عملت حادثة بسبب المطبات الجميلة !! الحمد لله

**Ahmod** · 06-07-2012 09:45 PM

السلام عليكم ورحمة الله وبركاته

من فترة كنت كتبت موضوع عن المطبات الجديدة اللى اتعملت على الصحراوي بعد بوابة القاهرة وانت في اتجاهك لميدان الرماية

المطبات دي جديدة وللاسف مافيش قبلها اي تنبيه والمكان مافيش فيه اي انارة

وللاسف في كل مرة بعدي من عندها لازم الاقي عربيتين تلاتة خبطين في بعض

النهاردة الحاج قال هعزمكو على الغداء في داندي مول بمناسبة اني اتخرجت

واحنا راجعين وعند احد المطبات مهدي وباخد المطب بدون اي مشكلة

وفجاءة بووووووووووم من ورا عربية مرسيدس قديمة اعتقد الزلموكة

دخلت فيا من ورة

ركنت على جمب اطمنت على والدتي واختي لان كانو قاعدين في الكنبة اللى ورا

اتخبطو في راسهم بس الحمد لله جت بسيطة

نزلت اتاري المرسيدس كان مهدي بياخد المطب زيي ودخلت فيه عربية بيضا من ورا ماركزتش معاها من الموقف فمش عارف نوعها بصراحة

لما خبطت العربية دي فيه خلته يخبط فيا

المهم الراجل بتاع المرسيدس ماتكلمش مع صاحب العربية البيضاء نهائيا وقالي انا اللى خبطك وانا تحت امرك شوف انت عايز ايه

وانا لان العربية البيضاء ماجتش جمبي فمتكلمتش معاه لان ماليش دعوة بيه

صاحب المرسيدس قالي انا مش غلطان نهائيا انا اتخبطت من ورا ومن قدام بس برضوا بقولك اللى انت عايزه واعتبر ان انا اللى غلطان وانا تحت امرك وهتحمل كل حاجة

صاحب العربية البيضاء نزل بص على عربيته وقام واخد بعضه ومشي ولا اكنه خبط حد ولا اي حاجة

المهم يعني من هنا لهنا

صاحب المرسيدس قالي انا هوديلك العربية لسمكري وهتكلف بتصليحها وترجعلك زي الاول

الحاج مرضاش وقاله لا انت قدر تكلفة التصليح واحنا هنصلحها بمعرفتنا

قاله لا انا مادفش فلوس انا مش غلطان واللى خبطني من ورا هو اللى غلطان ! ؟

الحاجة قالتله مانت ماينفعش لما هو كان واقف تسيبه يمشي وماتتكلمش معاه وتقول انا اللى غلطان وهتحمل كل حاجة ولما يمشي تقول انا مش غلطان ؟؟

الوالد قاله خلاص اتوكل على الله وربنا يعوض عليك وعلينا

الراجل رفض لا ماينفعش شوفو اللى انتو عايزينو وانا هصلحلك العربية

المهم نهاية الموضوع راح مطلع 200 جنيه وقالي اتفضل بس المهم تكون مسامح

طبعا انا قلتله 200 جنيه مش هتعمل حاجة مقابل الخسائر اللى في العربية !!

الوالد راح قاله خلاص توكل على الله وحصل خير

الخسائر عندي في العربية :

الاكصدام اتكسر واطبق الى غير انه من قوة الخبطة خبط في الحتة الفولاذ اللى بتتجر منها العربية من ورا فالجزء الحديد ده دخل في الاكصدام وكسره الى غير انه من النص مطبق وداخل لجوة جامد ومن الشمال اتخلع

الشنطة اتعوجت ومابقتش تقفل وفيه خبطة وعوجة من الجمب الشمال

الفانوس اللى ورا طلع من مكانه من الخبطة بس الحمد لله انه ماتكسرش

الحمد لله انها جت على قد كدة وربنا يباركلنا في المحروسة والمطبات الجميلة اللى بتتعمل بدون اي وعي وبدون اي داعي ومن غير حتى اي اشارات او علامات تحذيرية

الواحد قبل مابيركب العربية لازم القرأن يشتغل وبقرأ كل الاذكار ودعاء الركوب والمعوذتين واية الكرسي

وبرضوا بتخبط الحمد لله على كل شئ قدر الله ماشاء فعل

الحمد لله انها جت على قد كدة وربنا يستر من اللى جاي

**ahmedjumpo** · 06-07-2012 10:12 PM

لا حول و لا قوة الا بالله
مش عارف ايه لازمة المطبات اللى عاملينها فى الطريق ده يعنى من كل المطبات ديه مافيش غير واحد عند الملف اللى عند جرانة هو اللى فعلا يستاهل

