الموضوع: بالنسبه لتويوتا افنسيس

العربيه بتنزل مصر من ٢٠٠٥ بس بيعها ضعيف لأنها مانيوال وسعرها قريب من سعر عربيات اوتوماتيك وسعرها فى المستعمل رخيص جداً وهي عربيه ممتازه لو واحد بيركب مانيوال يبقي العربيه دى صفقه رابحه جداً وقطع غيارها نفسها بتاعت الكرولا ١٦٠٠ نفس المتور والفتيس وهى من العربيات غير مستهلكه لقطع الغيار زى كل تويوتا

هى فى المستعمل بتبتدى من ٨٠ والحاله بتحكم لو نضيفه بتزيد عن كده طبعاً والموديل وقطع الغيار عمتاً غاليه فى كل تيوتا لو اصلى ودي ملهاش غير اصلى يعنى مش هتلاقى تيوانى مثلاً واستيراد لازم تنزل وتسأل

المشاركة الأصلية كتبت بواسطة massoh

اخى الكريم ، العربية أكثر من ممتازة كسيارة عائلية وهى أصلا بتنزل فى التوكيل فقط سيارة صممت اساسا للسوق الأوروبى علشان الكامرى فى اوروبا ماكنتش عارفة تنافس وأحذت عدة جوائز فهى سيارة أوروبية بختم تويوتا اليابانى وإعتماديته وسهولة صيانته وتحمله......بس للأسف التوكيل قتلها من اول سنة نزلها سواء السعر او الدعاية لانه بينزل اقل فئة فيها وهى 1600 ودى مافيش منها اوتوماتك فى 1600 وبيدأ فقط من 1800 وطبعا سعرها حيعدى قوى لو نزلت مصر اوتوماتك (موتور 1600 + 1800 يصنع فى مصنع تويوتا انجلترا أما موتور 2000+2400 يصنع فى تويوتا بولندا ويجمع بأنجلترا).....موتورها وعفشتها لا يمتان بصلة لكرولا 1600 فهما موديل آخر تماما وقطع الغيار متوفرة وموفرة عمرها عمر اللى كان راكب فى المصنع (اوروبية الصنع يعنى مثلا تيل الفرامل امامى/خلفى صناعة بوش فرنسا وثمنهم 600/500 جنيه مصرى بالمصنعية والتركيب - نقص حوالى 100 مصنعية لو حتشترى وتركب بره) قطع الغيار الأساسية موجودة عند ملاحلات قطع الغيار اليابانى الكبيرة زى البرجسى .....سيارة تحفة بلا شك من كل النواحى لو عاوز تركب عربية مانويل ولكن عيبها الكبير انك صعب قوى لما تعوز تغيرها حتحتار تركب ايه بعدها (دى مشكلتى الأساسية الآن) ولن يقنعك حاجات كثير لانك حتحس انك بتنزل ومش حيغير رايك سوى ان تروح للأوروبى الكامل اللى بيزغل العيون وأستاذ الطريق (بالرغم من مغريات الأوروبى زى بى أم / مرسيدس حتواجه مشكلة ان حجمهم صغير/عفشة تفتح ما بتخلصش/سعر عالى جدا) النصيحة الأخيرة : اتكل على الله لو مش فارقة معاك موضوع المانويل واختار حاجة نظيفة واكشف عليها فى التوكيل

معلومات ممتازه ووافيه