الموضوع: عربيتى بتجيب زيت مش عارف منين ؟؟

السلام عليكم

خلينا نرجع لاخر صيانة انت عملتها هل كان قبلها في تسريب زيت ولا لأ حضرتك قلت انك عملت شغل في وش السلندر هل العربية سخنت وجابت وش سلندر وغيرت الجوان ؟ هل الوش اتفك بدون ما يبرد المحرك بالوقت الكافي؟ ولو دة حصل ممكن يكون في تقفيعة في وش السلندر ومش مطبع صح مع جوان غطاء التكيهات او جوان غطاء التكيهات متاكل او مش مربوط صح

اماكن تسريب الزيت
لمعرفة مكان التسريب لابد من غسيل المحرك بالماء والصابون جيدا ولاحظ ان تسريب الزيت يظهر لما درجة حرارة المحرك ترتفع ومبيبنش والمحرك بارد ولا عند السلانسية دة لو كان التسريب بسيط اما لو التسرب عالي ممكن يبان. يعني حضرتك تغسل المحرك كويس وتمشي بالعربية مشوار مع ملاحظة مستوي الزيت بالكارتير ثم تقف وتفحص جميع اجزاء المحرك ووصلات الزيت جيدا وبعناية هتلاقي في تنشيع زيت في اماكن وتسريب في اماكن اخري

الاماكن المحتمل تسريب الزيت منها
اولا المحرك
1- جوان غطاء التكيه.
2-جوان كارتير المحرك. لاحظ ان لو خامة خوان الكارتير مش جيدة هيسرب زيت
3-طبة تصفية زيت الكارتير
4-اويل سيل عامود الكرنك.
5-ممكن لو تعرف تبص من حول غطاء وش سير التقسيمة لو لقيت زيت نازل منة ممكن يكون اويل سيل خاص باحد اعمدة الادارة.
6-فلتر الزيت لو بة فرق ضغط عالي نتيجة رواسب بالزيت او مش مربوط صح او جوان فلتر الزيت تالف.
7- حساس ضغط الزيت مش مربوط كويس.

ثانيا الجيربوكس
ممكن من موانع تسؤيب الجيربوكس

ثالثا الفرامل
بص علي قربة تزويد زيت الفرامل بها تسريب او في تنشيع زيت او وحدة تعزيز قوة الفرامل ودة طبعا هيبان معاك مع فرملتك علي دواسة الفرامل

رابعا الباور
لو العربية بها باور بضغط الزيت ممكن موانع التسريب تسرب من الاسطوانة او خراطيم الباور او طلمبة الباور ولاحظ دة هتعرفة لما الدريكسيون يتقل معاك و هيكون هنا الدريكسيون بيتحرك ميكانيكيا بدون باور.

حضرتك قلت حاجة غريبة الميكانيكي قللك بعد فترة تيجي تاخد رباط علي مسامير وش السلندر هو لو كان رابط المسامير بترتيب الرباط والعزم المنصوص علية من قبل المصنع وجة بيكون بدراع عزم مش بالفهلوة لو العزم اقل او ازيد من الازم غلط ولابد كان يشوف استقامة وش السلندر ولو فيه تقفيعة ولو بسيطة لازم يمسح وش السلندر ويعيد تطبيعة مع بلوك المحرك.

اسف عل الاطالة وشكرا