عندى مشكله فى الفرامل وعايز أسمع آرائكم
كنت ماشى على سرعة 40 أو 50 وفجأه عربيه أكسنت بأكياسها وقفت قدامى وفرق بينى وبينها مسافه كبيره
وعينكم متشوف إلا النور زحف زحف مسافه كبيره متتناسبش مع السرعه (40) كنت هخبط الأكسنت بس ربنا سبحانه وتعالى ستر
أول مره أفقد الثقه فى عربيه أركبها بالنسبه للفرامل
رحت للأخ بتاع الفرامل عمل رجلاش ورا وأخد هوا من ال 4 عجلات ومشيت
الفرامل إتحسنت بس مش كتير
إكتشفت حاجه إن الفرامل اللى قدام بتضرب كويس لكن العجلتين اللى ورا مع السرعه والضغط المفاجئ على الفرامل مبتمسكش فبتزحف
رجعتله بعدها بفتره قالى كده يبقى الضفدعه (المشترك) لازم يتغير لأن البلوف اللى جواه مسدوده
قلتله هو مش ضغط الزيت ورا كويس
قالى اه بس مع السرعه وكبس الفرامل مره واحده مبيكونش كويس
طلبت منه يكشف على جلد الماستر للعجلتين الخلفيتين (وبصراحه ده اللى أنا شاكك فيه مع إنه مبيجبش زيت ) والزيت برضو لو عايز يتغير وتيل ورا لأنى مغير قدام قريب
قالى الجلد سليم والتيل سليم ومش مأزز والطنابير زى الفل
الفكره إنه عايز يغير المشترك بواحد مفهوش بلوف
طبعا قلتله شكراااااا مش عايز أغير فابريقة العربيه خصوصا إن شكلها متفكتش قبل كده
وبصراحه الموضوع ده هيجننى مش مخلينى أستمتع بالجرى
أنا صحيح بجرى بس قلقااااااااااااان جدا
آسف على الإطاله