الموضوع: سوقت هوندا سيفيك 2010 أمبارح وكانت المفاجأة

هي مسألة نسبية!!,
بس صعب أوي أي عربية هيونداي أو كوري عموماً تقرب من مستوى السيفيك الشكل ده, لا تسارع و لا ثبات و لا أي حاجة.. يمكن أه ككماليات الألنترا تكسب لكن غير كده مظنش!!..

انا مش مصدق والله ان فعلا في موضوع بيقارن الهونداي بل هوندا ! انتو بتتكلموا فايه ؟!! مكنه v-tec عربيه موديلان التسعينات و التمنينات لسه ليها سوق لحد دلوقتي عربيه فيها ثبات فوق ال10/10 عربيه تعتبر انضف حاجه فالياباني جاييين تقرنوها بالهيونداي عجبت لك يا زمن ! و في انتظار رد استاذ سامح :)

المشاركة الأصلية كتبت بواسطة حماده المصري

هو العزل في عربيات هيونداي اصبح ممتاز خصوصا انها تفوقت فعلا على لكزس في العزل في هيونداي ايككوس بس دي اغلى هيونداي دي لو في مصر هتعمل 800 الاف جنيه بالميت

بالنسبه للعربيات الي حضرتك بتقارنها سيفك والنترا

السفك مسوقتهاش بس ركبتها كزا مره ثباتها ومتورها اقوى من الكوري وفتيسها كمان

النترا 2012 ثباتها مش اد كده ولو في ناس بتقول انه حلو ف هو مش زي السيفيك خالص خالص خالص

الالنترا خاماتها معقوله والسيفيك مش هلاميه اوي بس التبلوه الي مش عاجبك ف هو خرافي ووهمي

الالنترا عفشتها مش ناعمه اوي والسيفيك عفشتها ناشفه جدا جدا وده بتصريح من هوندا انها متعمده تنشيف العفشه ده لصالح الثبات وال ار لين بتاعها كمان انشف بكتيييييييييييييييير ودي تصريحات هوندا

الخلاصه ان الكوري كويس بس لسه عنده مشاكل في ثبات العربيه وفتيسها وده لانها هي اليب بتصنع الفتيس وبتكنولوجي متسوبيشي كمان

انما معظم الياباني الفتيس بتاعه من شركات متخصصه في الفتيس عمرك ما تشوف ياباني بيشتكي من الفتيس تماما

انا لسه امبارح سايق النترا 2010 بصراحه عجبتني الي حد كبير بس كانت ايجار ومتهانه والفتيس بتاعها مش بيجيب p اساسا وكانت ماشيه زي الفل انا اساسا وحشتني ايام الكوري وبفكر اقلب الصني واجيب النترا الموديل 2010

بس مينفعتش اننا نظلم الياباني ف اكيدالسيفيك انضف من النترا ومش خساره كل مليم يتدفع فيها

وللعلم يعني الشركات الكوري دول ايام التمانينات والتسعينات ولحد كمان اول الالفينات كانوا يادوب بتوع كفته

انما الياباني من من التمانينات مقارن للالماني باسلوب بشع مش متخيله انت لو سافرت برا هتلاقي شويه عربيات من تويوتا وهوندا ونيسان موديلات قديمه وخراااااافيه فعلا وتقارن باالالماني


ف مستحيل بعد السنين دي كلها الشركات الكوري هتعدي عليها وتلاقي اليابانيين عربياتهم تعبانه والكوري معدي عليهم مستحييييييل تماما

اليابانيين معاهما اصول الصناعه ولو معرفوش يطوروا بينزلوا بالمضمون بتاعهم والاستاندر بتاعم ممتاز

انما الكوريين بصراحه يكفي اختراعات العفشه بتاعتهم الي بوزت طعم العربيه الجديده

متفق ومختلف في جزء لو تسمحلي أقولك أن دوام الحال من المحال أيام الفراعنة كنا أقوى حضارة في العالم وبعدها جم الرومان والفرس والحضارة الأسلامية يعني الدنيا دي متغيرة الحال ...

بالنسبة لموضوع أن اليابانيين معاهم أصول المهنة الكلام دة مينفعش يتقال دلوقتي شوف كيا وهيونداي بيجيبوا أشهر مصممين في العالم وبيصرفوا على التطوير أي نعم مش في نفس مستوى التقدم الأوروبي خاصة الألماني ولكنهم نجحوا في فترة صغيرة زي مابتقول بعد ماكانوا بيعملوا كفتة ووصلوا لخامس أكبر منتج للعالم في السيارات متفوقين على ماركات كتير منهم أوروبي وأمريكي .

شوف أنت الناس دي لما تقعد على نفس الريتم ده 10 سنين كمان هيبقى حالهم أيه .. الكوريين الجنوبيين لو تعرفهم وتعيش معاهم هتعرف أنهم ناس لا يقلوا بأي حال من الأحوال عن اليابانيين والأمريكيين في نظامهم وأحترامهم وتقديرهم للعمل وللحياة يبقى ليه ميتقدموش ؟

من شوية عملت نفس الحكاية بس بالعكس صاحب السيفيك هو اللي جرب الألنترا بطلب مني علشان نبقى حياديين تماماً وفي نقاط تانية أتكلمنا فيها مكنتش ذكرتها في المشاركة الرئيسية وأنطبعاته كانت كالتالي :

- ركب العربية وأنا متابعه هو متعود في السيفيك يرجع الكرسي للآخر على فكره هو قصير ورفيع اول لما ركب الألنترا فضل على نفس وضع الكرسي زي ماهو المهم سألته بقى أية نظام القعدة قالي أفضل طبعاً طلبت منه يرجع الكرسي للآخر وينزل يقعد ورا لقى العربية من ورا ممتازة فنزل قالي الوسع محسوم للألنترا .

- شغلنا الكاسيت وعليت لحد 15 بس قالي بس بس النظام الصوتي للألنترا أفضل بمراحل وده شيء واضح للي عاوز يجرب الأتنين ويقولي .

- بالنسبة لتابلوة السيفيك أنا مقولتش وحش هي أذواق يعني بالنسبالي بحب العدادات الكلاسيك العادية ومش هاضم فكرة الديجيتال بحس أني سايق كمبيوتر ولكن ده لا يمنع أنها فكرة جميلة ومتطورة وليها عشاقها وكمان شكلها حلو وأضائتها مبهرة وصاحب السيفيك حابب تابلوه الألنترا وشايف أنه متطور أكتر من الهوندا ولكنه حابب بردوا شكل تابلوه السيفيك .

- العزل أفضل في اللألنترا ( كلام صاحب السيفيك ) .

- العفشة أنعم ومريحة في الألنترا عن السيفيك ودي نقطة انا وهو متفقين عليها .

- الفرامل في السيفيك أفضل لوجود ebd ولكن الأختلاف بسيط ( كل ده كلام صاحب السيفيك ) .