مشكلة في ترشيح زيت اسفل العربية

**mahmoud ghanem** · 05-08-2012 11:37 PM

السلام عليكم ورحمه الله

انا عربيتى ابيزا 98 1000 سى سى انجكشن

حصل معايا امبارح وانا طالع بالعربية موقف .. كان فى علبه صفيح تحت العربية غالبا علبه سمنه فاضية مش فاكر
المهم طلعت بالعربية وطبعا كحتت فى الارض شويه 1 متر كدة ونزلت اشوف فى ايه .. فى الاول افتكرت كرتونه او حاجة خفيفة المهم لقيت العلبة دى شلتها وكملت مشوارى والدنيا كانت عادى زى الفل
رجعت بليل ركنت العربية وجيت اطلع بيها بعد فترة لقيت بقعه زيت شبه قديمه ( يعنى مش تسيل مستمر )
المهم قلت يمكن حد راكن قبلى .. تانى يوم قلت اشوف فى زيت تانى ولا ايه الحكاية وفعلاً لقيت نفس البقعة ..
نزلت تحت العربية لقيت الكرتيرة زى متكون معرقة زيت بس مش لزج وفى زى خرطوم جمب الكرتيرة على طول مرخى قرب الارض وبردوا عليه زيت مش لزج وخرقان .. الخرطوم دة مكنش كدة يعنى زى ما تكون العلبه اللى كانت تحت العربية شدته من مكانه ... المهم طبعا انا مش عارف دة ايه ؟؟؟
يعنى فى حاجة حصلت للكرتيرة ولا السبب الخرطوم دة ؟؟
وانا معرفش اصلاً خرطوم ايه دة ؟؟؟ مع العلم انى قست مستوى الزيت لقيته مبينقصش !!

رجاء من اهل الخبرة فى المنتدى الافادة علشان هروح للمكانيكى بكرة ومش عاوز حد يشتغلنى
ويفتح معايا قصة وموال ...

ودى حاجة بسيطة ولا هدخل فى مصاريف ؟؟ ومعلش طولت عليكم سؤال اخير لو تفيدونى فى تكلفة الاحتمالات لانى بصراحة انا جديد والعربية مكملتش شهر معايا ويمكن اول مرة اروح بيها للمكانيكى ؟؟

وشكراً لكل القائمين على المنتدى الرائع دة

تم تعديل العنوان ليتناسب مع المحتوى
م ع 3

**SYD** · 06-08-2012 12:28 AM

الأحتمال الوحيد للخرطوم هو انه يكون خرطوم فايز الزيت وبدل ما يركب في العمة حد مدلدله لتحت
دة الخرطوم الوحيد الي ممكن يكون بيجيب زيت - غير كدة مفيش اصلا خرطيم تاني في المكنة بتجيب زيت

انا رأيي تستني شوية وتصبر علي موضوع االميكانيكي

تابع الأول مقياس الزيت يوم بيوم
ودور العربية وانزل تحتها وشوف مصدر الزيت

لأنك لازم تعرف هل الزيت بينقط اول ما تركن - ولا اول لما تدور - ولا وهي دايرة - ولا وهي مبطلة

ودة مش هيجي غير بالمتابعة وحتة كرتونة نظيفة تحطها تحت العربية كل لما تركن

**mahmoud ghanem** · 06-08-2012 01:45 AM

المشاركة الأصلية كتبت بواسطة syd

الأحتمال الوحيد للخرطوم هو انه يكون خرطوم فايز الزيت وبدل ما يركب في العمة حد مدلدله لتحت
دة الخرطوم الوحيد الي ممكن يكون بيجيب زيت - غير كدة مفيش اصلا خرطيم تاني في المكنة بتجيب زيت

انا رأيي تستني شوية وتصبر علي موضوع االميكانيكي

تابع الأول مقياس الزيت يوم بيوم
ودور العربية وانزل تحتها وشوف مصدر الزيت

لأنك لازم تعرف هل الزيت بينقط اول ما تركن - ولا اول لما تدور - ولا وهي دايرة - ولا وهي مبطلة

