الموضوع: أسباب سوء سمعة الميجان (الحلقة الخامسة : اسئلة و اجوبة )

كالعادة متألق
بصراحة حلقات ممتعة و فيها شرح مبسط لسبب هبوط سعر الميجان المستعمل

شكراً يا شباب على الكلام الجميل و المشجع دة ، ربنا يخليكم ، و يا رب أكون بقول حاجة مفيدة فعلاً .

موضوع الطوبة دة بقى إلي مش قادر أمسك نفسي من الضحك من ساعة ما قريته ، هههههه بجد نكتة معدية D:
و مش لاقي ليها تفسير ، يمكن لو قولتلنا الخبطة جت فين نقدر نحدد المشكلة فعلاً

خلينا نكمل بقية الحلقة و نشوف الاسئلة الشهيرة عن الميجان :

س: هل الكارت بتاع الميجان بيهنج صحيح ؟

ج : هو إيه أصلاً وظيفة هذا الكارت ؟ وظيفته كالآتي :
١- فتح أبواب السيارة (و طبعاً التنك و الشنطة لأنهم مع نفس إلسنترلوك ) لو إنت خارجها و عايز تدخل
٢- غلق أبواب السيارة لو إنت خلصت مشوارك و عايز تقفلها
٣- بعد ما ركبت السيارة و عايز تدورها لزم يكون الكارت محطوط في مكانه (بدل المفتاح بتاع زمان )
٤- بعد ما وصلت و عايز تبطل السيارة لازم برضه يكون في مكانه ، و بعد ما تبطل تشيله

حلو الكلام لحد كدة ؟ .. حلو ، كدة الكارت بيعمل حاجتين اساسيتين في العربية و هما فتح و غلق السيارة و كمان تدوير و تبطيل السيارة ، كل وظيفة من دول ليها جزء مخصوص في الكارت ، يعني من الاخر الكارت دة جواه كرتين الكترونيين في علبة وحدة ( ٢ x ١ يعني :) )
الجزء الاول عبارة عن وحدة إرسال لاسلكي بعيد المدى ( long range RF ) و هو دة المثال عن فتح و غلق السيارة ، و دة إلي بيشتغل بالبطارية الصغيرة إلي جوا علبة الكارت السودة
الجزء التاني عبارة عن وحدة إرسال و إستقبال لاسلكي قصيرة المدى (short range ) و دي المسألة عن تدوير السيارة و دي مش محتاجة بطارية لأنها بتستهلك طاقة قليييييلة جداً بتاخدها من وحدة قراءة الكارت لم تكون محطوطة فيه داخل السيارة

كل كارت بتعمله رينو (و على فكرة اللي عمل الكروت دي siemens مش رينو نفسها زي ما وضحنا قبل كدة ) ، كل كارت بيكون فيه رقم كودي مش متكرر أبداً ، الرقم دة عبر عن إيه بقى ؟ عبارة عن رقم السيارة الخاص إلي لا يمكن يتكرر (VIN ) بالإضافة إلى رقم مسلسل خاص بالكارت نفسه بيضربوا مع بعض في الخلاط و يطلع رقم مشفر مش مكرر لأي كارت تاني في الدنيا

جوا العربية بقى فيه إيه ؟ فيه وحدة qera2et الكروت متسجل عليها برضه رقم السيارة ال-VIN و أرقام أربع كروت كحد أقصى ممكن يشتغلوا على العربية دي
رقم ال VIN دة محدش بيعرف يبرمجه في الدنيا غير رينو نفسها أما الرقم المسلسلة بتاع الكارت دي بيعملها الوكيل و بكدة رينو ضمنت إن الكروت دي مش ممكن تتقلد أبداً و تكون العربيات الميجان دي في أمان تام (إلا لو رينو نفسها حبت تسرق العربيات :D ) ، عشان كدة حضرتك لو حبيت تعمل كارت زيادة للعربية بيقولوا لسعادتك هات رقم ال-VIN و إدفايع تمن الكارت و تعالى كمان إسبوعين نكون جبناه من فرنسا (تكون رينو برمجتلك الرقم دة على كارت فاضي و بعتته ) ، و ييجوا هما هنا يبرمج السريال بتاع الكارت و كل الكروت اللي معاك في التوكيل و كدة يبقو عملوا تلات شفرات جديدة لازم تتبرمج على العربية على إن دول بس اللي يفتحوها ، عشان كدة بيقولك هات العربية و تعالى نديلك الكارت الزيادة اللي إنت طلبته

