الموضوع: العناصر الاساسيه لقياس تميز السياره

-الثبات اللي بيترتب عليه عفشه قويه
-قوه موتور و تسارعه
-الأعتماديه
-في حدود 100 ألف مفيش حاجه أقنعتني غير ال rb بس للأسف انا أشتريت من غير م أدور كويس لقيت ثبات مرعب في الأول بس اتعودت عليه الحمد لله

بس فكرت تاني لقيت أن مفيش غيره في الثمن:- ده معاك قوه موتور من غير تهور
-سهوله صيانه و انتشار و أنا أصلي كان عندي عقده من
حته الأنتشار دي
-شكل مقبول وتقفيل جيد مش ممتاز

----الباقي بالنسبه ليه مجرد كماليات عاديه و احتمال تلفها في العربيات المتوسطه عاليه ف الواحد ريح دماغه

أنا مع حضرتك فى التقييم دا و بالنسبة لل 100 ألف جنيه فعلا النهاردة متجبش عربية حلوة زيرو الواحد يدفعهم فى مستعمل بحالة نضيفة وحاجة أمكانيات أحسن ما أدفعهم فى عربية نص كم جديدة

مساء الخير ...بالنسبة للتقييم فانا مع تقسيم الاستاذ هاني وفعلا لو تابعنا اي حد بيقيم افضلية موديل سيارة علي الاخري وبعد اذن الاستاذ هاني في الاضافة دي بنجد الاتي
الموتور من ناحية القوة والعزم واستمرارية العزم لمدي دوران المحرك ونعومة وهدوء التشغيل واستهلاك الوقود وانبعاثات ثاني اكسيد الكربون
ناقل الحركة بانواعة ومدي سلاسة التعشيق ونسب التخفيض والتي كلما كانت السرعة السيارة اعلي بالمقارنة للفات المحرك بيبقي افضل بمعني لو عندي عربية بتجري علي 100 وrpmعلي 3500 لفة بيبقي الافضل لو سيارة اخري علي نفس السرعة بس مثلا اللفات علي 1500
التعليق ونوع التعليق سواء ماكفرسن ولا مالتي لنك ولا ويشبون ونظام امتصاص الصدمات سوست ولا يايات ورقية ولا تورشن بيم ولا بنيوماتيك وبالتالي قابلية التعليق دة علي امتصاص الصدمات ومنعها من الوصول للشاسية وبرضة مهم جدا الجلب والمقصات ومدي فاعليتهم مع معطيات الطريق المختلفة كذلك تصميم السيارة ومدي ملائمة التعليق للغرض المستخدمة من اجلة السيارة ومدي انخفاض مركز الثقل وتوسطة للشاسية وبالتالي مدي ثبات السيارة علي الطريق وتحت الظروف المختلفة سواء طقس او حالة طريق
الفرامل ومدي ملائمتها للسيارة من حيث الاستعمال المتكرر وطول مسافة الفرملة واتزان اداء الفرامل اثناء الفرملة القوية
الاتساع الدخلي وطول قاعدة العجلات والتي كلما زادت والي حد ما زادت راحة الركوب لبعد المسافة بين العجلة التي تم التاثير عليها والعجلة التي تليها والتي يطلق عليها بلغتنا نقطة الارتكاز كذلك عرض السييارة وارتفاعها مهم جدا في حكاية الاتزان والثبات حيث كلما زاد العرض وانخفض مركز الثقل وكتلة السيارة عموما زاد الثبات لها كذلك العزل الصوتي وامتصاص الشاسية للاصوات الصادرة من المحرك والتعليق ومدي التجهيز الداخلي من ناحية فخامة الخامات المستخدمة سواء الجلد الطبيعي وجلد التابلوة والدريكسيون وفتحات التهوية الداخلية للسيارة وطبعا التجهيزات القياسية المختلفة من الزجاج الكهربي والسنتر واجهزة الملاحة ونظام العزل الهوائي للامام والخلف للتكييف وتوزيع الاضائة وعدد ونوعية احزمة الامان واخيرا قدرة الفرش الداخلي علي عدم امتصاص الحرارة والاشعة الحمراء وقدرتة علي مقاومة الارتفاع في درجات الحرارة
الشكل الخارجي وثورية التصميم يعتبر من العوامل الهامة بعد الموتور والفرامل في التقييم الفعلي وبيعتبر التصميم الجيد اول نقاط الجذب للشراء والسعي لامتلاك سيارة دون اخري
التجهيزات والاضافات مثل منع غلق المكابح والمساعد المؤزر للفرامل والتعليق الاليكتروني النشط ومساعد التوجيهة (الباور)بانواعة هيدروليك وكهرباء وحساسات الركن والاضاءة ..الخ
الصيانات وانواعها وتكلفة كل منها من حيث القطع المطلوب تغييرها والمسافة المقطوعة بين كل صيانة والاخري واسلوب تعامل الوكيل مع صاحب السيارة من حيث اسلوب التعامل والتاخير في توقيت استلام السيارة ووفرة قطع الغيار وتغطية الضمان والنجدة الخارجية
وبالتاكيد تقييم الاستاذ هاني مغطي كل النقاط بس انا حبيت اشرحها بالتفصيل الممل ...تحياتي

