الكليو عطلت :(

**dandashx** · 30-05-2012 01:38 PM

العربية مش بتدور ......

من الأول خالص:
جبت العربية من شهر ونص وكانت شغالة معايا زي الفل، لحد مالتانك قرب يشطب ومش لاقي بنزين في حته، أخيرا فولتها من بنزينة موبيل شكلها مش مريح في شارع السواح. بعد التفويلة بأسبوع العربية بطلت مني فجأة على كوبري أكتوبر. أدور ماتدورش. المارش بيشتغل بس العربية مبتلقطش. جبت ناس زقت العربية وبرضو مفيش فايدة. وقفت سواقين تاكسي يبصوا عليها، واحد خبط على تانك البنزين ومشي، والباقيين معرفوش حاجة. قعدت جوه العربية وفتحت الكبوت والإزاز وشغلت الكاسيت، وبعد ساعة بادور العربية لقيتها لقطت. حمدت ربنا ومشيت ونسيت اللي حصل.

إمبارح في التجمع الخامس، التانك وصل عند ربعه، وقررت أفول حسب نصيحة الناس. فولت في بنزينة شل اللي هناك وطلعت بيها. مشيت بالضبط 10 دقايق ولقيت العربية بتعمل حاجات غريبة. رجرجة خفيفة يدوبك ثانيتين ونا سايق على سرعة ثابتة من غير مانقل غيارات أو حاجة. بعدها بعشر دقايق برضو صوت المحرك هدى خالص والعربية سرعتها بتقل تدريجي ونا دايس بنزين، مفيش ثواني والعربية رجعت تكمل عادي بنفس السرعة. بعدها بشوية رجرجت مرة كمان لثانيتين ثم كملت يجي ربع ساعه كويس وزي الفل.

وبعدين فجأة، العربية بطلت والسرعة تقل تقل لحد ماوقفت خالص. أدور مابتدورش. أحاول مرة واتنين مفيش. خبطت على تانك البنزين زي ماحصل المرة اللي فاتت ، وبرضو مفيش. الساعة 12 والدنيا فاضية ومش لاقي حد يزق معايا العربية. بعدين قعدت نص ساعة كده ودورتها لقيتها دارت. حمدت ربنا وقلت يلا عالبيت في حدايق القبة وربنا يسترها في الطريق. طول الطريق والعربية بتجيلها أوقات ترجرج وأوقات أحس ان الموتور مش بيوصله بنزين وبعدين يرجع يوصله بنزين ويكمل. الحاجات دي كانت بتحصل بمعدل مرة كل 10-15 دقيقة. فضلت ماشي على 50ك/س ومدي إشارة انتظار لحد ماروحت البيت وايدي على قلبي. قدام البيت بالضبط العربية بطلت (والحمد لله). الساعة 2 ونص الفجر ومش عارف أعمل ايه، زقيتها لوحدي وركنتها قدام البيت، وقلت بكرة الصبح اشوف هعمل فيها ايه.

النهاردة الصبح نازل أدورها ومتوقع إنها تشتغل، لقيتها مش بتدور. قمت قافلها ورحت الشغل مواصلات وجيت جري اسألكم.
العربية عاملة 85 ألف كيلو، وشاريها من شهر ونص، معنديش أي فكرة عن صياناتها السابقة، وكنت المفروض رايح النهاردة أغيرلها (زيت - فلتر زيت - فلتر هواء - فلتر بنزين - بوجيهات) لإني ملقتش وقت أغيرهم من ساعة ماشتريتها.

خبراء الرينو وبخاصة الأستاذ albasha إيه رأيكو في اللي حصل؟ المشكلة ممكن تكون في ايه؟

ثانياً، العربية مش بتتحرك، ينفع أجيبلها ميكانيكي لحد البيت يكشف عليها؟ ولا أدور على حد يسحب العربية لحد الميكانيكي؟ أقرب مكان بالنسبالي هو فرنش موتورز جسر السويس، ناس كويسة ولا؟

ثالثاً، بالنسبة لتغيير الزيوت والفلاتر، الحاجات دي موجودة عند فرينش موتورز؟ طب أصلي ولا تقليد؟ ولو أصلي سعرها أغلى بكتير ولا في المعقول؟

وجزاكم الله خيرا

**albasha** · 30-05-2012 03:47 PM

واضح إن طلمبة البنزين فصلت وديه بتحتاج تغيير الموتور تقريباً بوش بيعمله في حدود 250 جنيه وإن شاء الله بعدها حاول
تحافظ علي مستوي البنزين يكون عند الربع ومش يقل

