الموضوع: اكسيل 97 ولا صنى 94 محتارة بين الاتنين

والسمكرى ضرورى ولا مش لازم

والميكانيكى والسمكرى بياخدوا فى حدود كام انا اعرف ان البنزينة بتاخد 160 جنيه

نصيحة لله .... فكري في قطع الغيار وانتشارها في بلدك الاول ... لانك هتحتاجي تصرفي علي اي عربية فيهم لو حالتهم كويسة مش اقل من خمسة الاف جنيه ... ده لو قطع غيارهم اسعارها عادية ... لانهم واضح انهم مهلوكين شغل لان مويلاتهم بعيدة يعني اقل واحدة فيهم من 15 سنة والتانية من 18 سنة

اللي يقولك مش هتدفعي حاجة وهتخديها ع المفتاح تعرفي انه كداب ونصاب لو صاحب العربية ... لو الميكانيكي يبقي هيتعرق من صاحب العربية ... لو عضو من المنتدي يبقي بيجرب فيكي وشششش

لازم تاخدي ميكانيكي ثقة يعني حد من معارفك يعرفه كويس ... وكمان تاخدي حد من قرايبك بيفهم معاكي
وطبعا لازم تتأكدي من رش الدواخل لان ده معناه ان العربية عاملة حادثة خطيرة قد يكون انها كانت نصين مثلا ....
وخلي بالك ان انت كده كده لما هتخلص الرخصة وتحتاجي نقل الملكية هتعملي فحص للعربية يعني حكاية انها فحصها بعد سنتين ده كلام ملوش اهمية ......
لازم تشوفي عداد الكيلو مترات عامل اد ايه .... ولو لقيتي رقم قليل تحت ال 100 الف تشكي ان العربية دي موتورها ملعوب فيه وبالبلدي قالبة عداد

لازم تتأكدي ان اللي قدامك هو المالك الاصلي للعربية والرخصة باسمه مش بتوكيل لانه ممكن يكون لاعب في ورقها و مجمعها في الوكالة وتيجي ترخصي يتحفظوا عليها لا قدر الله ... بتتعمل مع البنات بالذات كتير

عشان تريحي دماغك بجد .... بلاش حكاية الميكانيكي بقي انا فكرت في حل تاني ... انت تاخديها مركز خدمة التابع للتوكيل سواء نيسان او هيونداي واعتقد فيه في الصعيد ... وهناك تطلبي مقايسة في حدود فلوس البنزينة برضه وتعرفي انت هتغيري ايه وتعرفيه وتمنه في التوكيل كام وبره بكام وتعرفي هتحتاجي تصرفي قدايه
اوعي تستهتري بالنقطة دي لان الميكانيكي مش هيبقي في دقة التوكيل ابدا ... في حكاية معرفة العيوب وتقييمها .... يعني تعرفي ايه اللازم تغييره وتعرفي التكلفة كام جوه التوكيل وتسألي بره التوكيل وتعرفي انت ميزانيتك ايه وكمان هيطمنوكي اكثر عن العربية عاملة حادثة قالبة عداد اي خبايا ...
واسف لو كنت طولت عليكي ... بس بجد محبش انه يتعمل معاكي زي ما حصلي زمان قبل ما افهم وادرس

وربنا معاكي يا استاذة ان شاء الله

متشكرة جدا يا فندم بس احنا عندنا فى اسيوط جينرال موتور فى خاص بنيسان وفى فرع لقطع الغيار وفى مركز خدمة بس معرفش قنا فيها ولا لا طب لو مفيش فى قنا مركز خدمة اعمل ايه وهل ممكن صاحب العربية يرضى انى اخدها اسيوط ويجى معايا واكشف عليها هنا اكيد مش هيرضى غير لما تكون فلوسها معاه

انا خلاص يا جماعة قررت اجيب زيرو تقسيط وعايزة نصحتكم بقى ايه احسن وارخص الاتوس برايم ولا الاى تن ولا البيكانتو ولا الفرنا عشان فرق سعر الفرنا من الاى تن مش كبير يعتبر السعر واحد انصحونى بالتفصيل وقولولى نظام التقسيط على خمس سنيين يبقى ازاى لو عن طريق بنك ناصر وانا لو جبت هجيب عن طريق ناشيونال موتورز ااسيوط افتونى بالتفصيل الممل