الموضوع: هابيع عربيتي الفيكترا ايه موديل ٩٥ اوتوماتك

طيّب

انا قرّرت ابيع عربيتي اللي بقالها معايا سنة و نص
العربية دي انا كنت اشتريتها مستعملة بعد الثورة على طول
العربية فابريكا دواخل، و لمّا اشتريتها كان العدّاد عامل حوالي ٩٠ الف كيلو (ماعرفش ده حقيقي ولا ملعوب فيه)
و كان سعرها ٣٩ الف جنيه
و التكييف وقتها كان بايظ

انا مشيت بيها حوالي ١٥ الف كيلو، غيرت فيهم الحاجات دي على فترات مختلفة:
١. جبت ٤ فرد كاوتش فايرستون من التوكيل (كانوا بحوالي ١٨٠٠ جنيه)
٢. ركبت كاسيت باناسونك بألف جنيه
٣. غيّرت دورة التبريد كاملة: راديتير (غيّرته مرّتين، آخر مرّه كانت من شهرين)، طرمبة، خراطيم، فيوزات المروحة، السبيكة اللي جنب الموتور، ...
٤. غيّرت كل حاجة تقريبا في التكييف ماعدا الكمبريسور (دفعت فيه حوالي ٤ آلاف جنيه)
٥. مليت وش السلندر مرّتين و غيّرت الجوانات، آخر مرّه كانت من شهرين تقريبا
٦. غيّرت العفشة بالكامل قدّام وورا (مساعدين امامي و خلفي، طنابير، تيول، ...)
٧. غيّرت ماستر الفرامل و معايا سرفو استبن في الشنطة
٨. غيّرت الماف (دفعت فيه ١٢٠٠ جنيه)
٩. غيّرت قواعد الموتور و السيور و حاجات كتير في الموتور

ده غير طبعا الحاجات التانية الاستهلاكية اللي اتغيّرت في النص
و الحاجات اللي انا عملتها و نسيتها

يعني على طول ايدي كانت في العربية و كنت باتلكك لأي حاجة عشان اغيّرها
بس من شهرين كده بدأت اتزنق في الفلوس عشان توضيب المحل
فا بطّلت اصرف عليها

هي حاليا عايزة التالي:
١. لمّا بدوّرها الصبح و اجيب الدي
بتفضل مموّرة ٥ ثواني كده بعد كده الفتيس يلقط
الحكاية دي بتحصل الصبح بس، و بتروح لوحدها بعد اقل من دقيقة
من اسبوعين الفتيس نوّر
روحت لليسر حطّوها على الجهار، قال لي عايزه فتيس
مجرّد ما بطّلت و دوّرت مشيت عادي و الفتيس اشتغل
فا انا ماعرفش عايزه فتيس فعلا ولا ده فتي صنايعية
ماسألتش حد بعديه
٢. الموتور جايب زيت، و فيه كتمة مش عارف سببها ايه
غالبا الكتمة هاتروح لو حطّيتلها بوجيها بيرو ٣ شمعة، بس مفيّاش دماغ ولا معايا فلوس للالعاب دي دلوقتي
٣. الميّة بتنقص، مش عارف منين (و مش عايز اعرف)، بس طول ما فيها ميّة مابتسخنش خالص حتى لو التكييف شغال
٤. البربريز فيه شروخ و نقرات و محتاج يتغيّر
٥. مفتاح الازاز الكهرباء بتاع شباك السواق باظ، فا حوّلت الشباك خلّيته يشتغل على مفتاح اللي ورا يمين
٦. فيها خبطات بسيطة، بس الدهان اللي عليها شغال

يعني اعتقد الحاجة الاساسية اللي فيها دلوقتي هو موضوع الفتيس
ده لو فعلا عايزه فتيس جديد (تمنه حوالي ٣٠٠٠ جنيه)

التكييف بتاعها شغال و كويّس
و الدواخل كلها فابريقة
و الشاسيه سليم (على حد علمي)

السعر النهائي اللي انا عايز ابيع بيه هو نفس السعر اللي اشتريتها بيه
يعني ٣٩ الف جنيه
و معنديش استعداد انزّل اي فلوس عن كده، لإن انا اصلا خلال سنة و نص صرفت عليها فوق ال٢٥ الف جنيه
يعني مكلفاني حوالي ٦٥ الف جنيه

انا بابيعها عشان ماعيش فلوس اليومين دول اصرف عليها
و زهقت اصلا من الصرف عليها

فا هابيعها و امشي بعربية مراتي كام شهر
لحد ما العملية تمشي و اجيب عربية حالتها احسن من كده ان شاء الله
لو ماجبتليش السعر ده، هاسيبها في الجراج لحد ما يبقى معايا فلوس اصلّحها

على فكره اي عربية مستعملة بيبقى اكيد فيها عيوب
الفرق بس في دي ان عيوبها انا كاتبها بصراحة، عشان مابقاش غشّيت حد

اللي عايز يشوفها في اي وقت
انا بابقى في المحل في المعادي الجديدة كل يوم من ١٢ الضهر ل ١٠ بالليل