الموضوع: عامود الكامة اتكسر تاني (أوبل كورسا سيدان)

يا جماعة أنا خلصت الموضوع امبارح .. و المشاركة كانت موجودة .. مش عارف راحت فين

مش معقول هكتب ده كله تاني

المشاركة الأصلية كتبت بواسطة haitham2011

الاعلانات طولت انا كده بدات انسي الحلقتين اللي فاتو

هههههههه هو بصراحه طريقه كلامه تشد وتخليك عايز تكمل باقي الاحداث :)

@kar!m
معلش يا كيمو قدر الله وماشاء فعل
انا بردو حصلي حاجات كتيييير وكنت لسه جايب العربيه بس الحمدلله
المشاركات فعلا كلها رجعت ل يومين فاتو مش عارف ازاي !

المهم حلمي أخد الهيد و راح للشيخ هيثم .. و قال له ان ولا وش الموبينة بتاع هيد الأوبل ولا بتاع الدايو راكب عليه .. عشان الهيد ده مافيهوش الأماكن اللي بيركب عليها الحديدة اللي تحت الموبينة دي.

فهيثم قاله طيب روح المخرطة و شوف كده اذا كان ينفع يعملوا للهيد ده اماكن اللي بيركب فيها مسامير وش الموبينة دي.

اللي عرفته ان الهيد بتاع الكورسا هو هو الهيد بتاع اللانوس .. و الهيد اللي جابه لي ممكن يكون بتاع تيجرا مثلا أو أي حاجه بتاعة GM .. بس بيختلف في في الحتة اللي الموبينة بتبات عليها دي.

ساعة كده و لقيت حلمي جه ياخد حاجه من الورشة و قال لي شغالين فيها في المخرطه .. قلت له طيب هاجي معاك .. أتفرج .. لقيتهم في المخرطه عملوا 3 حتت مدورة قد عقلة الصباع كده .. و عملوا فيها قلاووظ من النص عشان المسمار يربط فيها .. و فضلوا يزبطوا فيها و يقشطوا منها عشان تركب على الهيد.

خلصنا و خدوا في الموضوع ده 40 جنية.

بعد كده طلعنا على واحد بتاع لحام المونيوم عشان نلحم ال 3 حتت دول في الهيد .. لحمهم و أخد 50 جنية.

رجعنا على الورشة و بدأ حلمي يقفل تاني .. كانت الساعة 11:00 تقريبا .. قلت له انت كده في نفس اللحظة اللي كنا فيها من 3 ساعات سعهة ما كنا بنقفل .. و لقينا الهيد مش راكب.

المهم قفل .. و حط مياه .. و كبس المياه بحاجه زي منفاخ عجلة و فيه عداد زي بتاع ضغط الكاوتش .. و في الحالة دي مبياخدش الهوا عشان خلاص كبس المياه جوه الموتور.

دورنا العربية على الساعة 12:00 كده .. طبعا كانت عامله زي عربية الناموس .. دخان أبيض فظيع .. و صوت الموتور عالي .. لحد ما الكستبانات ملت زيت .. و صوت الموتور هدي خالص .. و الدخان راح .. طلعنا أنا و أمير (مدير الورشة) نجرب العربية.

جربت العربية في الحرفيين .. و طبعا مكنش في ولا محل فاتح .. و أمير عزمني على عصير قصب (أغلى كوباية قصب شربتها في حياتي ) .. و الحمد لله العربية تمام.

رجعنا على الورشة لساعة الحساب .. و الحساب كالتالي.

600 جنية هيد بالعامود بتاعه
40 + 50 جنية مخرطة و لحام (دول أنا حاسبت عليهم من الأول)
150 جنية 2 جوان وش سلندر
45 جنية جوان شكمان
40 جنية جوان وش التاكيهات
10 سيليكون
300 جنية مصنعية

يبقى 1250 جنية تقريبا

و قبلها

طقم بوجيهات 60 جنية
ميكانيكي اللي جالي على المحور 70 جنية
ونش من المحور للشيخ زايد 130 جنية
ونش من الشيخ زايد للحرفيين 300 جنية

يعنى 560 جنية

الاجمالي 560 + 1250 = 1800 جنية تقريبا.

و رجعت الزقازيق كانت الساعة 01:00 صباحا تقريبا .. و الازاز مكسور طبعا.

تاني يوم رحت ركبت الازاز اللي أنا كسرته ب 120 جنية.

و الحمد لله على كل شيء و كل سنة و انتم طيبين و رمضان كريم :-)

الحمدالله على كل شيء يا كريم.

ياااااااه دانا تعبتلك نفسيا ياخي, بس ربنا يعوض عليك خير ان شاء الله

قدر الله و ما شاء فعل و حمداً لله علي سلامتك