الموضوع: الرفرف اللي قدام اتشق

العربية مبقالهاش معايا شهر، وواحد الله يجازيه بعربية الانترا رمى عليا بجنب عربيته من ورا في مطلع كوبري.

الكوبري حارتين بس، والبيه زنق نفسه بين عربيتي وعربية على شمالي، قام خبط الرفرف الشمال بتاعي، ونزل يزعق.

قلتله الكوبري حارتين، ونا ماسك حارتي من بدري وطالع مضبوط، ولما تتزنق سيادتك تقوم مفرمل مش ساحب بالعربية وتخبطني ونا ماشي في حالي. قلتله كمان أنا شايفك بتحدف، وكان ممكن ابعد عنك لو فيه مكان، لكني على مطلع كوبري ولازق في الرصيف وماشي كمان على أقل من 20 كم عشان الكوبري واقف، أعمل ايه أكتر من كده

الراجل مش عايز يعترف بغلطه، وشوية قاللي خلاص نعدي الكوبري وبعدين نقف ونعمل محضر، قلتله ماشي. عدينا الكوبري وبعدها بثواني لقيته طار بالعربية وهرب.

أنا كان ممكن أسامحه ومش عايز منه حاجة لو كان وقف واتكلم، لكن أنا من ساعتها ونا بادعي عليه. العربية لسه عليها فلوس والواحد مش حمل مصاريف زيادة مع تأخير المرتبات بالشهر والاتنين. ربنا يجازيه وحسبي الله ونعم الوكيل فيه.

دلوقتي أنا عايز اصلح الرفرف أو أغيره، ومعنديش خبرة في الموضوع ده نهائي. الرفرف فيبر والعربية كليو 2003.

تنصحوني أعمل ايه ولا أروح فين والموضوع هيتكلف قد ايه؟