الموضوع: ميجان 2005 -2008

ربنا يوفقك ان شاء الله .هي اليجان عربيه كويسه و الحمدالله انا لسه مشتريها من كام شهر و جيبت موديل 2007 بالنسبه للصيانه انا بعملها في المعادي قريب اوي من الطريق الدائري و يعتبر مش بعيد او عن الهرم و موضوع السينسور ده عادي و متخليش حد يخوفك منه اما قطع الغيار في هي في المعقول بالنسبه للعربيات الحديثه يعني انا كان معايا نوبيرا ولما غيرت محستش بفرق كبير بس طبعا انا مش بشتري من التوكيل انا بجيب الاصلي بس من بره فاكيد هيفرق كتير .ومن اللي انا اعرفه هات موديل 2007 او 2008 احسن الناس كلها بتشكر فيهم و علي فكره في مواضيع كتيره عن قطع الغيار ممكن تشوفها و تقارن و مثلا انا غيرت تيل الفرامل المامي ب 250 و الراجل اخد 25 جنيه تركيب هو اكيد اغلي من العربيه القديمه بس مش بكتير وربنا يوفقك

معايا ميجان 2007 وبرغم الإشاعات على العربية دى وبعدى عن مراكز الصيانة من المنيا أنا ومع ذلك فضلت الميجان مستعملة على لانسر وكورولا وإلنترا زيرو !!!!!!!! مبدئيا أنا شفت العربية دى لأول مرة سنة 2006 كان لونها فيرانى وعدت وإتعلقت بيها جامد وخصوصا شكلها وقتها كان جامد وما زال برضه المهم بعد بحث كتير فى مستعمل سعره غالى زى اللانسر والكورولا وبين جديد سعره مبالغ فيه بالنسبة للقيمة اللى هاخدها قلت أشوف الميجان دى اللى أنا ناسيها دورت على مواقع البيع زى كونتاكت وغيره وغيره لقيت سعرها مش عالى ومكنتش لسة أعرف إمكانيات العربية وكمالياتها غير لما بحثت على جووجل لمزيد من المعرفة وجووجل رمانى فى المنتدى دا قسم رينو ولقيت التعاون الرائع بين أعضاؤه ملهوش مثيل دايما تلاقى قسم الرينو الأعضاء الموجودون فيه بيشاهدوا مواضيع فى الوقت الحالى أكتر من أى قسم تانى للسيارات المهم اكتشفت امكانياتها وقرأت عن أعطالها كتير تقريبا عرفت كل حاجة فيها اكتشفت انها عربية أكتر من اللى فى بالى واشترتها بالفعل والعربية اعتمادية جدا والتكنولوجيا اللى فيها مش معقدة ولا حاجة عادية جدا المشكلة فينا أحنا مش فى العربية العيب الوحيد اللى مش بعتبره عيب فى موديل 2005 و 2006 يقال إن الفتيس كان فيه نتشة وراحوا التوكيل وغيروا السيستم بتاعه وبقى عادى يعنى مش عيب ولا حاجة غير كدا العربية وبالنسبة للشكل ميجان 2 اللى انت بتتكلم عليها مفيش اختلافات جوهرية فيها كلها زى بعض بس الفرق إن موديلات 2005 وأغلب 2006 شكل وفى نهاية 2006 نزلت الشكل الجديد الاختلاف فى الشبكة الأمامية والفوانيس واختلاف بسيط فى الفانوس الخلفى للعلم أنا حبيت الميجان بالشكل القديم برضه جامدة لأن التصميم واحد والإضاءة للتابلوه وشاشة المعلومات إتغيرت من أحمر لأبيض فى 2007 نزلت بمثبت سرعة اختيار أساسى فى كل الفئات والعربية دى فى وقتها كانت أحسن عربية فى فئتها وحاليا بالنسبة لى أحسن من أى عربية فى فئتها برضه و2008 و 2009 اختلافات طفيفة فى الإكصدام الأمامى لذلك بعتبر ميجان 2 من وقت ما نزلت 2005 لحد ما نزلت الميجان 3 هى هى نفس العربية بل وميجان 3 سألت وقالولى إنها نفس فتيس ميجان 2 لكن الميجان 3 هاتش باك فقط عكس ميجان 2 نزل منها هاتش باك وسيدان

العربية قطع غيارها متوسطة على حسب اللى قرأته هنا برا التوكيل لكن جوا التوكيل أغلى وفيه منها إستيراد وجديد ومحلات كتير فى القاهرة بتبيع قطع غيارها متقلقش خالص من الناحية دى لكنها مش رخيصة قوى زى اللانوس مثلا لأن العربية فئة أعلى وأنا ركبت العربية دى أوتو لكن حاسس إنى لو ركبتها مانيوال كنت هحس بعزم أعلى خصوصا فى الطلعة الميجان فى طلعتها تحس إنها مكتومة شوية بس بعد ما تسحب شوية هتلاقى العربية استجابتها للسرعة قوى وأنا شايف إن دا حال معظم الأوتوماتيك

مشكورين جدا على الردود

خليك فى كريستالتك احسن

المشاركة الأصلية كتبت بواسطة shawkylotfy

خليك فى كريستالتك احسن

أحسن فى إيه

الكريستالة مع مراتى و انا معايا لانسر 2008 سبورت و لو جبت ميجان هاخدها و ادى مراتى اللانسر لان الميجان اكيد عاوزة مراعاة فى الاستعمال