ودة مش هيجي غير بالمتابعة وحتة كرتونة نظيفة تحطها تحت العربية كل لما تركن

شكراً ليك يابشمهندس
انا هعمل اللى انت قلته دة بكرة واشوف وهرجع اقلك اللى حصل معايا
فى حاجة بردوا ان الخرطوم دة مش فى شكل خرطوم كبير زى ما انت متخيل دة عامل زى خروطم قطرة صغير 3 مللى مثلاً ومتغطى بحاجة بلستيكية كدة زى غلاف حماية .. انا معرفتش احدد بالظبط علشان كان عليه كتله زى شحم من الزيت متسخه ( مطينه ) طبعا ً فا ملامحه مش واضحة قوى .. ولا قادر اعرف هو جاى من فين ورايح على فين .. كل اللى شفته انه بعد الارتخاء بقى عامل زى حرف اليو كدة ومفيش فرق كبير بينه وبين الارض وملاصق للكارتيرة والغالب منه بقى تحت الكرتيرة
انا توقعت انه يكون خاص بالفرامل !!! والله اعلم .. انا بحاول اوضح الصورة لحضرتك على قد ما اقدر ...
وانا هجرب اللى حضرتك قلت عليه بكرة وهرجع ارد عليك

متشكر جداً على اهتمامك

**Karim Ibiza** · 06-08-2012 03:34 AM

ده مش خرطوم, ده كابل من الضفيرة وفى اخره فيشة بتركب على حساس بس بصراحة مش عارف حساس ايه.
روح اى بنزينة وادخل على البير عند بتاع الزوايا او التشحيم وانزل تحت فى البير تحت العربية وساعتها هتشوف كل حاجة بوضوح وهتعرف الزيت جاى منين

**SYD** · 06-08-2012 06:42 AM

فعلا بيبقي في خرطوم لافف حوالين الكرتيرة وليه جراب عامل زي خرطوم الكهرباء (الفلكسيبل)
ده فعل بيبقي مدلدل من تحت الكرتيرة في معظم العربيات ومكانه اصلا انه بيبات تحت الكرتيرة وبيبقي شكله زي حرف اليو u
دة اعتقد تبع الدينمو

انت ماحستش باي مشاكل لما اتقطع ؟؟
لمبة البطارية مش منورة في الطابلوه ؟؟

عموما
انت احسن حاجة تروح زي كريم ما قال في اي محطة وتغسل العربية من تحت كويس وتدخلها المجري وتشوف الكابل دة مقطوع منين او مخلوع منين وحاول تركبه

معرفتش

يبقي تروح للميكانيكي بتاعك وهو يشوف الدنيا فيها ايه

واحنا هنا هنتابع معاك

**mahmoud ghanem** · 07-08-2012 12:50 PM

المشاركة الأصلية كتبت بواسطة karim ibiza

ده مش خرطوم, ده كابل من الضفيرة وفى اخره فيشة بتركب على حساس بس بصراحة مش عارف حساس ايه.
روح اى بنزينة وادخل على البير عند بتاع الزوايا او التشحيم وانزل تحت فى البير تحت العربية وساعتها هتشوف كل حاجة بوضوح وهتعرف الزيت جاى منين

فعلاً هو مطلعش خرطوم هو كابل كهرباء بس مش عارف بتاع ايه

**mahmoud ghanem** · 07-08-2012 01:07 PM

المشاركة الأصلية كتبت بواسطة syd

فعلا بيبقي في خرطوم لافف حوالين الكرتيرة وليه جراب عامل زي خرطوم الكهرباء (الفلكسيبل)
ده فعل بيبقي مدلدل من تحت الكرتيرة في معظم العربيات ومكانه اصلا انه بيبات تحت الكرتيرة وبيبقي شكله زي حرف اليو u
دة اعتقد تبع الدينمو

انت ماحستش باي مشاكل لما اتقطع ؟؟
لمبة البطارية مش منورة في الطابلوه ؟؟

عموما
انت احسن حاجة تروح زي كريم ما قال في اي محطة وتغسل العربية من تحت كويس وتدخلها المجري وتشوف الكابل دة مقطوع منين او مخلوع منين وحاول تركبه