**dandashx** · 30-05-2012 04:04 PM

المشاركة الأصلية كتبت بواسطة albasha

واضح إن طلمبة البنزين فصلت وديه بتحتاج تغيير الموتور تقريباً بوش بيعمله في حدود 250 جنيه وإن شاء الله بعدها حاول
تحافظ علي مستوي البنزين يكون عند الربع ومش يقل

جزاك الله خيراً يا أستاذ عماد

**AHMED1718** · 30-05-2012 04:45 PM

ضيف كمان تغير فلتر البنزين على حوار ماتور الطرنمبة

**shawkylotfy** · 31-05-2012 04:10 AM

طرمبة بنزين او فيشة طرمبة البنزين الى تحت الكنبة الى ورا وبعد كدة متخليش البنزيين يقل خالص علشان الطرمبة بتستخدم البمزين نفسة لتبريد الطرمبة وبردة خلى باللك البنزيين اليومين دول مغشوش وعلية مية ودة يخلى العربية تقطع بردة بس مشكلتك طرمبة

**dandashx** · 31-05-2012 03:07 PM

تم التصليح والحمد لله. طلعت المشكلة مشكلتين، موتور طرمبة البنزين وده غيرته بواحد بوش ألماني من شارع دمشق ب 250 جنيه، وبعد ماغيرته اشتغل بس برضو الدوارة مش بتكمل

ثم اكتشفنا إن سلك حساس الكرنك كان مش مضبوط وبيعلق، وده ضبطهولي الميكانيكي ولحمه وعزله كويس.

والحمد لله العربية بقت كويسة.

إضافة .. غيرت فلتر البنزين معاهم، والقديم كان جايب قطران. بنزين بلدنا بقى .. هنعمل ايه

إضافة كمان .. فيه بوش صيني بيتباع ب 120 جنيه في شارع دمشق.. الاختلاف ما بينهم إن علبة الألماني عليها علامة مائية فضية مكتوب عليها بوش

**dandashx** · 03-06-2012 02:53 AM

يا فرحة ماتمت .. العربية اشتغلت يومين وعطلت تاني نفس العطل وراسها وألف سيف مش عايزة تدور

وديتها عند فرينش موتورز بالونش (خد 150 جنيه بعد فصال التنين عشان ينقلها من الكوربة للألف مسكن)

هناك في فرينش حطوها عالكمبيوتر وقالولي حساس الكرنك بايظ .. طب ايه الحوار؟ هنغيرهولك بواحد جديد.. بكم؟ ب 130 جنيه .. طيب أمري لله

أوبا .. الفيشة بتاعت الحساس بايظة ولازم تتغير هي كمان .. قلتله ضروري؟ وراهالي وطلعت متشخرمة وملعوب فيها وحتة منها مكسورة والميكانيكي القديم كان ملزقها اي كلام عشان تمشي

بكم الفيشة يا عم؟ ب 340 جنيه
لا لا مش لازم، حاول تركب الحساس عالفيشة دي
هعملهالك يا فندم بس كده الحساس الجديد هيبوظ، الأحسن تركب كله على نضافة، وهتاخد ضمان سنة عالاتنين

أمري لله/ ركب ياعم الحساس والفيشة

جربناها مرة واتنين وتلاتة ونطفي ونشغل، ونطفي ونشغل، العربية تمام

خدوا 110 جنيه كمان كشف كمبيوتر ومصنعية بعد الخصم

رغم إحساسي بالخنقة من الفلوس اللي اتدفعت بس احساس العربية وهي دايرة وراكبلها شغل نضيف خلاني اعديها.

طلعت بيها ونا منتشي من الفرحة

وفجأة الدنيا ضلمت

العربية فصلت .. أدور ماتدورش

من حسن حظي مكنتش بعدت كتير عن فرينش.

قمت قافلها ورجعتلهم، قاموا بعتوا 3 عمال معايا يزقوها لحد المحل.

من خنقتي مالمستش العربية وهما بيزقوها، وفضلت حاطط ايدي في جيبي وباتفرج عليهم

هناك بقى، لفوا وداروا، جربوا ومفيش فايدة

جربوا سينسور تاني، برضو مفيش فايدة

الساعة كانت 6 ونص، قاموا قالولي سيبهالنا يا فندم وبكرة نشوف ايه المشكلة

بحاول أتفاءل وماقفلش من العربية، ادعولي المشكلة تتحل