تجربة طنابير vttr للجين 2 وتقرير مفصل بعد تجربة وافية
السلام عليكم ورحمة الله وبركاتة
اسود بروتون الكرام الحمد لله من فترة كدة كنت عايز اغير طنابير لعربيتى الجين2 لان الطنابير الاصلية
مش عارف لية مع ان سواقتى عادية بس يمكن من التيل المصرى ضيعها منة لله اللى كان السبب واقنعنى بيهم ومن هنا وقبل ما ابدا الكلام احب انصح واشدد على اى واحد حيركب تيل فى التوكيل
يبعد عن المصرى حتى لو حيدهولك ببلاش
تيل سىء للغاية ومبيخلصش ولكن بيخلص الطنابير
ايوة فعلا مبيتاكلش هوة العكس اللى بيحصل هوة اللى بياكل الطنبورة
المهم بعد تركيب التيل المصرى ومشيت علية تقريبا 10 الاف كيلو روحت غيرتة لانى مقدرتش استحمل صوتة اكتر من كدة
ربنا اكرمنى فعلا بصديق ليا كان فى ماليزيا بيقضى شهر العسل وصيتة يجيبلى تيل من هناك املا منى انة يلاقى البوش الالمانى هناك بسعر اقل ولكن للاسف يا معرفش يا اما مبيتباعش فى المحلات اللى هناك فعلا
المهم الراجل مشكورا جابلى تيل امامى وخلفى اسمة trestor والتيل دة انا محتاج اكتب فية تلات اربع تقارير علشان اوفى حقة ودة لينك للموقع بتاعة وكنت حطيتة من فترة بردة على امل اننا نعرف نجيبة من هناك
Trestor Malaysia
http://img406.imageshack.us/img406/9729/....llic.jpg
اولا التيل امامى وخلفى سعرة 220 رينجت يعنى تقريبا وقف عليا ب 380 جنية الطقم امامى وخلفى
تقفيلة اكتر من رائع وصديقى العزيز raul_7 كان شافة على الطبيعة قبل ما اركبة
المهم روحت ركبت التيل على الطنابير الاصلية وكان الاداء جيد بس الطنابير كان فيها ريجة اصلا وانا كنت قفلت منها بصراحة
المهم سالت على الطنابير الاصلية لقيت الواحدة ب 700 وشوية باين وفيلكس كان نوة قبل كدة ان اى طنابير فى السوق اللى الجوز ب 500 والكلام دة عمرهم ما يجوا فى جودة الاصلية اللى انا شايف اصلا ان جودتهم تعبانة بالنسبالى انا وان كان موضوع الفرامل دة احقاقا للحق نسبى من واحد للتانى يعنى رائى مش مقياس
المهم فكرت بما ان التيل بتاعى اللى انا جايبة يمشى على طنابير سبور
طب لية ما دورش على طنابير سبور باة طالما حدفع 1500 فى الطنابير الاصلية ويكونوا بنفس السعر بس اكيد حيكونوا جودة اعلى وعمر افتراضى اطول واداء احسن بكل تاكيد من الطنابير الاستوك
المهم دعبست لحد ما عرفت ان عادل وجدى بيركبهم للجين2 ونوعهم vttr تايوانى تقريبا وسعرهم 1600 بالتركيب
كلمتة وكان عندة جوز اخير فعلا لحظى روحتلة وشفت الطنابير وتوكلنا على الله وركبهم
مبدائيا علشان متدوخش كتير
الطنابير دى بتاعة لانسر بومة من 2002 الى 2009 ودة اللى عرفتة بعد كدة علشان لو عايز تشترى اى نوع طنابير تبقى عارف انت عايز بتاعة اية علشان لو قلت جين2 اى حد حيفتكرك بتتكلم عن نوع فضائى من العربيات خصوصا لو فكرت فى ebc او بريمبو او اى نوع رياضى ادينى حليتهالك اهو طنابير لانسر بومة ال 1600 طبعا لتجيب بتاعة ال 1300 وتدعى عليا :)
المهم التركيب ماخدش وقت نهائى لان الموضوع شيل وركب مفيش اى تعديل من اى نوع
بس لاحظوا الاتنى وهما بيركبوا وتقريبا دى كانت اول عربية جين2 تركب الطنابير دى لانهم مخدوش بالهم الا بعد التركيب
المهم الطنابير الجزء الملامس للتيل اللى بيبقى فضى دة فى الرياضية اصغر حاجة بسيطة من الاصلية ودة مكنش ملحوظ طبعا الا بعد ما ركب الكاليبر والتيل وجد ان التيل خارج من فوق حاجة بسيطة عن الاصلية بس راكب تمام ومفيش مشكلة هوة طالع برة شوية مقاس كام مللى
المهم عادل للامانة قالى قبل ما يركب
وخيرنى وانا وهوة حطينا كذا تصور
التصور بتاعة ان الحتة دى مش حتاثر على حاجة فى الاداء اطلاقا كل اللى حتعملة انها حتمنع ان يبقى فى شفة مع الوقت للطنبورة
تصورى انا ان مع الوقت التيل حيتاكل من تحت ومن فوق سليم وبالتلى حيعمل حرف L بس اقلب الحرف وساعتها ححتاج مع الوقت انى افك التيل واقص الجزء اللى حيبقى زيادة دة لو دايقنى
بكل الاحوال انا قررت انى اكمل واركبهم لانى كنت مقتنع بيهم ومكنش عندى مشكلة فى التجربة
والحمد لله تم التركيب ودى صورتهم قبل وبعد التركيب
[sor2]http://img821.imageshack.us/img821/2500/38064210150661461791447.jpg[/sor2]
حاليا انا عامل بيهم حوالى 2000 كيلو ونيجى باة للجد الا وهو تقييمى للطنابير الجديدة
نبدا بالعيوب لان اكيد كل حاجة ليها ميزة وعيب وعليك ان تختار
الطنابير الرياضية تقريبا كلها صوتها عالى فى الفرامل بس لازم تكون الفرامل من سرعة عالية يعنى من 100 وانت طالع او فى حالة الكبس المفاجىء
توضيح للصوت علشان محدش يفتكر انة صفارة لاء هوة صوت احتكاك او بمعنى ادق بتسمع صوت ذبذبات وكان هناك VIBRATION بدون احساس الاهتزاز يعنى انت بتسمع صوت الفيبراشن بس لكن مبيبقاش في اهتزاز ولا حاجة والصوت دة بيبقى عالى نسبيا ومسموع
لا اخفى عليكم سرا كنت فى البداية متشكك جدا من الصوت وكان قلقنى وكنت متخيل انة من التيل الغير متناسق مع الطنبورة حجما ولكن مع الوقت اتضح ان الصوت دة فعلا فى معظم الطنابير الرياضية لانها مش ملساء (مشرطة او مخرمة) وثانيا لان خامتها بتبقى اقسى واقوى من خامة العادية
بل بالعكس الصوت دة مع الوقت بقى بالنسبالى نوع من انواع الامان :) اة والله فعلا
المميزات
1-الاداء اختلق فعلا بنسبة كبيرة والاداء اللى بتكلم فية دة اداء تماسك الفرامل والعربية ككل على مختلف السرعات وان كان على السرعات العالية اقوى بكتير من على السرعة البطيءة
2-الجنط مبقاش بيسخن زى الاول لان الطنابير دى مهواة وبالتالى اداء الفرملة كويس اوى حتى بعد مشوار لان التيل بيتهوى كويس عن الاول
دة كان تقرير بسيط عن تجربة الطنابير واى استفسار انا تحت امركوا :)
تحياتى للجميع
