الموضوع: مــشــــــــــاكــل وطريـــــقة حلــــــــــها مــــــــع e36

أشكرك يا أستاذ محمد على مشاركتك وعلى أنك أول من رد على أستفساراتى وفى أنتظار مشاركات ورد باقى الأعضاء عشان تعم الفائدة على الجميع .
1- بالنسبة للفتيس هو مانيوال عندي , وأنا بسبب أنى كنت واخد على التويوتا من قبل وبسبب أنى أول مرة أركب بى أم وكمان معرفش حد معاه نفس الموديل زى اللى معايا فمش قادر أحكم هل ديه طبيعة الفتيس ولأ عندي زيادة شوية , ويمكن يكون الفتيس كويس بس الزيت اللى محطوط له لزوجته تقيلة وماينسبهوش لأنى زى ما قلت بيبقى تقيل الصبح لكن بعد المشى والجرى النقلأت بتخفف , وأنا كنت عاوز أعرف أيه أحسن نوع أقدر أستخدمه فى زيوت فتيس ال e36 , على فكرة هى فيها زيت موبيل بتاع الفتيس

2-بالنسبة للكارونة , فى واحد بتاع قطع غيار فى الحرفين قال لى ان عنده كارونة بتاعت موديل 98 بس بصراحة معرفش رقمها كام , وأنا على فكرة يهمنى التوب سبيد أكتر من الطلعة السريعة لأنى بسافر كتير , فتنصحنى يبقى رقمها كام
3- بالنسبة للمساعدين والبطاحات اللى وره فأنا بصراحة ما كنتش كشفت عليهم من يوم ما جبت العربية مع أنى غيرت العفشة اللى قدام كلها بالكامل لأكن أن شاء الله هافك الفرش اللى وره وأشوف وأقولك , بس كلأمك فعلأ مقنع وهى شكلها كده زى ما أنت ما قلت أن البطاحات عاوزة تتغير, أما الراجل صاحبها اللى قبلى فربنا يديله على قد نيته لأنه بصراحة غشنى ومش هأقول فيه أكتر من كده
4- طب الشكمان دلوقتى أنا سمعت أن فى نوع بعلبة البيئة ونوع عادى ,, أنهوا نوع أحسن وهل الشكمان بيتجاب جديد ولأ أستيراد وتقريباً كده سعره كام , وهل يمشى مع مكنة M43 1800 لأنى ناوى أن شاء الله أبقى أسقط المكنة دي بس أدام شوية مش دلوقتى
وأشكرك مرة أخرى يا أستاذ محمد وأنا فى أنتظار الرد

يا جماعة محتاجين تعليقاتكم ومشاركاتكم لأن الواحد عنده مشاكل كتير و لما بيتصرف من دماغى بترجعوا تقولوا أنت ما سألتش وكان لأزم تسأل يا كبير قبل ما تتصرف .. ..please help meeeeeeeeee

السلام عليكم معلش هسأل سوأل فى النص كدا بعد اذن صاحب الموضوع طبعا

هوا ينفع احول فتيس مكنه 20 او 18 من مانيوال الى فتيس اوتوماتيك ... يعنى مثلا انا اشتريت بى ام 320 مانيوال ينفع احولها اوتوماتيك

وهحتاج اغير ايه ساعتها والتكلفه الإجماليه هتكون كام ( حوالى كام مش مهم رقم بالظبط ) ..

وشكراااااا

المشاركة الأصلية كتبت بواسطة m000dy

ه
2- الكرونه مادام ونت يبقى لازم تتغير والاحسن انك تشوف طلبك فى الكرونه هايبقى ايه لان الكرونات بارقام وكل رقم بيدى اداء مختلف يعنى لو بتحب طلعه سريعه لكن ممكن تستغنى عن التوب سبيد العالى يبقى هاتها كرونه برقم صغير لو يهمك التوب سبيد ومش مشكلة سرعة التجميع فى الطلعه يبقى هات كرونه رقمه عالى

هوا بس أكيد انتا اتلخبطت لأن العكس هوا الصحيح
طلعة سريعة= رقم كبير
توب سبيد = رقم صغير
و للمرة المليون يا جماعة قطع غيار ال m43 , m44 فيها حاجات كتير مشتركة متسمعش كلام الميكانيكي :-)

المشاركة الأصلية كتبت بواسطة minicooper20

باشا انتا مش كنت لسه عامل موضوع لبيع العربيه دى بس حضرتك مظكرتش كل الحاجات دى

أهلأ وسهلأ بحضرتك ونورت الموضوع , وأنا فعلأ كنت عامل موضوع لبيع العربية دي ولغيته لأنها جابت لى 64000 بس فى حين أنى كنت صارف عليها أكتر من كده وكنت طالب 66000,, ولو تقدر حضرتك ترجع للموضوع فى قسم بيع المستعمل هتلأقى أنى كتبت أن السعر نزل 1500 جنيه لأن ظهر فيها كرونة ..فى حين أن ثمن الكرونة أصلأ 450 جنيه موديل 98 ,, يعنى أنا منزل بزيادة .. باقى الحاجات اللى أنا كاتبها لأتعيب العربية فى شىء لأنى أنا بصراحة موسوس جدأأأأأأأأأأأأ ومبحبش العربية يبقى فيها غلطة وأنا كتبت أنى كنت واخد على سواقت التويوتا وطبعاً بتبقى ناعمة جدا فعشان كده لسة مش مستريح مع نقلأت البى أم اللى بتتميز بنوع من الخشونة نوعا ما بالمقارنة طبعا باليابانى وبكدة كنت بسأل أيه أحسن نوع زيت فتيس لكن ده لأيعنى أن الفتيس وحش .. بالنسبة للشكمان لأيسبب معى أى مشاكل خالص ولكن لأنى ساكن فى جنوب سيناء وهناك مفيش قطع غيار بى أم وأخاف طبعا أنى أحتاس هناك لو حصل حاجة فقررت أنى أشيله وأركب غيره ده طبعاً بعد نصيحة الأخوة الأعضاء لية بتغير كل القديم بجديد .. وبالنسبة للبارومة أقسم بالله العظيم أنها حتت صغيرة لأ تذكر يعملها أى سمكرى بمبلغ 100 جنيه فأنا ماكنتش عاوز أبدأ فى أى حاجة تانى عشان متفتحش معايا فى مصاريف وأرجع أكرر تانى نفس المصاريف فى حالة لو هاغير موتور بستة سليندر وما يتبعه من عفشة وغيره.. أما كحالة عامة للعربية فقد تم معاينتها من أكثر من واحد وتم تحديد ما بها ووصلت لمبلغ 64000 وعشان كده أنا قررت أخليها معايا ..أرجو ان تتقبل تحياتى