الموضوع: أفضل موتور بولو

المشاركة الأصلية كتبت بواسطة Karim Ibiza

انت حظك حلو لأن حالتك زى حالتى بالضبط, انا معايا ابيزا 98 وكانت 1000 سي سي ولسه مغير الموتور من شهر تقريباوالموتور الجديد جيبته 1400 8 صباب وكمان انا من اسكندرية, يعنى هقولك على كل حاجة.

موتور عربيتك زى موتور عربيتى بالضبط بدون اى اختلاف

انا سقط موتور 1400 سي سي 8 صباب 60 حصان وده لان ال 16 صباب مش موجود كتير واستهلاكه فى البنزين اكتر من ال 8 صباب وقطع غيار ال 1400 8 صباب زى الموتور بتاعك القديم بالضبط فيما عادا طرمبة المياه مختلفة فى الحجم شوية, يعنى بمعنى اصح هتشيل ال 1000 وتسقط ال 1400 8 صباب بدون تغيير ضفيرة او شكمان او عفشة او فرامل او فتيس ولو حبيت كمان ممكن تشغله على الكونترول بتاع ال1000, يعنى ممكن تجيبه شورت بلوك وعلى نفس ادوات التغذية بتاعتك ده لو الميزانية محدودة لكن لو الماديات مش مشكلة يبقى نصيحة تجيب الموتور بحاجته كلها أحسن عشان يبقى كله عمر واحد.

أنا نزلت سألت عند بتوع قطع الغيار زى عدس فى سيدى بشر وفى صلاح الدين ولقيت ان كلهم سعر واحد تقريبا, الموتور بالضفيرة والكونترول بدون فتيس ب 2750 ولو بالفتيس يبقى 3200 ولو شورت بلوك حوالى 2250, وبصراحة انا الميزانية معايا كانت لاتسمح بالمبالغ دى لأنى كنت لسه شارى العربية قبلها باسبوعين ومكنتش عامل حسابى على موضوع الموتور ده (يعنى اتخميت فيها) بس الحمد لله ربنا عالم بالحال والنوايا وبالصدفة واحد صحبى معاه رينو 19 قالى انه كان جايب موتوره من واحد بيبيع بسعر الجملة لأنه هو الموزع الوحيد فى الاسكندرية وكل بتوع قطع الغيار بياخدو منه البضاعة, وقولتلو بس ده بتاع رينو, قالى ده شغال فى كل الاوروبى لانه بيسافر ايطاليا وبيجيب الشغل بنفسه بتاع قطع الغيار دة شغال فى المرسيدس ولا لا؟ ومواتير بس ولا بيجيب عربيات كاملة؟, قالى خد رقمه واتصل بيه مش هتخسر حاجة, وفعلا كلمته وقالى حاجتك موجوده, بس كان شرطه الوحيد ان الميكانيكى يجى يستلم معايا الموتور عشان المواتير دى بتكون غالبا شبه بعضها بس بتختلف فى القواعد حسب موديل عربيتك وكمان هو عشان مش متخصص فى ماركة معينة فهو مش حافظ انهى موتور يركب على انهى عربية, بس الحمد لله اقنعته بعد عناء طويل انى عارف المواتير اللى ممكن تركب عندى وانى حافظ الاكواد بتاعتها.

المهم عشان مطويلش عليك, لقيت عنده موتور بالفتيس والضفيرة والكونترول والعفشة والطنابير والفرامل والقنطرة وقاللى شيله كله وهديهولك ب 3000 جنيه !!!! طبعا ولا فى الاحلام بس للاسف مكنتش اقدر ادفع المبلغ ده وكمان القنطرة مينفعش تركب عندى عشان بتاعت بولو ودى الحاجة الوحيدة فى الفرق بين العفشة الامامية للابيزا والبولو, المهم اشتريت منه الموتور بالكونترول والضفيرة والفتيس والموتور كمان كان معاه طرمبة باور وورق الافراج الجمركى ب 2250 جنيه و طبعا على التجربة, بس مبدئيا عشان تطمن ان الموتور مش وحش, بتجيب مفتاح 19 وبتلف بيه الموتور عشان تتأكد انه مفيهوش عضة او عتلة وده حكم مبدئى والميكانيكى هو اللى هيقولك على الحكم النهائى.

ليه بأة انا مجبتش ميكانيكى معايا؟؟؟ لان الميكانيكى بتاعى هو هريسة وده اشهر واحد بيشتغل فى الفولكس فى اسكندرية ومش بيطلع برة ورشته, قاللى هاتلى الموتور عندى وانا اقولك حلو ولا ترجعه.

تسقيط الموتور خد منه يوم بالمرتاح, يعنى الولد اللى كان بيشتغل فى عربيتى كان بيسيبها وبيشتغل فى عربيات تانية, يعنى كان ممكن ياخد منه 4 ساعات متواصل (على فكرة انا مغيرتش الضفيرة) واخد منى 500 جنيه بالواجب, بس طبعا طول ماانت واقف تجيبله زيت عشان ينضف الموتور وسير تقسيمة وسير دينامو واى حاجة الموتور ممكن يكون محتاجها عشان يبقى شغل نضيف, يعنى العملية كلها دخلت فى 3000 جنيه.

نسيت اقولك على مكان الراجل بتاع قطع الغيار: الراجل اسمه يسرى عبد العال ومكانه فى القبارى عند موقف العامرية - القبارى

والموتور الكود بتاعه AEX والكونترول رقمه 030906027p وده 1400 سى سى 8 صباب 60 حصان عند 4700 لفة/دقيقة وهتحس بالفرق, بس لو انت عايز حاجة شديدة يبقى هتدخل فى ال 1600 أو اكتر وده الافضل انك تجيب نص بولو كامل وتفضيه كله عندك بكل مشتملاته من عفشة وشكمان وضفيرة وفتيس.........الخ وحتى طرمبة البنزين لان اى موتور اكبر من ال 1400 8صباب بيكون مختلف فى كل حاجة وده بيكون فى حدود 7500 الى 9000 جنيه.

وربنا يوفقك وانا تحت امرك فى اى سؤال واسف على الاطالة