ملاك المازدا 3 و البنزين ....!!

**WalidAdel** · 22-05-2012 03:24 AM

انا قولت نعمل موضوع مجمع عن البنزين بتاع العربيه دي و استهلاكها و كده لاني بصراحه مش فاهملها حاجه
اولا : انا ليا استفسار في العداد
هيا كام لتر اصلا و اللمبه لما تنور بيبقي فاضل كام لتر في التنك و الشرط الكبيره دي معبره عن 10 لتر ولا اكتر لاني حاسس انها بتهزر بصراحه
ثانيا : عايزين استهلاكات بقي جوه البلد بالتكييف طبعا و علي الطرق السريعه علشان يبقي في ارقام استرشاديه كده الواحد يبقي عارف الدنيا فيها ايه لاني مش فاهملها بتاكل بنزين ولا هيا كده في العادي ولا ايه
فهبتدي بنفسي بقي و اتمني التفاعل مع الموضوع ده
انا العربيه عندي جوه البلد بقي حدث ولا حرج ساعات بيعمل 140 كيلوا في ال20 لتر بالتكييف (بنزين من موبيل) .... ايه ده بقي
هيا اصلا بتعمل كام في الصفيحه بالتكييف داخل البلد
علي الطوالي بقي وانا كل طرقي سريعه اصلا و بالتكييف بردوا
العربيه بفولها عند بنزينة موبيل اللي عند كارتة القاهره الاسكندريه دي
بروح العامريه و ارجع بيقي العداد عند تاني شرطه كبيره من تحت ة ببقي عامل 360 كيلوا و بحط 40 لتر مقفوله و النتيجه 9 كيلوا/لتر متوسط السرعه 90-100
هابتدي اخد بالي من موضوع البنزين ده الفتره اللي جايه فعايز ارقام كده تبقي معايا علشان اعرف الطبيعي بتاعها ايه ... و شكرا مقدما للردود

**WalidAdel** · 22-05-2012 03:37 AM

نسيت اقول علي انهارده كان كام
وانا راجع بقي من اسكندريه طول الطريق 160- 170 بالتكييف و 3 افراد و مفول في موبيل اللي هيا عند ماكدونالز دي
وصلت البيت كانت العداد عند قبل نص التنك بحبه من فوق و كنت عامل 200 كيلوا و ليسه بقي بكره ان شاء الله هافول علشان اتفاجاأ و اعرف عملت كام كيلو/لتر كيلوا

**WalidAdel** · 23-05-2012 05:02 PM

المشاركة الأصلية كتبت بواسطة amarsafy

حوالى 9-10 كيلو لكل 1 لتر
و كل شرطة حوالة 35-40 كيلو
و التنك 55 لتر
و اللمبة لما تنور يبقى فيها حوالى 10لتر أو اكتر مش فاكر قوى...

اخيييييييييييييييييييرا الحمد لله حد رد عليا

ياباشا والله انا مش عارف اشكر حضرتك ازاي

**WalidAdel** · 27-05-2012 08:59 PM

المشاركة الأصلية كتبت بواسطة omarkhaled55

بس جوة البلد انا بحس فعلا انها بتخرب بيتى بنزين :)

انا زعلان بردوا من العربيه جوه البلد علي فكره
بس مستني احط من بنزينة نضيفه علشان اطمن لحسن موبيل دي بحس ان البنزين مافيهوش بركه و بيتبخر و هيا واقفه في الشمس حتي

سؤاااااااال بقي : حد بيحط منفذ انجكشن و دورة البنزين ده ولا ايه

**romar** · 28-05-2012 03:22 PM

أنا بتعمل معايا جوة البلد 14 أو 15 لتر لكل 100 كيلو... التكييف شغال صبح وليل... طبعا استهلاك فظيع بس أنا جوة البلد بالنسبة لي يعني جوة البلد بجد.... يعني حتى الدائري مش بطلعه... متوسط السرعة بالنسبة لي بيكون حوالي 12 كيلو في الساعة (بناءا على شاشة المعلومات)...
على الطريق السريع بقى الاستهلاك بيبقى فعلا ممتاز... مرّة سافرت اسكندرية وثبتت السرعة على 100، عملت 7 لتر لكل 100 كيلو

**romar** · 28-05-2012 03:34 PM

موبيل شغالة نظام فرانشايز (توكيل)... مش شرط أي محطة موبيل تبقى كويسة.... أنا عشان عندي متوسط الاستهلاك بيبان على شاشة المعلومات (كام لتر لكل 100 كيلو)، بصفر عداد الكيلو وعداد متوسط الاستهلاك مع كل تفويلة، وبعدين بحسب عدد اللترات اللي العربية استهلكتهم (بيساوي متوسط الاستهلاك مضروب في المسافة اللي مشيتها العربية من ساعة ما مونتها).... لما آجي أمون بقارن بين اللي مونته بجد وبين اللي العربية حسبته عشان أعرف البنزينة دي سارقني ولا لأ... ساعات كتير ممكن تفرق معايا في بعض محطات موبيل على 3 أو 4 لتر في كل تفويلة... لكن اللي بتطلع دايما مظبوطة بنزينة توتال اللي في الحي التامن... حتى وطنية مش دايما بتظبط (غير إني مقاطعها عشان معترض على دخول الجيش في مجال البيزنس)