قيادة السيارة المانيوال بدون دبرياج - في حالة انقطاع سلك الدبرياج

**جمال** · 18-06-2008 03:31 PM

انا عملتها مضطر مع عربية فيات 1300 وجيت بيها بهذه الطريقة من ليبيا الى الاسكندرية
كنت جاى من طرابلس وفى السكة بعد بنغازى الريش اتكسرت وماكانش فيه حد يصلح وكان معايا اصحابى فى عربية تانية وكانو بيزقونى علشان ابدأ المشى

**Xpert** · 18-06-2008 09:20 PM

يا باشا دي للضروره القصوي .. بس لما تيجي تدور بتحط التاني مش الاولاني ...

**wesam_salom** · 29-10-2008 02:15 PM

هههههههههههههه
فكرتنى بأيام العربيه الريتمو
انا رجعت بيها من عبود لحد طنطا بدون سلك دبرياج
الله لا يعودها ايام
كان معايا عربيه ريتمو كانت بتقطع سلك دبرياج كل شهر او اسبوع وساعات مبيكملش يومين
بسبب انى اول ما اشتريتها كنت ركبت واحد بنفسى بس معرفتش اركبه
فحك فى الصاج اللى السلك بيعدى منه وكحته
وبعدها عمر السلك ما يركب مظبوط
كان دايما معايا سلك احتياطى فى شنطه العربيه
وكتير جدا كانت بتقع وامشى بيها
لحد ما خلاص كنت حاسس انى راكب اوتوماتيك من غير دبرياج
وكان الدبرياج هو اكتر حاجه مخليانى نفسى اغير العربيه
وجربت كل الحلول ومنفعتش
لحد ما بعتها بعد ما قعدت معانا 10 سنين
وبعدها كنت مصر اشترى اوتوماتيك
ماهو اللى اتلسع من الريتمو ينفخ فى الهيونداى

**R A N A** · 13-11-2008 01:02 PM

حلوة الطريقة دي في حالات الطوارئ بس للأسف انا مش مستوعباها خالص غريبة اوي ان الفتيس ممكن ينقل لوحده من غير ماتكون دايس دبرياج لو انت علي السرعة اللي بعديها
بصراحة مش قادرة افهما خالص :k41:

وبصراحة هاخاف اجربها كمان

**M!NA** · 13-11-2008 01:28 PM

المشاركة الأصلية كتبت بواسطة birdybirdy

حلوة الطريقة دي في حالات الطوارئ بس للأسف انا مش مستوعباها خالص

غريبة اوي ان الفتيس ممكن ينقل لوحده من غير ماتكون دايس دبرياج لو انت علي السرعة اللي بعديها
بصراحة مش قادرة افهما خالص :k41:

وبصراحة هاخاف اجربها كمان

الموضوع كله موضوع sense ... يعني أول ما بتوصل العربية للسرعة اللي بننقل فيها عالتالت مثلا... ممكن نجرب نسقط العصاية في مجرى التالت بس براحة... بحيث لو قبلت... تستقر و لو زعقت نهدي أو نسرع شوية (حسب الاحساس بالسرعة) و بعدين نسقطها تاني...

**abo_hosni** · 13-11-2008 06:57 PM

باعملها لما أكون رايق. بشرط تكون مش واقفة و باجيب من الأول لتاني لتالت للرابع و أسقط من الرابع لحد الأول يعني مشوار بتاع 15كم و فيه تهدية كتير ساعات آخده من غير دبرياج
عندي لازم أدي الغيار سرعته كاملة قبل ما أنقل، و لحظة ما أحب أحرك الفتيس باسيب سنة بنزين و إيدي مع الفتيس بحنية بلاقي الفتيس اتزحلق بكل نعومة لوضع المور و عشان أزق الفتيس للغيار اللي بعده فيها تكة بسيطة كده بالتعود عشان ما أكسرش التروس. و لما أجي أسقط نقلة لازم تكون السرعة مناسبة للنقلة و بادوس سنة فرامل لحظة تحريك الفتيس و كله ماشي بدون تقطيع ولا صوت
في تحدي تاني أني آخد مشوار من غير ما أدوس فرامل بس ده عايز دماغ أروق و شوارع فاضية بعد نص الليل و كنت باعمل تحدي "من غير فرامل" ده أيام ما كنت باركب العجلة مع أصحابي حتى كنت عامل لها نور استوب Led :)

**KareemSafwat** · 13-11-2008 07:04 PM

المشاركة الأصلية كتبت بواسطة hazem_khidr

حيزقك ازاي اذا كان المفروض و انت بتتزق تكون مديها الاول او التاني:)
و دايس دبرياج علشان العربيه تتحرك.
..........................
عاوز بقي تعمل الحركه دي جرب اللي حقولك عليه من غير سينس و من غير وجع قلب.
انقل علي الاول او التاني و العربيه مبطله و دورها مارش و هيا بتنط حتشتغل معاك
لما تحب تنقل اطفي العربيه و انقل فتيسك و بعدين افتح الكونتاك و ارمي للعربيه زي ما بيقولوا كانك بدورها زق و هكذا.
طبعا الكلام دا في حاله الضروره القصوي و بس

مينفعش تبطل ال عربيه و تنقل من غير دبرياج, كده هتكسر الجيربوكس علشان المفروض سرعة الموتور و العجل تكون متقاربه, حضرتك لما بترمي بتكون دايس دبرياج لحد ما تتزء و تاخد سرعه.
أنا جربت الطربقة ده في كل العربات و نفعت. كل الفكره إنك بعد ما تفك الغيار توازن برجلك على البنزين مابين دورات المحرك و سرعة العربية. كده كإنك لغيت دور الدبرياج و هو فصل حركة الموتور عن العجل علشان كده الإثنين نفس السرعه.
مثال: العربيه علي التاني سرعتها 40 على 3000 دورة, لو نألت التالت هتكون 2000 دوره على نفس السرعه. علشان تنقل من غير دبرياج لازم بعد متفك التاني تدوس سنه صغيره تخلي عدد الدورات حوالي 2000 و تنقل بكل بساطه.
محتاجه بس شوية تعود.