أظن لحد كدة الكلام جميل و مسلي طب فين بقى المشكلة ؟
كلمة الكارت يهنج أي حد يقلهلك اسأله يعني بيعمل إيه ؟ أو بمعنى أصح مبيعملش إيه أو إيه اللي مش شغال فيه و مهنج ، أكيد وحدة من الوظايف الاربعة (ماهو طبيعي مش هيعمل حاجة تانية يعني !!! ولا إيه ؟ )

law مش بيفتح أو بيقفل ليها سببين ، الاول طبعاً دلوقتي بقى واضح و هو البطارية لأن من غيرها جهاز الإرسال مش هيشتغل (زي أي ريموت عادي بتاع أي عربية في الدنيا ) ، و السبب التاني إن يكون في زرار من الزراير بتاعة الريموت دة مش شغال أو عايز يتغير (و دي برضه بتحصل في أي ريموت في الدنيا )

طيب فرضنا إنه قال لحضرتك إن مش بيدور العربية أو مش بيبطلها هنا بقى برضه في سببين ، يا إما بطارية العربية نفسها ضعيفة لأن زي ما قلنا في الحالة دي وحدة الارسال التانية قصيرة المدى ملهاش بطارية و لكن بتسحب طاقة من العربية ، يا إما السبب التاني إن يكون الايريال بتاع وحدة الإرسال دي فيه مشكلة (لأنه كبير و موجود داخل الكارت و عرضة للصدمات و هو دة الحاجة الوحيدة بالمناسبة المعرضة للتلف داخل الكارت ) ، و في الحالة دي بيتغير الكارت

طيب ماهو لو أي حاجة من دول حصلية كدة صاحب العربية في مشكلة ، مش كدة ولا إيه ؟ و المهم عند يحل المشكلة مش بس يعرف سببها (يا فرحتي عارف السبب و واقف عطلان في الشارع :) )
فاكرين لم قلنا كل حاجة في العربيات لازم يكون فيها fail - safe mode ، يعني نقطة أمان في حالة حدوث مشكلة ؟ هو دة بقى مكانها ، كل حاجة فيها سوفتوير بيشغلها لازم يكون فيها المود دة ، في حالتنا دي بقى إيه اللي هيحصل ؟
لو البطارية بتاعة الريموت الصغيرة فضيت هما حطين لحضرتك مفتاح معدن إحتياطي تفتح بيه يعني مش هتتحبس برة العربية ، و لو إنت جوا و عايز تقفلها اتفضل إنزل و أثناء فتح الباب دوس دوسة طويلة على مفتاح السنتر هتلاقي اللوك بتاع العربية قفل ، إنزل و اقفل الباب و كدة كله تمام ، يعني إنت كدة معندكش مشكلة
طيب فرضنا الكارت باظ و هو محطوط في العربية و للحظ السيئ كنت العربية دايرة (دة يعني كان واحد نحس :) ) ، تعمل إيه ؟ برضه فيه fail-safe ، حضرتك هتدوس دوستين بدل دوسة وحدة على زرار stop engine و هو هيبطل العربية حتى لو مفيش معاك كارت أصلاً
و لو عمل كدة و هي مبطلة ، يعني مرديش يدور العربية ؟ .. ماهو إنت كدة safe يعني في السليم إنت عايز إيه تاني :) ، بمعنى أصح هو كدة مش مصدق إن دة الكارت بتاع العربية و مش هيدورها لأنه مش عارف إنت صاحبها ولا لأ ، في الحالة دي روح هات الكارت الإحتياطي لحد ما تشوف مشكلة اخينا دة إيه .

أظن بقى مالكش حجة كل مشاكلك إتحلت ، فين بقى الكارت اللي بيهنج دة ؟ بيعمل إيه تاني يعني غير كدة أو مبيعملش إيه تاني غير كدة ؟ حد يقولي يمكن أنا مش واخد بالي

شكراً و تحياتي

بمناسة الكارت يا فرحات
كان فيه إشاعة بتقول إن كارت الميجان بيملح !!!!

تخيل كارت بلاستيك بيملح !!!