فى ظل الايام العصيبة والكئيبة اللى بنعيشها بسبب الساحة السياسية فى مصر
قولت نضحك شوية ونحكى عن بعض المواقف السودة اللى كانت بتحصل للواحد ولما بنفتكرها
بتكون مجرد ذكرى حلوة بنضحك عليها طبعا ما اكثر المواقف المحرجة والمواقف الغريبة اللى بنتعرض ليها
ودى بعض المواقف اللى تعرضت لها فى حياتى
1-
فى يوم من ذات الايام كانت الدنيا ساقعة جدا فى اسكندرية و مطر والدنيا بايظة
وكنت قاعد مع صحابى فى القهوة وجاه معاد اننا نروح سلام سلام وجه معايا جارى وصديقى
وبدون وصف لصديقى كتير بس هو عامل كدة تقريبا على طول
المهم ماشين والدنيا هوس هوس و المعلم اللى معايا عمال يتكلم فى امور الحياه ويك ويك ويك
وانا بسمعله ورجلى ماشية يمين شمال يمين شمال يمين وهوووووووب مافيش شمال
رجلى الشمال وقعت فى بلاعة مفتوحة ونزلت فيها بكل جسمى ورجلى اليمين كلها متشعلقة برة البلاعة ولا جاكى شان فى زمانه
والمعلم التانى كان قالع النضارة علشان المطر بالاضافة انه عامل كدة
فطبعا بذكاءه الخارق فضل مكمل مشى وهو لسة بيتكلم فى امور الحياه وانا عمال انادى عليه
يا عاااام يااااا زفت مافيش هو اصلا مش سامع من الهواء المهم اخد باله انى مش ماشى جنبه
وفضل يبص حواليه وانا بقوله يااااااا عم انا هنا وهو مش شايفنى انا بنادى منين .. ركز شوية وراح عامل كدة اخيرا شوفتنى ياطبش واللى نزل عليه الضحك
المهم جالى وهو بيضحك وهو مادد صوبعه زى اخينا دة والمفروض ان هو حيساعدنى علشان انا لو اتنكت شوية رجلى حتتكسر
فضل يضحك لحد ما خلانى عمال اضحك وهو ماسك ايدى عمال يشد ويضحك زى الهبل
راحت ايدى متظفلطة من ايده و راح منطور هو كمان وواقع فى الارض فى ماية الشتا وانا خلاص حعيط من كتر الوجع وفى نفس الوقت حعيط من كتر الضحك
طبعا ساعتها انا كنت بفكر ادخل جوة البلاعة احسن حد يعرفنا يشوفنا بالمنظر دة حتبقى فضيحة بجلاجل
واحد قاعد جوة البلاعة والتانى قاعد فى ماية الشتا فى حالة ضحك هستيرى (ههههه اكيد دول مجانين)
المهم المعلم قام ينفض فى هدومة وشدنى وطلعت وروحت مديله واحده علشان البلاهة بتاعته
وكملنا حالة الضحك لحد البيت ... كان يوم ماطلعلهوش ولا شمس ولا قمر كل ما افتكر اليوم اموت من الضحك هههههههه

.................................................. .................................................. ..
2-
مقدمة :
فى يوم من ذات الايام كنت بشتغل فى شركة ما المهم الشركة دى كان فيها اجانب وبيترددوا على الشركة كتير ودة شيئ عادى جدا
المهم فى يوم جات عندنا خبيرة وواضح الاهتمام الشديد بيها والناس رايحة جاية معاها وشكلها حاجة مهمة جدا المهم انا ماليش علاقة بيها .. حلو
المهم
الساعة بقت 12 واذان الظهر بياذن روحت خلصت اللى فى ايدى بسرعة روحت ناطط من على كرسى المكتب
وجرى على حمام الادارة بتاعتى علشان اتوضا والحق اصلى الضهر فى جامع الشركة والحمام دة كان بمفتاح
يعنى انت تدخل جوة وتقفل على نفسك بالمفتاح ولو فتحت الباب من برة مش حيفتح
انا بقى داخل على باب الحمام متسربع علشان سامع الاقامة بتاعت الصلاة وعايز الحق الصلاة قبل ما يخلصوا
افتح الباب فتح و افتح الباب على مصراعيه .. وهوووووب لاقيت الخبييييرة ذات الاهتمام الكبيير جوة الحمام يا خبر اسوووود
طبعا انا اتمسمرت فى مكانى واللى طالع عليا i am so sorry .. i am sorry وبقفل باب الحمام بالراحة
وهى بابتسامه هبلة زيها it's ok .. don't worry .. دونت ورى ايه يا ولية دة انا قولت دى حتقلع الجزمة تضربنى بيها
و طبعا بعد ما خرجت رجعت تانى علشان اتوضأ وسامع نائب رئيس مجلس الادارة بيضحك وبيعتزرلها عن الخطأ الغير مقصود
طبعا صليت فى مكان مكتبى وفضلت قاعد على المكتب زي الكرسى والسيد النائب كل شوية يعدى من قدامى هههههه
وانا باصص فى شاشة الكمبيوتر وعامل نفسى منهمك فى الشغل لحد ما جاه ميعاد الخلعوون
ونطيت فى عربيتى وخلعت احسن السيد النائب يشوفنى ... والله دى من اكتر المواقف احراجا ليا كنت بقول يا ارض انشقى وابلعينى