الموضوع: مـــركــز مــنصـــور bmwمــميـــزات وعـــــيوب بالصـــــور

السلأم عليكم ورحمة الله وبركاته
شوفوا ياجماعة الموضوع ده انا عمله عشان الناس تستفاد منه وكمان عشان يزودوا عليه وكل واحد يكتب ايه اللى شافه كويس وعجبه فى مركز منصور , وأيه اللى شافه وحش ومش عاجبه , وكمان ياريت يكتب دفع كام مصنعية عشان الأشتغالأت وعشان الناس تبقى بردوا عارفة سعر المصنعية بيلعب فى كام

بسم الله نبدأ الحوار ..
أنا كان عندى مشكلة فى العفشة وكمان كان عندى العربية بتسخن
رحت مركز منصور الساعة 3العصر وخلصت الساعة 10 بالليل , كشف عليها واحد صنيعي عنده أسمه كارم وخدوا بالكم من الأسم ده كويس وجه بعدها واحد تانى أعطانى ورقة عشان أكتب بينات العربية فيها لأن هما بيعملوا لها ملف على الكمبيوتر للمتابعة
المميزات :
1- تم الكشف على العربية من الصنيعي وجه منصور شافها وأتاكد من كلأم الصنيعي أن الحاجات دي لأزم تتغير وحدد المصنعية
2- بعد العربية ما خلصت والصنيعي ركٌب كل حاجة , جه منصور ونام تحت العربية وقعد يراجع على شغل الصنيعي ويربط كل حاجة بنفسه تانى ودي حاجة كويسة جداً بتخلي الصنيعي ما يعكش لأنه عارف أنه هايتراجع على شغله من الأسطى الكبير

العيوب :
1- أولأً المقابلة مش حلوة خالص سواء من منصور أو من الصنيعية , يعنى تحس كده أنك رايح تصلح عندهم 128 وأنك جيت فى مكان غلط
2- مفيش مكان ممكن تقعد فيه وتستريح أثناء الشغل اللى بيتم فى العربية فبتكون النتيجة أنك بتفضل أنت والعربية مرمى فى الشارع بالساعات
3- منصور ماعندوش قطع غيار خالص وكمان مفيش جانبه محلأت بتبيع قطع غيار البى أم غير محل واحد بس , والصنيعي اللى أسمه كارم عند منصور بيكلمهم على التليفون عشان يظبط عمولته معاهم, وطبيعي أن أنت الزبون اللى بتحاسب على المشاريب كلها وبتشيل الليلة , والله وأعلم هل قطع الغيار اللى فى المحل ده أصلية ولأ مضروبة وبتتباع على أنها أصلية ومحطوطة فى علب بتاعت الأصلى.
4- منصور سايب الصنيعية يقطعوا فى الزبون وبصراحة أسلوب الصنيعي اللى أسمه كارم ده مقرف وبتاع أشتغالأت كتير وطماع , وكل شوية أدي ياباشا الواد عشرين جنيه عشان يروح يركٌب الجلب , أدى الواد 70 جنيه حق التركيب , هات 20 جنيه عشان نلحم الطاسة اللى وراء الطنابير ونفك المسمارين اللى فيها, خد أتصللي بالرقم ده من موبايلك
5- منصور ماعندوش مكن لتركيب البطاحات والجلب وديه حاجة بتخليك لعبة فى أيد الصنيعية وسبوبة ليهم عشان يشتغلوك

الخلأصة : أنا ماستريحتش عندهم وأعتقد أن منصور لو هاتروح له فيبقى تشيله للحاجة التقيلة أوى فى الميكانيكة يعنى اللى عاوزة شغل وحرفنة لأنه واضح أنه فاهم, لكن لو هاتركٌب عفشة زي انا ماعملت , فمن رأي تروح تجيب حاجتك كلها من عمرو النشار فى الحرفين وهو تاجر له أسمه وبيتاجر فى الجديد والأصلى وبعدين تأخد الحاجة دي وتركبها عند أى عفشجى محترم.
بالنسبة لموضوع السخونية اللى كانت فى العربية عندي ,فالصانيعي معملش فيها حاجة لأنه خد وقت كتير فى العفشة وقال لى تعالة بكرة وأحنا نكمل ,, أتضح لى بعدها وأنا فى الحرفين أثناء ما كنت بشترى مروحة للتكيف أن الريداتير ملحوم من الجنب ومسمار الهواء ممسوح وبايظ ,وكمان قميص مروحة الموتور مكسور من تحت وكمان مروحة الكالتش اللى بتبرد الموتور مكسور منها ريشة , تم تبديل كل هذه الأشياء بأخرى جديدة والحمد لله أتحلت المشكلة ومفيش سخونية خالص .
أنا ياجماعة كتبت رأئى بمنتهى الأمانة والحيادية , وياريت كل واحد أتعامل مع منصور يكتب رأيه ويقول دفع كام
أنا على فكرة دفعت مصنعية عفشة150 جنيه ولكن مع الأشتغالأت الأخرى فالمجموع 280 جنيه
والله وأعلم

نشوف بقى الصور والعربية فى الأنعاش

فـــرخة والأســـطى كـــــــــارم













وده الأسطى كارم

تم بحمد الله