**S O P H O S** · 06-07-2012 10:31 PM

قدر الله وما شاء فعل
المهم انك بخير
وربنا يعوضك خير ان شاء الله
معلش الحمد الله علي سلامتكم

**MohammedAladel** · 06-07-2012 10:35 PM

معلش يا باشا هو التصرف الصحيح إن ال 3 كانوا يتفقوا مع بعض لكن إن واحد يمشى ويطنش كان مفروض تبلغوا فيه وبعدين الراجل كريم وغصب عنه ولو مكنش غصب عنه الذنب مش ذنبه لأن مطب ومحدش واخد باله وتقريبا مش بيبقى فيه إضاءة ولا حتى حتة إشارة ولا يلونوه بفوسفور يعنى المفروض تتقام دعوى ضد شرطة المروز عشان الإهمال بتاعهم ع الطريق الزراعى قدام بلدى فيه كنيسة فيه ناس كتير بتيجى تزور الكنيسة دى والطريق الزراعى ضيق طبعا كان كل يوم والتانى حادثة عربيات فى ناس وعربيات فى عربيات بعد المجازر اللى حصلت فى المنطقة دى وشفت بعينى مناظر مروعة من وأنا طفل لا يمكن أنساها وعندنا واحد مات كان طالع بعجلة من البلد وميكروباص جاى بسرعة شاله الله يرحمه ويدخله الجنة اللهم آمين المهم عملوا مطبات إستجابة لشكاوى الكنيسة ولكن لو مواطن عمل شكوى كانوا بيضربوا بيها عرض الحيط عملوا المطبات وسابوها كام يوم من غير إشارات ولا حاجة والحوادث بقت أكتر عربية نقل طارت ع الترعة طوالى !!!!!!!!!!!!!!! مش عارف أقول إيه دا غباء ولا إيه

**AhMeD MeTwAlY** · 06-07-2012 10:36 PM

لا اله الا الله
ربنا يعوض عليك
بس مش عارف عندي احساس ان صاحب العربيه البيضه وبتاع المرسيدس معرفه اصل صاحب العربيه المرسيدس مش هيعمل كدا من نفسه
ويمكن هو راجل محترم جدا جدا يأ اما معاه حاجه غلط
ثانيا دي نصيحه من اخ اصغر ليك انا جت فتره وكنت بلاحظ كلام حضرتك علي العربيه كتير وان حضرتك فرحان بيها اوي ميحسدش المال الا صحابه

**mode_dode90** · 06-07-2012 10:37 PM

الحمد لله علي انها جت علي اد كدة انا شوفت حجات غريبة في المطبات دي و شوفت حجات بطير ربنا يسترها علينا و علي الكل المهم امد ربنا و في دهيه الفلوس اعتبر ان انت عزمتهم عزومة تقيله شوية

وقدر الله و ماشاء فعل

**ma7med** · 06-07-2012 11:27 PM

الحمد لله على كل شىء وقدر الله وما شاء فعل

**minicooper20** · 06-07-2012 11:36 PM

فيداك لسه حصله معيا و ادينى بصلح

**BLOODY_STONE** · 06-07-2012 11:44 PM

الحمد لله جت سليمة و متقلقش خبطة بسيطة الحمد لله

كان حصلتلي مرة قبل كده خبطة زيها و الاكصدام اتكسر فعلا من الحديد اللي ورة اللي بتجر منه و الشنطه اتكبست سنه من جوه و اتصلحت عادي جدا ولا فيه اي مشكلة لا تقلق

و الف مبروك عالتخرج و متشيلش هم دي حاجة بسيطة ... انت ممكن تجيبلك اكصدام استعمال من الحرفيين في حدود 400 جنيه و ترش ب 150 و شوية سمكرة بمبلغ ان شاء الله بسيط ..

-

الموضوع: عملت حادثة بسبب المطبات الجميلة !! الحمد لله

LinkBack

أدوات الموضوع

عرض

-

-

-

-

المواضيع المتشابهه

الحمد لله عملت حادثة

الحمد لله على كل حال . عملت حادثة

الحمد لله - عملت حادثة

عملت حادثة الحمد لله

مش هاتصدقو اللى حصل عملت حادثة بسبب الاهمال

الكلمات الدلالية لهذا الموضوع

المفضلات

المفضلات

ضوابط المشاركة