الموضوع: تجربة وتقييم فلتر اسبور للجين2

ازيكوا يا رجالتنا النهاردة جايبلكوا موضوع مهم اوى ويمكن كتير اوى نفسة يشوف التجربة قبل ما يخوضها المهم انا الحمد لله قلت اكتب الموضوع بردة بعد فترة تجربة وتقييم كويسة اوى علشان نقدر نحدد كل المميزات والعيوب وهل الموضوع مجدى فعلا ولا مش مستاهلة

من فترة كبيرة وانا بفكر اركب فلتر سبور للجين2 بس كنت متردد بصراحة من كتر ما قريت ودورت فى المواضيع وكان اكتر حاجة قلقانى من كتر ما قريت عن تجارب الاعضاء ان الفلتر عند كتير او معضم اللى ركبة بيضيع عزم العربية على السرعات القليلة اللى هى 90% بالنسبالى من سواقتى للعربية والسرعة مبتكونش الا فى اوقات قليلة اوى ومن هنا كان التخوف

لكن الحمد لله بعد فترة تفكير وكمان لقيت صديقى العزيز raul_7 مشجعنى وهوة كمان نفسة يخوض التجربة

توكلنا على الله واشتريت الفلتر من توكيل سيموتا حسب ما بيزعموا اللى هوة power zone واخدتة واخدت كل الوصلات الكاوتش اللى محتاجها والتثبيتات وقررت انى اركبة لوحدى لانى كنت شوفتة وهوة بيتركب على عربية محمود ولقيت الموضوع بسيط اوى ويمكن ودى مهمة اوى
يعود الفضل هنا لبروتون تحديدا لانها عاملة intake هايل زى ما حتشوفوا يدوب بتقولك كلام فى سرك كدة شيل الفلتر الاصلى وحط الفلتر الاسبور وحيبقى عندك full intake system باقل التكلفة وبافضل اداء
فلازم نشكر بروتون وال iafm لانة سهل اوى الموضوغ دة ومخلناش ندور باة نحطة فين علشان مياخدش هوا سخن والكلام دة

وبردة بعد بحث وتفضيل ما بين اكتر من فلتر سواء سيموتا و k&n وقع اختيارى على السيموتا الكاربون فايبر لعدة اسباب اهما

1-الفلتر جوة علبة كاربون شيك جدا وبالتالى حتحافظ علية من الاتربة والهوا السخن اللى جاى من الموتور بدرجة مقبولة
2- وانة مقفول من الناحيتين بفضل العلبة وبالتالى سهل اوى انك تركب الطرف الاولانى بالخرطوم اللى واصل على الموتور والطرف التانى بالتطوبلة الاستوك اللى واخدة الهوا من عند الكبوت كل اللى بتبقى محتاجة شوية كوتشات تطول بس الفرق دة علشان تقدر تركب الفلتر باريحية

المهم ندخل على صور الفلتر اللى انا جبتة ودة كان تمنة تقريبا 350 جنية مش متاكد اوى بس هوة كان فى الرينج دة

[sor2]http://www.oneshift.com/carprofile/images/part_full/805.jpg[/sor2]

ودى صورتة بعد ما ركبتة فى العربية تحت البيت بمزاج :))











طبعا زى ما شايفين الفلتر تركيبة سهل اوى وبسيط وبيحقق المعادلة الصعبة بتاعة اختيار مكانة وسحب الهوا والكلام دة والفضل يرجع لتصميم الانتاك الاصلى الذكى فى رائى المتواضع

نيجى باة للمميزات والعيوب

اولا العيوب كالعادة :)
1-بصراحة العيب الوحيد اللى انا شايفة تقريبا لفكرة انك تركب الفلتر دة هوة انك حتحتاج كل فترة لا تزيد عن 2000 كيلو وتنضفة للحفاظ على مستوى الاداء بتاع العربية ويمكن من هنا نيجى لتانى عيب اللى هوة مرتبط برقم 1 بردة
2- تنضيفة رخم شوية لانك حتحتاج تفك اربع مسامير اللى هما بتوع العلبة الكاربون الاول وبعدين تطلع الفلتر وتنضفة وترجعة تانى بنفس الطريقة ولحد دلوقتى انا منضفتوش مع انى تجاوزت ال 2000 كيلو كتجربة ومش عارف هل ححتاج انى افك الليلة دى كلها علشان اعرف افك العلبة ولا حقدر انى افكها بدون ما افك ال intake كلة هى رخامتها فى الكسلانين زى حلاتى :)

المميزات
1-من اهم مميزات الفلتر دة بالنسبالى انة ملوش صوت نهائى يعنى مش حتقدر تفرق بين صوت العربية قبل وبعد نهائى حتى مع الحرق الفرق الوحيد لو فاتح الكبوت وكبست بنزين مرة واحدة حتسمع صوت فحيح ومحدش يسالنى يعنى اية لانى مش عارف :)))

2- للامانة ودة الغريب والحمد لله بردة سحب العربية اختلف تماما معاة سواء فى السرعات القليلة او السرعات العالية ودى حوضها باستفاضة علشان بردوا تبقى عارف انك مركبتش سوبر تشارجر ولا تربو
ولا حاجة لا كل حاجة تتحط فى نصابها القانونى (حلو الكلام الكبير دة :))

على السرعات البطيءة

العربية مبيحصلهاش Lag نهائ ومفيش اى احساس بفقدان للعزم اطلاقا بالعكس التسارع يمكن تحسة افضل شوية

على السرعات العالية وهنا باة المهم

لما بتيجى تحرق على الغيار وتنقل على اللى بعدة فى الاول كان الار بى ام بينزل بعد النقل وتحس انة ملضمش فى النقلة اللى بعدها على طول
لاء بعد التركيب انت حاسس ان تجميع العربية اسرع بكتير خصوصا فى الاوتو زى عندى كدة وتحس ان العربية بتجمع نقلاتها ورا بعض والار بى ام ماسك نفسة مبيتهبدش اوى

3-لو ماشى على مهلك الفلتر دة بكل تاكيد بيوفر فى استهلاك البنزين ودة انا لاحظتة اكتر من مرة

اتمنى ان الموضوع يكون عجبكوا وانا فى الخدمة لاى استفسار
تحياتى للاسود

برنس و الله يا ميدو, بس تنظيف كل 2000 كم ايه بس يا راجل, ده بتاع باور زون قال كل 5000و انا مش مصدقوا, و وسام بتقوللي كل 20 الف!