ناويت انزل السوق اشترى سياره يوم الجمعه

**halfangel** · 19-06-2008 12:48 AM

السلام عليكم

مقدمه شكر لكل اعضاء هذا المنتدى الجميل و بالاخص الشعب المصرى اللى زى العسل .

خلاص بقه نويت انشاء الله انزل اشترى سياره يوم الجمعه الجايه .

المرات اللى فاتت نزلت السوق فيها قولت اخد فيها خبره و شوف الاسعار و الماركات و الموديلات , و لاموئخذه كنت هتخيط فى كام سياره بس الحمدلله الفلوس حلال .

و علشان خبرتى فى شراء السيارات متوسطه كنت كل مره اشوف فيها سياره عجبتنى اروح رافعها فى بانزينه و اعملها فحص (على فكره فى بنزينه كويسه جامب السوق مش بعيده خالص مش فاكر اسمها تقريبا shell لونها اصفر فيها ناس بجد بتفهم و مش منافقين و الفحص هناك بيكلف 40 جنيه )

بس مكنشى فى توفيق , دائما كنت بلاقى مشكله فى العربيه مستخبيه و بقيت بجد بخاف موت من العربيات اللى بيسموها بيتى دى بتكون فيها خوازيق فى الغالب .

العربيه اللى بجد زعلت انى مشتريتهاش كانت دايو نوبيره اتكلمت فيها لحد 48000 جنيه و صاحبها كان موافق عربيه كانت تحفه و خساره انى مشتريتهاش مطور 1600 cc تاكييف , باور , 4 زجاج كهرباء , مرايات كهرباء , فبريكه بارا و جوه , حالتها جيده جدا , cd player , موديل 2001 و كمان اوتوماتيك !!!!!!!!

بس كان العداد بتعها واقف مش شغال و ده اللى كان مخوفنى منها + ان فيها 4 توكيلات يالا مفيش نصيب.

المهم بقه انى قررت انزل السوق الجمعه اللى جايه و اشترى عربيه انشاء الله
بالنسبه للميزانيه اللى حاطيتها لحد 52000 ميزيدوش شيلن و يمكن انقص
منهم .

اختيارى هينحصر حول السيارات 1500 1600 cc موديل ما بعد ال 2000 .

بس اهم شىء بالنسبه ليا ان تكون العربيه نضيفه مش ميتهانه و حالتها فعلا كويسه , و ياسلام لو فبريكه بالكامل و مش متخبطه .

بالمناسبه كان عندى سؤال ازاى اعرف ان العربيه مش مرشوشه ؟ اصل سعات بتكون العربيه مرشوشه بس مش باين عليها .

قطع الغيار تكون متوفره و سعرها فى الحنين , و هفضل العربيات الكامله باور ,زجاج , تاكييف .........

طيب دلوقتى انا رسيت على 3 عربيات دايو , لنسر 99 , اكسنت

عايز بردو اعرف رائيكم !!!!!

انا هتابع الموضوع ده لحد ما اشترى العربيه بائذن الله , و شكر على كل مساعده.

**mohamed2002** · 19-06-2008 12:57 AM

ممكن تشوف
تويوتا عيون
لانسر 99
لانوس
اكسنت
فيرنا
كليو
خد سمكري امين معاك ويكون مصدر ثقة ,تمهل وانت بتتدور
العربية اللي فاتت فيها 4 توكيلات يعني حاجة مش لذيذة وكمان عدادها واقف ,يبقي مش لقطه
بالتوفيق ان شاء الله

**mokelanos** · 19-06-2008 01:19 AM

من خلال خبرتى فى السوق أول سؤال تساله للبائع هى فيها ورق لو فيها اعمل مارشيدير على طول لأن ده حيبقى تاجر وعاوز يعمل كام الف منك
ثانيا صعب عليك تعرف ان العربيه مرشوشه لكن لو شفت عربيه زيرو وشفت بعدها عربيه مرشوشه حتقدر تعرف الفرق
تانى حاجه تسأل صاحبها هيا العربيه مرشوشه فين بالظبط وتصر على الكلام ده وتقوله مش معقول يكون الموديل ده مش مرشوش وتشوف رد فعله وتقوله لو كنت صادق بالنسبه للرش والموتور نروح البنزينه ونكشف عليها لو طلع كلامك مش صحيح حاخد منك اجره الكشف وبلاش حكايه السمكرى دى
حيسربعك وممكن يلبسك فى الحيط البنزينه أضمن
بس بلاش اى عربيه فيها توكيل وبلاش اوتوماتيك
وان شاء الله ربنا يوفقك فى عربيه لقطه

