المشاركة الأصلية كتبت بواسطة كوباية شاى
الرجالة اللى فى التوبيك دة ياريت يكتبوا اية عيوب العربية و تفرير عن استعمالهم ليها فى الفترة اللى فاتت علشان المعلومات عنها قليلة اوى بالنسبة للى مقبل على الشراء
انا تقريبا من اول الناس اللى اشترت العربيه ديه في مصر , هي معايا من مارس اللى فات
العربيه اللى معايا وكيل فول اوبشن سيدان , انا هعمل تقرير مبسط كده علشان الناس اللى مقبله على شراء العربيه تعرف عنها كل حاجه
اولا الشكل العام و التبلوه : من رأي انا شكلها جميل جدا و التبلوه فخم جدا يخلي الواحد يحس انه راكب عربيه فخمه جدا و ده بسبب الخامات النضيفه المستخدمه فى التبلوه و تقفيل الابواب و الكراسي مريحه و التحكم فيها سلس و الوسع الكبير اللى امامك في التبلوه و اللى ممكن تقعد عليه حد من وسعه :) , و فى الاخر الشكل ده وجهات نظر تختلف من شخص لاخر.
ثانيا السحب و استهلاك البنزين : سحب العربيه محترم جدا خصوصا انها 1400 سي سي و فعلا ممكن تشد بيها عن عربيات 1600 و انا جربتها اكثر من مره مع سيارات اخري و كانت اداءها ممتاز من حيث السحب , يعيب السحب بس موضوع المشكله اللى بيقابلها البعض فى بطيء استجابه السياره مع دواسه البنزين و فى اعتقادي انها بتحصل قليل اوي و يمكن تظبيطها فى الصيانه , استهلاك البنزين وسط البلد مدممممممممممممممممممممممم ر زى الجيب ال 3700 سي سي بدون اى مبالغه و فى الطرق السريعه مقبول و يمكن مساويتها مع اى عربيه 1600 فى الطرق السريعه و كمان ممكن تزيد سنه :)
العفشه : من الاخر زي السيراتو
ثبات العربيه فى السرعه : عن تجربه انا مشيت بيها على 170 العربيه جمعت السرعه ديه فى وقت كويس جدا و الدريكسيون فى ايدي كان ثابت تماما مبيتهزش و العزل اكثر من رائع , انما مجربتهاش على دوران فى سرعه كبيره و منصحش اى حد يجربها لان مفيش عربيه فى الفئه ديه هتديك نتائج مرضيه , لو عاوز تاخد دوارن على سرعه يبقي هات بي ام دبليو , متنساش انك برضه راكب كيا :)
البابور استيرينج : ده فى رأي الشخصي افضل شيء فى هذه السياره بجد بجد رااااااااااااااااااااائع
الدريكسيون فى ايدك بيبقي سهل جدا فى حاله الوقوف او السرعه البطيئه لدرجه ان صباع يكفي لتحريكه و فى السرعه المتوسطه و السريعه ممكن تسيبه من ثباته و قوته , بجد تقارن بالعربيات المحترمه جدا و الغاليه فى هذه النقطه و افضل بكثييييييييييير من السيراتو فى هذه النقطه , واحد صحبي معاه سيراتو خليجي اول ما جرب العربيه بتعتي اتوهم بالموضوع ده.
الشنطه و الوسع الداخل : انا معايا سيدان الشنطه من وجة نظري واسعه و الوسع الداخلي للعربيه انا شايفه زي السيراتو محستش بفرق , اللى بيجلس ورا بيقعد مستريج جدا حتي و اللى راكب ادام مرجع الكرسي لورا
نظام الصوت : انا مش سميع اوى بس ناس اصحابي قالوا ان الصوت فيها مش كويس , و يمكن ده علشان الفول اوبشن السماعات فى الابواب بس مفيش ورا فده اللى عامل مشكله , اعتقد الهاي لاين او الخليجي فيها سماعات ورا و ده اكيد هيظبط
الفرامل : ممتازه جدا مع ان العربيه اللى معايا مش abs بس كويسه , يعيبها صوت طقطه خفيف فى حاله الضغط عليها ضغطه خفيفه و العربيه فى حاله الثبات او ماشيه براحه و لما تضغط عليها بقوه بيروح الصوت ده
الفتيس : حلو مفهوش مشاكل :)
التكييف : جيد جدا و صوته بيبقي عالى فقط على السرعه الاخيره رقم 4 , و اعتقد انه بيأثر على سحب العربيه و ايضا بيستهلك بنزين عالى .
يعني لو حصرنا عيوبها هتكون 1- استهلاك البنزين 2- طقطه الفرامل (من وجهة نظري مش باينه و يمكن انك برجل متسمعهاش ابدا) 3- استجابه العربيه لدواسه البنزين 4- نظام الصوت فى الفئات الاقل من الهاي لاين 5- العفشه النشفه اللى معودانا عليها كيا فى اغلب عربيتها (ربنا يهديهم)
لو نسيت حاجه حد يفكرني بيها و انا اقوله عامله ايه
المفضلات