار المثبت بالقسم

بخصوص السمكرة و الرش كنت تشتري استيراد او جديد حتي مش هيكلفك مبلغ كبيير تشيل و تركب و كأنه فبريكة

بخصوص البلي طبعا NSK غني عن التعريف تركب و انت مطمن لأنها شركة يابانية متخصصة في بلي السيارات اساسا

سير الكاتينة نوعه ايه ؟؟

بخصوص الفرامل لو التيل سليم و كل حاجة سليمة و الهوا متفرغ اذن غير زيت الفرامل كله الراجل ينزل الزيت القديم كله و يخلي الزيت الجديد ينزل من كل فردة عشان ينضف الدورة و طبعا عشان ميحصلش خلط لكذا نوع زيت و بالتالي الماستر ممكن يضرب و الانواع الكويسة بيندكس و لوكهايد

بخصوص صوت الموتور و تحس كان الار بي ام بيعلي فجأة و العربية سحبها ضعف اذن اضم صوتي لصوت اخونا حازم انه احتمال كبيير يكون طقم الدبرياج بس الأفضل تبص ع الكهربا الأول

و كنت لسه كاتب ع صيانات تتعمل بشكل وقائي او دوري في موضوع اخر فهقتبسها هنا مباشرة

المشاركة الأصلية كتبت بواسطة Amr Axel

حالة العربية لا تغني عن الصيانات الوقائية او الدورية
و بالتالي اللي هتحتاجي تغيريه
- سير الكاتينة طبعا تجيبي نوعية نضيفة و تاريخ انتاجها جديد و البيانات بتكون مكتوبة ع السير و العلبة او الكيس المتبرشم و الانواع النضيفة طبعا الاصلي بتاع سوزوكي - كونتيننتال اوروبي - صان ياباني - جيتز انجليزي لو موجود
- و يتبص ع سير الدينامو لو محتاج يتغير
-تغيير زيت الموتور و الفلتر و الافضل زيت شل سواء معدني زي شل الاصفر لزوجة 15w50 او تخليقي شل الترا لزوجة 5w30
- تغيير زيت الفتيس و بلاش يتعبي من الطرمبة البرتقالي يعني اللي يعبيلك زيت فتيس يكون من جيركن متبرشم و افضل الزيوت شل و فالفولين لزوجة 75w90 او 80w90 و الزيت بيتم تغيره كل 25-30 الف ك
- فلتر البنزين و اوعي حد يقولك ملهاش فلتر بنزين و فلتر الهوا و دول ممكن كل 20-25 الف ك
- و لو البوجيهات و الابلاتين محتاجين يتغيروا ممكن تتغير و عامة البوجيهات كل 20 الف
- تغيير مية الريداتير و ديه بيتم تغييرها كل سنتين او 40 الف ك تقريبا
- تغيير زيت الفرامل بالكامل بمعني الميكانيكي ينزل الزيت من الدورة كلها و ينضف الدورة بالزيت الجديد و يعبي تاني و افضل الانواع بيندكس او لوكهيد و برده الزيت بيتم تغييره كل سنتين زي مية الريداتير
- تنضيف البوابة و الكربراتير
- فحص الكاوتش و حالته
- و اخيرا ظبط زوايا و تربيط العفشة

بخصوص زيت الموتور اعتقد المعدني مناسب جدااا ليك خاصة شل hx5 لزوجة 15w50 او اللي بيقولوا عليه شل الاصفر