المشاركة الأصلية كتبت بواسطة hany63

مساء الخير ياجماعه
الموضوع ده الغرض منه ازاي نقيم اي عربيه و ايه هي العوامل الفيصل في تفوق اي عربيه عن التانيه
و ياريت ياجماعه محدش يفهم الكلام غلط انه رد على موضوع سقت الهوندا من الاول اهو انا باحترم اي وجهه نظر وياريت محدش ياخد الموضوع بشكل شخصي نهائي و نخش في الموضوع
لو ذكرنا الخصائص بتاعة اي عربيه هنلقاها:
قوة موتور وتسارعه
فتيس
عفشه وثبات
فرامل
تكييف
اعتماديه
فخامه
اوبشن
اتساع داخلي
شكل خارجي

الغلطه الشائعه ان يجيلك واحد وهو بيقيم يقوم مساوي عنصر الموتور مع عنصر الاتساع الداخلي او بالاشاره اللي في المرايا مثلا وطبعا الكلام ده غلط
انما لو انت محترف هتعتبر الاداء لوحده كوم وهو الاساس و تديله ٥٠ في الميه و بيتكون من الموتور و الفتيس و الثبات
واي خلل في اي عنصر يبقى نقطه ضعف واضحه ممكن تعيب العربيه من الاساس
نيجي للجزء التاني
فرامل و تكييف و اعتماديه اديهم ٣٠ في الميه
يعني مثلا تكييف الياباني و الكوري احسن من vw فده مش معنى ان العربيه واقعه
نقطة الاعتماديه مهمه برضه بس مش فيصل عند بعض الناس هواه الفخامه
الفرامل طبعا مهمه و بتختلف قوتها من موديل للتاني

الجزء التالت
فخامه
اتساع داخلي
اوبشن
شكل خارجي
اديهم على بعض ٢٠ في الميه عشان كل عنصر يعتبر مساله ثانويه و بتختلف من شخص لاخر طبقا لشخصيته واحتياجاته

مش عارف ايه رايكم و مستني كل الاراء

ههههههههههه...والله جدع انك عملت الموضوع ده عنداً في واحد صاحبنا عاجبه الاشارات اللي في المرايات..هههههههههه

المشاركة الأصلية كتبت بواسطة semsem kane

انا من وجهة نظرى ان فية عناصر لا يمكن التنازل عنها فى اى عربية حتى لو كان اللى جايبها مابيجريش

( محرك قوى - ثبات - عفشة محترمة - اعتمادية - قلة اعطال- توافر قطع الغيار ) دول الاساسيات بتاعة العربية لا يمكن اى حد يتنازل عنها وهية دية اللى بتخلى العربية محتفظة بقوتها بالرغم من مرور السنين

يأتى بعديها مواصفات الامان ( abs - airbag ) والعزل

ثم الشكل والاوبشن

دية مواصفات السيارة من وجهة نظرى

نسيت اهم حاجه ياسمسم...
الاشارات في المرايات و الفوجات..نور التابلووووووه...
هههههههههههههههههه

المشاركة الأصلية كتبت بواسطة se_coralsea

أولا أنا بأحيي صاحب الموضوع لن فكرته حلوة و ياريت تكون تلك الاساسيات هي أساس التقييم بالمنتدي علشان نكون موضوعيين و تكون موضوعات المنتدي بحق تليق بأسمه و باطالب منسق القسم بعمل نسخة من الموضوع في المنتدي العام كي تعم فائدته علي الجميع

أما بالنسبة لرأيك يا سمسم فأنا متفق معاك 100 % و ايضا متفق معك في ترتيب الاوليات كما ذكرتها

لكن اسمح لي اضيف بند مهم جدا خاصة لنا في مصر و هو أن يكون ذلك كله في أطار سعري مناسب للقدرة المالية للشخص الذي يبحث عن سيارة جديدة , لأننا لو فهمنا النقطة دي تحديدا هانفهم سبب الخلاف بين الأوروبي و الياباني و الكوري و الصيني

نورت القسم ياباشا و احييك على رايك الموضوعي