الموضوع: ما يحسد المال الا اصحابه

عربيتي فكترا بي2 2001 معايا بقالها 9 شهور تقريبا مصرفتش عليها لحد امبارح فقط غير البنزين وغيرت زيت مره والحمد لله
و كل لما اقابل حد من قرايبي او اصحابي يقولي انا كنت عند المكانيكي امبارح ارد واقوله انا مصرفتش حاجه علي العربيه من اول ما جت لحد ما العربيه عملتها معايا
من اسبوع كده نزلت من البيت شلت الغطا من علي العربيه ورايح اجيب الحاج من محطه الاتوبيس كان جاي من السفر روحت لحد المحطه كويس جدا وماشي زي الفل الحاج نزل من الاتوبيس سلمت عليه وركبنا العربيه ورجعين وهوب العربيه مكتومه جامد ومبتسحبش خالص المهم سيستها لحد ما روحت البيت وركنتها الركنه التمام وسبتها لحد الصبح تاني يوم
نزلت اشوف ايه الحكايه لقيت العربيه زي الفل طب كان في ايه امبارح المهم مشت زي الفل بعد كده لمده كام يوم وعملت نفس الحركه تاني مع الحاج وهو سايق فرجع البيت وانا طبعا نظرا لخبرتي الطويله التي لا تتعدي التسعه شهور في مجال الاوبل معرفتش فيها ايه فالحاج قالي نوديها لميكانيكي يشوف فيها ايه

تعرف ميكانيكي يامحمد في المنصوره قولتله لا والله ياحج بس انا كنت قريت في منتدي علي النت "نايل موتورز" ان في واحد فاهم في الاوبل ورا سوق الجمله اسمه شكري قالي علي بركه الله ورحنا لشكري الساعه 2 الظهر لقيت صنايعي هناك الحاج قاله فين الاسطي شكري قاله في الورشه هناك اهو لقيت قدامي واحد ماشي شبه عبد الفتاح القصري "الله يرحمه"في فليم ابن حميدو رايح من الورشه دي للورشه دي انا مش بحسد علي فكره وحوالي خمس ست سبع عربيات اوبل وقفين قصاده الحاج سلم عليه وانا كمان وقالي الحاج ادي المفاتيح للمعلم يحماده وركب شكري العربيه وزود بنزين وهو واقف وقال للحاج هنغير سلوك بيجوهات الحاج قاله بيجوهات قاله لا سلوك بيجوهات المهم الحاج قاله ماشي غير نزل المعلم من العربيه وقالي هات العربيه في الظل هنا قلتلو ماشي وفضلت قاعد انا والحاج يجي نص ساعه لحد مجلنا صبي من صبيانه بدا يفك في العربيه الحاج قاله اسمك ايه قاله عبدو وفك عبدو العلبه بتاعت فلتر الهواء وجه واحد تاني اسمه رمضان شكله فاهم شويه عن عبدو

رمضان بص وهو شغال علي سير الدنمو فقال للحج السير ده عايز يتغير قاله ماشي نغيره وبعدين فك علبه سير الكاتينه وقال ياحج سير الكاتينه عايز يتغير قاله غيره ماشي وقال رمضان لعبدو بص كده ياعبدو علي فلتر البنزين فقام عبدو فكوا وقالوا عايز يتغير الحاج قالو ماشي فلما لقوا الحاج طيب وابن حلال جابوا بعد كده فلتر الهوا وبليه الشداد وجوان غطا التاكهات كل دا عايز يتغير والحاج يقول غير فقولتلوا ياحج متبقاش طيب كده مطمعهمش قالي يامحمد هما هيتغيروا مره واحده بس قلتلوا ماشي براحتك
جبنا الحجات دي وكانت الاسعار كالاتي:
فلتر الهواء :55
فلتر بنزين :40
سير كاتينه :75
سير دينمو :85
بليه شداد :95
جوان غطا التاكهات :55
يعني 405 جنيه بعد الخصم يبقي 400 جنيه
وبعد ماركبوا الحاجات دي نادوا علي الاسطي شكري الاسطي شكري جاي بالمشيه المعهوده وقالي دور ياحماده دورت العربيه مبدورش قالي استنا فضل يفك في شويه فيش ويركبهم تاني وقالي دور ياحماده دورت العربيه مبدورش وفضل كده يجي تلت اربع مرات مفيش فايده قام قايل لرمضان فكيلي الكنبه اللي ورا دي وشفلي طرمبه البنزين فك رمضان وشاف طرمبه البنزين ووراها لشكري فقام شكري قايل للحاج حظك حلو ياحج دا كان لسلها شويه وتقطع عنك البنزين وانت ماشي عايزين طرمبه تانيه ياحج ماشي يمعلم شكري بكام طرمبه البنزين ب300 جنيه وبعد ماركب طرمبه البنزين دور ياحماده العربيه دارت ياجودعان الحمد لله
كام الحساب ياسطي شكري 120 جنيه ياحج بس عشان اول مره تجيلي يبقي 100 بس

وخلصنا العربيه الساعه 4:00

بس اللي انا مش عارفه طرمبه البنزين عمل فيها ايه مش عارف ركب جديد ولا صلحها ولا ايه
يعني كده الحساب كله 800 جنــــــــــــــــد


اللي انا عايزه يجماعه بعد ازنكوا حد يقولي انا اضحك عليا انا والحج في كـــــــــــــــــــــــا م
مع العلم انها اول مره تروح لميكانيكي

واسف علي الاطاله بس كنت عايز احكي اول تجربه ليا عند شكري المكانيكي

بص يا باشا طرمبه البنزين الاصليه لا يعلي عليها كان المفروض تحاول تتفادي تغييرها لكن علي العموم اسعار قطع الغيار ممتازه وباقي الحاجات دي من العادي تغييرها