بيبرد بس اندفاع البرودة ضعيف للغاية

**geddo** · 09-06-2012 11:45 PM

أستأذنكم أساتاذتي أعضاء نايل موتورز الكرام في أن تتكرموا بمساعدتي بخصوص هذه المشكلة

بيكانتو 2012
8000 كم
بتاعتي
طول منا ماشي بيها سواء صبح سواء بالليل بكون مشغل التكييف وساعات ببقى فاتك جزء من الزجاجين الأماميين لحين ما السيجارة تخلص
لاحظت مننذ فترة قريبة جداً بدء التكييف في الضعف
بيبرد كويس أوي لكن كمية الهواء الخارجة بسيطة للغااااااااااية بشكل مبالغ فيه بالرغم من وضع السرعة على 4 وتحديد وضع تدوير الهواء بالداخل

لحد امبارح وأنا راجع من اسكندرية الساعة 1 الظهر كنت ماشي ومعايا صاحبي ومشغلين التكييف على 4 وتدوير بالداخل وعمالين نجيب عرق من كل حتة
تحط إيدك على فتحات التكييف تلاقي الهواء بارد وحلو لكن ضعيف أوي واندفاعه صفر
مجرد ما تبعد إيدك عن الفتحة بمقدار 5 سم مش بتحس بأي برودة

علماً بأن السيارة فابريكة بالكامل ولسة محدش عمل فيها حاجة غير تغيير زيت الموتور
ومكملتش معايا شهرين

أرجو مساعدتي ولو هناك صور تبقوا مشكورين أوي

**egyseadragon** · 10-06-2012 04:48 PM

ممكن يكون الكويل عامل تلج و في الحالة دي بيكون عليز شحن ... ودي عشان تتأكد منها حتلاقي الهوا في البداية قوي و بعد شوية يضعف او ممكن تشغل المروحة بدون الكومبريسور و تشوف لو الهوا بقى قوى او لا
و ممكن يكون الفلتر مش نظيف...خصوصا لو انت بتفتح لدخول هوا من برة بدل التقليب كتير ...او لو مفيش فلتر يبقى الكويل نفسه مش نضيف.....او اخيرا مشكلة في المروحة نفسها او كهربتها
بس اعتقد غالبا في عربية لسة جديدة زي دي الاحتمال الاكبر ان التكييف عايز شحن...جرب الطريقتين الي قلتلكم عليهم و ابقى طمنا

**kimopops** · 10-06-2012 05:57 PM

انا حصلت معايا مشكله زي ديه في العربية الفيات بونتو لما كنت جايبها زيرو كان التكييف يشتغل تمام اول نص ساعة وبعد كده الهواء اللي خارج يعد يضعف لحد ما يبقي صفر ولما كنت ابطل العربية ربع ساعة وارجع اركبها يرجع يشتغل تمام ويعمل نفس الحركة تاني وطلع حساس التلاجة بايظ والكباس مابيفصلش فالكويل بتملي تلج ويصد الهواء والمهم اتغير في التوكيل علي الضمان

**geddo** · 10-06-2012 09:19 PM

صباح الفل يا شباب يا عسل
بس الصبح انهاردة فكيت الفلتر وكان التكييف شغال
وبمجرد خلع الفلتر من مكانه, عادت الأمور على طبيعتها وأفضل بكثير
نظفت الفلتر بطريقتي الخاصة وأعدت تركيبه وكان أنظف من الزيرو على ما أعتقد وعادت السيارة حلوة أوي وشكراً لكم

**msafa** · 10-06-2012 09:46 PM

طب الحمد لله

بس مش بدري شوية ان الفلتر يتوسخ بسرعة كده؟

يا ريت تكشف برضه خصوصا انك لسة في الصمان

**geddo** · 11-06-2012 08:08 AM

أنا خليجي
وفعلاً بدري
بس أنا برضه بحط احتمالات الجو المقرف اللي أنا عايش فيه (ولا الصحرا)

هو فلتر التكييف دا ممكن يخشله ف كام لو أوريجينال, وهل يحصل أي حاجة لو مشيتها من غيره
منا عندي الكورولا بتنزل فابريكة من غير فلتر تكييف

**esam_comm** · 15-06-2012 08:17 PM

المشاركة الأصلية كتبت بواسطة kimopops

انا حصلت معايا مشكله زي ديه في العربية الفيات بونتو لما كنت جايبها زيرو كان التكييف يشتغل تمام اول نص ساعة وبعد كده الهواء اللي خارج يعد يضعف لحد ما يبقي صفر ولما كنت ابطل العربية ربع ساعة وارجع اركبها يرجع يشتغل تمام ويعمل نفس الحركة تاني وطلع حساس التلاجة بايظ والكباس مابيفصلش فالكويل بتملي تلج ويصد الهواء والمهم اتغير في التوكيل علي الضمان

معلش انا معايا بونتو وعندي نفس مشكله حضرتك ممكن تقولي بتفاصيل اكتر المشكله دي اتحلت ازاي وفين حساس الثلاجه ده وشكرا