الموضوع: ما الحل مع المرأة الزنانة والنكديه

المشاركة الأصلية كتبت بواسطة cyborg_ift

يا جماعه لحد دلوقتي مفيش حل واقعي

طب نسرد يوم لذيذ جميل مثلا يوم من ايام الماضي ونشوف الاراء

صحيت الصبح الساعه 6:30 دخلت الحمام وخدت دوش سريع وحاسس اني ريلاكس
الساعه 6:45 وانا خارج من الحمام لقيت المنظر ده وحوار بدأ بـ مصحتنيش ليه وانت قايم أقعد معاك لحد ما تنزل
أنا : صعبتي عليا لقيتك غرقانه في سابع نومه
هيه : شوفت انك اتغيرت ومبقتش زي زمان
أنا : يعني انا الحق عليا اني مش عاوز ازعجك
هيه : ههههه طيب ماشي عموما انا داخله انام
أنا : يابنتي انتي مش قايمه علشان تقعدي معايا لحد منزل
هيه : خلاص مبقاش ليهه معنى
أنا : يا فتاح يا عليم
هيه : والله ما انا قايمه الصبح تاني مدام منكده عليك كده
أنا : محايله تتراوح ما بين 15 إلى 30 دقيقه وبعد كده اتكل على الله للشغل

في تمام الساعه العاشره الاقي التليفون يرن يرن يرن يرن أقوم زي الغلبان اتصل
أنا : ايوه يا بنتي
هيه : مبتردش عليا ليه وسايبني على الويتينج
أنا : كنت بكلم المديره بتاعتي
هيه : يعني هيه اهم مني
أنا : ده شغل يا بنتي
هيه : ويك ويك ويك ويك عشر دقايق وفي الاخر انت مش مركز معايا ليه
أنا : اصل انا بكلمك وانا شغال
هيه : وانا كل اما اعوزك ملقكش
انا : والله مشغول اوى شويه وهكلمك

من الساعه 10 إلى الساعه 5 والله العظيم حوالي 10 مكالمات

الساعه 7 مساءا وانا داخل البيت
أنا : السلام عليكم
الرخامه : شيلني يا بابا ويك ويك ويك ويك
هيه : شفت انت مبتسلمش عليا كويس ازاي
أنا : انتي عارفاني في الحر ببقا مرهق جدا وببقا خايف اكون عرقان واضايقك
هيه : عادي يعني جت على ديه
أنا : معلش يا حياتي وأسلم من جديد
هيه : يادي النيله نسيت اجيب كيت وكيت وكيت انزل هاتهم
انا : حرام عليكي يا بنتي ده انا لسه داخل
هيه : خلاص انت حر انت اللي مش عاوز تاكل اهوه
انا : استغفر الله العظيم وألبس الجزمه تاني والاقي اللي شبط في البنطلون اجي معاك يا بابا وبعد محايله انزل واطلع تاني والاكل يجهز وناكل

الساعه 8 موعد مسلسل فاطمه بتنجانه
هيه : ياااااااااااااااه نفسي اروح تركيا
انا في سري : يارب ياختي يا رب
هيه : بقولك نفسي اروح تركيا
أنا : وماله قومي حضري الشنط
هيه : بتتريق ولا صحيح انت مش هتحب البلد هناك
أنا : لأ بصراحه مبيجوش على نفسي
هيه : نعم ومين بأه اللي بييجي على نفسك
أنا : مش فاهم
هيه : بص بطل تلقيح الكلام والتليفزيون والكلام اللي بتسمعه بتاع الشيوخ
أنا : أااااااااااااه يا حبيبتي وانتي اللي يعرفك يعرف غيرك
هيه : أه اديني بقولك
أنا : لا اطمني خالص انا الحمد لله مبفكرش في الموضوع ده خالص

الساعه العاشره وانا بسقط على انغام السمسميه ولسه عيني بتقفل
هيه : بقولك ايه متقوم تفسحنا
أنا والشياطين بتتنطط في وشي : حرام عليكي ده انا من الصبح وانا متمرمط ده غير المحايله وجر الشكل
هيه : يعني من الاخر هتنام
انا : طب نريح ساعه حتى ونقوم نسهر
هيه : وليه تيجي على نفسك اصحى الصبح احسن علشان تروح لصحابك في الشغل فريش
انا : يا بنتي حرام عليكي ده انتى قدراتك خارقه يا بنتي اهدى على نفسك شويه احسن انا خلاص اتخنقت
هيه : وليه تيجي على نفسك احنا فيهه وكل واحد يروح في حاله

وهذا يوم من ايامي السعيده

لا ربنا يتولاك برحمته

المشاركة الأصلية كتبت بواسطة ghosts

:pointiy2[2]: ههههههههههههههههههههه ....
ودى نهاية كل واحد عاقل قرر أنة يتجوز ....