معرفتش

يبقي تروح للميكانيكي بتاعك وهو يشوف الدنيا فيها ايه

واحنا هنا هنتابع معاك

شكراً ليك يا استاذ سيد

انا فعلاً روحت للميكانيكى وطلع ان الخرطوم دة كابل ذى ما حضرتك قلت ( كابل لافف حوالين الكرتيرة وليه جراب عامل زي خرطوم الكهرباء (الفلكسيبل) )
وهو فعلاً خارج من الدينمو بس مش عارف رايح فين ؟

المهم الحمد الله الميكانيكى طمنى والكرتيرة سليمه الحمد الله وقلى ان فى كوعه كدة فوق الكرتيرة هى اللى بتسيل زيت ومغرقة الكرتيرة ومحتاجه تغير الجوان بتاعها

قلته توكل على الله والحمد الله بعد ما استلمت العربية لفيت بيها لفة وركنتها ساعة كدة والحمد الله ملقيتش حاجة تحت العربية ...
متشكر قوى يارجالة انا كنت قلقان والله بس الحمد الله طلعت بسيطة وربنا سترها

**SYD** · 07-08-2012 06:10 PM

طب الحمد لله ان المشكلة اتحلت
بس بردو ما عرفتش كابل بتاع ايه ؟؟

وعمل فيه ايه ؟؟
ركبه مكانه ولا سابه زي ماهو ؟؟

**mahmoud ghanem** · 07-08-2012 09:02 PM

المشاركة الأصلية كتبت بواسطة syd

طب الحمد لله ان المشكلة اتحلت
بس بردو ما عرفتش كابل بتاع ايه ؟؟

وعمل فيه ايه ؟؟
ركبه مكانه ولا سابه زي ماهو ؟؟

هو كل اللى عرفته انه خارج من الدينمو بس رايح فين معرفتش ... وشكل الميكانيكى كدة محولش يتعب نفسة ويعرف !!! بس انا شفت طرفه ( طرفين ) داخل على الدنمو والطرف التانى تايه فى الماتور

والحمد الله الكابل متفكش من مكانه ( الطرفين راكبين زى مهما من الاول ) هو زى ما كان واضح انه كان متثبت بحاجة علشان ميبقاش مرخى ولما حصل الموقف بتاع العلبه الصفيح دة فك من مكان تثبيته بجانب الكرتيرة ..
والميكانيكى لامه وعمله رباطه بسلك رباط تانى فى مكانه .. والحمد الله عدت على خير

متشكر قوى على مجهودكم واهتمامكم بجد والله

انا بكرة ان شاء الله هعمل غسيل لدورة التبريد ( الردياتير ) وهرجع انقل لكم ما تم علشان كلنا نستفيد

**ehab_mansour** · 09-08-2012 12:18 PM

ده كابل الشحن الرئيسي و بيوصل من الدينامو الي البطارية و ده بيتثبت بمشابك كده هي و جرابه واحد و ده بيلف مع طرف كرتيرة الزيت و ده لو اتقطع هيفصل شحن البطارية و أكد كويس جدا علي تثبيته عشان ميسقطش و يتعري و يسلمس مع جسم العربية ولو لمس ممكن يحرقلك الدينامو و هيعملك مشاكل مش ممكن تتخيلها في كهربية العربية ممكن تصل للحريق ربنا يسترنا جميعا و يقينا شر مشاكل الكهرباء في العربيات

الموضوع: مشكلة في ترشيح زيت اسفل العربية

LinkBack

أدوات الموضوع

عرض

-

-

-

-

المواضيع المتشابهه

لقلقة في العربية من اسفل

ترشيح زيت اسفل الفتيس رجاء المساعده

ترشيح زيت اسفل البوجيهات

مياه اسفل العربية

حجر اسفل العربية

الكلمات الدلالية لهذا الموضوع

المفضلات

المفضلات

ضوابط المشاركة