**halfangel** · 19-06-2008 01:54 AM

المشاركة الأصلية كتبت بواسطة mohamed2002

خد سمكري امين معاك ويكون مصدر ثقة ,تمهل وانت بتتدور
العربية اللي فاتت فيها 4 توكيلات يعني حاجة مش لذيذة وكمان عدادها واقف ,يبقي مش لقطه
بالتوفيق ان شاء الله

بالنسبه للسمكريه صعب تلاقى واحد سمكرى امين معظمهم تلاقيهم عايزينك تشترى اى حاجه وخلاص علشان يروح الورشه و يهبر منك اد كده.

من خلال خبرتى فى السوق أول سؤال تساله للبائع هى فيها ورق لو فيها اعمل مارشيدير على طول لأن ده حيبقى تاجر وعاوز يعمل كام الف منك

لو تلاحظ فى السوق بيكون مليان تجار و مبيشتروش اى حاجه الا اللقطه و انا بصراحه عندى ان تاجر يسرقنى فى الف ولا الف و نص بس اخد حاجه نضيفه
مش اخد عربيه من واحد مش تاجر و اصرف عليها اد كده.

شكرا يا رجاله على المساعده و انا فى انتظار نصائح اكثر بالنسبه لنزولى السوق
للعلم انا قراءت الموضوع المثبت نصائح شراء سياره .

**mohamed2002** · 19-06-2008 01:58 AM

المشاركة الأصلية كتبت بواسطة halfangel

بالنسبه للسمكريه صعب تلاقى واحد سمكرى امين معظمهم تلاقيهم عايزينك تشترى اى حاجه وخلاص علشان يروح الورشه و يهبر منك اد كده.

لو تلاحظ فى السوق بيكون مليان تجار و مبيشتروش اى حاجه الا اللقطه و انا بصراحه عندى ان تاجر يسرقنى فى الف ولا الف و نص بس اخد حاجه نضيفه
مش اخد عربيه من واحد مش تاجر و اصرف عليها اد كده.

شكرا يا رجاله على المساعده و انا فى انتظار نصائح اكثر بالنسبه لنزولى السوق
للعلم انا قراءت الموضوع المثبت نصائح شراء سياره .

هوة اكيد لو ليك تعامل مع سمكري معين ثابت انت واصدقائك حيعمل اعتبار للمعرفة ,بالتوفيق ان شاء الله

**kh_talaat** · 19-06-2008 09:12 AM

ولو إني مش برجح حكاية السوق دي عشان حصل معايا مواقف ومع أصحابي مش مجال لذكرها ، ولكن عايز أقولك فتح عينيك كويس ومتتسرعش

وبالنسبة لموضوع العربية مرشوشة ولا لاء ، في بعض محطات البنزين جهاز صغير قد الولاعة كدة بيكشفوا بية على الدوكو إذا كان مرشوش ولا لاء ، وفكرتة إن الدوكو الأصلي للسيارة لا يوجد تحتة معجون بعكس العربية المرشوشة بتبقى واخدة طبقة معجون تحت الدوكو ، وبوضع الجهاز على جسم السيارة
ينور أخضر لو فابريقة
بينور أحمر لو واخدة معجون كتير
بينور برتقالي لو واخد معجون قليل ( رش نظافة يعني )

**mohamed2002** · 19-06-2008 10:21 AM

المشاركة الأصلية كتبت بواسطة kh_talaat

ولو إني مش برجح حكاية السوق دي عشان حصل معايا مواقف ومع أصحابي مش مجال لذكرها ، ولكن عايز أقولك فتح عينيك كويس ومتتسرعش

وبالنسبة لموضوع العربية مرشوشة ولا لاء ، في بعض محطات البنزين جهاز صغير قد الولاعة كدة بيكشفوا بية على الدوكو إذا كان مرشوش ولا لاء ، وفكرتة إن الدوكو الأصلي للسيارة لا يوجد تحتة معجون بعكس العربية المرشوشة بتبقى واخدة طبقة معجون تحت الدوكو ، وبوضع الجهاز على جسم السيارة
ينور أخضر لو فابريقة
بينور أحمر لو واخدة معجون كتير
بينور برتقالي لو واخد معجون قليل ( رش نظافة يعني )

دة جامد اوي الجهاز دة وانا اول مرة اسمع عنه ,ممكن سعر الكشف بيه ؟هل بيتباع؟