بس شوف المعناة اللى أنت عايشها صنعت منك كاتب ساخر .... :018a1d~146:
دة أنا كأنى قاعد بقرا كتاب لأحمد رجب ....

بالمناسبة أحمد رجب دة حبيبى ....
مفيش كتاب ألفة ماقرتهوش و يمكن دة اللى عقدنى من الجواز ....

بس أحييك يا cyborg على أسلوبك الساخر اللطيف ....
من النادر أنى ألاقى عضو هنا فى المنتدى عندة الحس الفكاهى دة ....

و أكيد الفضل فى كدة يرجع للمدام (وراء كل تعيس أمرأة) ....
بس أنت من النهاردة صديقى ....

وعشان خاطر الصداقة أنا هقولك بقى على المفيد ....
أولآ أعتقد أن الخطوبة ماخدتش وقت كافى تقدر من خلالها تتعرف أكتر على المدام قبل ما تتدبس ....
يعنى لو كانت ظهرت اللطافة دى أثناء الخطوبة كنت أنت أكيد أكيد خلعت ....

ثانيآ أنت بتطلب المستحيل ....
عايز تغير طبع مراتك؟؟!!
دة مش ممكن يحصل أبدآ ....
الستات معروفة بطبعها تمووووووووووووووت فى النكد ....

ثالثآ مفيش قواعد معينة ممكن تتبعها مع الستات ....
يعنى النصيحة اللى تمشى مع دى مش من الضرورى أنها تمشى مع دى كمان ....

لكن ممكن أقولك جرب كدة الأهمال والتجاهل ....
حاول تحسسها أنك مش سعيد معاها بسبب تصرفاتها و أتصرف كأن فى واحدة تانية دخلت حياتك ....

يعنى أتكلم مع واحدة زميلتك من غير تكليف قدامها ....
لما تيجى لك رسالة (أن شالله حتى من فودافون) تنح و أبتسم كأنها جاية لك من حبيبتك الجديدة ....
ولما تقولك فى أية؟ أعمل نفسك مرتبك وأمسحها علطول ....
أهتم بنفسك أوى أوى و أنت رايح الشغل كأنك رايح راندفو ....
يعنى من الأخر بين لها أن بين لها أنك عايش فى قصة غرااااااااام ملتهبة ....
يمكن لما تحس أنك هتروح من أيديها و أنها هتخرب بيتها بأيديها بسبب تصرفاتها تغير من نفسها ....
وأبقى طمنى عليك يا صديقى ....

لا كده هيتروق عليه بزياده ههههههههههه

المشاركة الأصلية كتبت بواسطة cyborg_ift

ياباشا دول بيحبو النكد للنكد

اولا : مبيتعبوش ... قدره هايله على الرغي لميت سنه قدام ... قدرات خارقه في الخروج والفسح والتطبيق والله اكتر مننا ... دماغهم تعباهم مبيبطلوش تفكير

ثانيا : عاوزه عاوزه عاوزه عاوزه وأخر كوميديا علشان اللي بيقولوا استحمل ههههه في عيد ميلادي جابتلى برفان حلو وانا بصراحه طرت من الفرحه في اخر الشهر لقيتهه كتبالي في بند مصاريف البيت هههههههههه (قسط البرفان بتاع عيد ميلادك) هههههههههههههه يعني بدفع حق هديتي لنفسي يعني مستخسره تجيبه من مصروفهه واقولهه ليه كده تقولي كفايه اني افتكرتك

علي فكره حوار البرفان ده مش ظريف

المشاركة الأصلية كتبت بواسطة minicooper20

شد عليها شويه يا كبير كده مينفعش
وكمان مبنفعش تحط الطلاق فى التهديد
فهمها قولها لو الكلمه دى اتقلت على بيت ابوكى
دى مفهاش هززار مش كل متقولك عايز لبانه مترضاش
تقولك كلواحد يروح لحالو
دى تتقدر فيها على الافل اسبوع معمله خشب علشان تعرف ان الله حق
وان كانت هى ببتنكد عليك عليك اهملها هتيجى تتمسح فيك

+111111111111111111