ايه رأيكم فى الموضوع ده؟؟

**Yones** · 07-08-2012 02:02 AM

ازيكم ياشباب اخباركوا ايه؟؟ وكل سنة وانتوا طيبين بجد واحشنى........
كان بقالى فترة راكن العربية ومبخرجش بيها من فترة بسبب ظروف شغلى لكن بدورها كل 3 ايام تقريبا عشان البطارية....بس يوم الجمعة اللى فاتت مدارتش معايا فاتصلت بالصنايعى اللى بتعامل معاه وجه ودورها بوصلة ولما دارت طلعت دخان من الشكمان مكانش بيطلع قبل كده...لما خدها الميكانيكى قالى ان فيها شنبر قفش من الركنة بالرغم ان الزيت مبينقصش ومعدله كويس بس بيستند بالموضوع ده على ان البوجيه فى السلندر رقم 4 معرق زيت شوية فهل ده فعلا شتبر ولا كاوتش صباب ولا ايه بالرغم ان سحبها كويس والموضوع حصل بشكل فجائى بتاع الدخان...وهل فعلا الركنة ممكن تعمل قفش للشنبر بداخل السلندر ...........وقالى انها محتاجة طقم شنبر وطقم جوانات كامل (وش سلندر-جوان فرن- مانيفولد -كارتيرة) وكمان سير كاتينة بالمرة..هل هيا فعلا محتاجة كل ده فى حالة وجود مشكلة فى الشنبر؟ وبيقول ان التكلفة الكلية بالمصنعية فى حدود 1000 جنيه هل السعر مناسب؟؟؟ ياريت تساعدونى بارائكم ياشباب

**MohammedAladel** · 07-08-2012 02:58 AM

هممممممم معتقدش ناس كتير بتركن عربيتها وبترفعها واشمعن الشمبر دا ؟ واشمعن البوجيه دا اللى معرق زيت ؟

**SAMEH_FOUAD** · 07-08-2012 03:29 AM

يونس باشا ليك وحشة وعودا حميدا ياباشا

عموما عشان حضرتك تبقى عارف , ان معنى وجود زيت على شمعة البوجية دة معناة ان الغرفة دية الشمبر بتاعها خفيف

لكن لو انك بتلاقى زيت على الالووظ بتاع البوجية نفسة دة بيبقى من جوان وش التاكيهات والاربع رينجات بتوع البوجيهات

- لو فية كاوتش صمام وحش فى العربية هتلاقيها وانت بتدور العربية طلع حبة دخان بلون مزرق وبيبقى على حسب حالة الكاوتش

- شوف هية الركنة ماتعملش كدة وبعدين انت بتقول انك بتدورها كل ثلاث ايام

انا اللى شاكك فية ان كاوتش الصمام ممكن يكون نشف من الركنة فعمل كدة

وانت ياريت تعمل اختبارات للعربية يعنى مثلا خد العربية واجرى بيها شوية و شوف هل فية دخان بيطلع مع الحرق , ولا لأ

وقول النتيجة عشان نقدر نحلل المشكلة اكتر

**khalid_adel** · 07-08-2012 04:24 AM

لو الدخان اسود عادي متقلقش
ده البني ادمين (خساره فيهم كلمه بني ادم) لما بيدورو اي عربيه تحس انه جاله صرع وتلاقيه بيدوس بنزين تقولش بيديها صدمه كهربائيه بغباءه
وطبعا ده غلط على كل حاجه ومنها ان العربيه بتبقى بارده فلما يدوس بنزين البنزين بيطلع ني جدا لانه لسه العربيه مسخنتش وبالتالي متحرقش
وبالنسبه للبوجيه المعرق ده فكه وانطر الزيت مطرحه (سنه دواره) ونضفه وركبه تاني لو عمل كده تاني ابقى شوف الموضوع كويس لانه كده مش واضح السبب اوي الصراحه
بس في كلتا الاحوال متقلقش بسيطه ان شاء الله مش زي مانت متخيل :)

**Yones** · 08-08-2012 01:03 AM

المشاركة الأصلية كتبت بواسطة ahmedeihab

و الله انا شايف ان الشنبر ملوش لزمه تغير كل ده

بس لو هو بيعملهم علشان هما تعبانين عندك فا الراجل كتر الف خيره و يبقى عمل معاك واجب

و كمان مصنعيه 1000 جنيه حلو مش وحش

و ربنا يوفقك ان شاء الله و تطلع زى ما انت عايز

^_^

يعنى حضرتك شايف ان السعر مناسب وكويس مش وحش؟؟
طيب الحمد لله حضرتك طمنتنى ان الراجل مبيشتغلنيش :)

**khalid_adel** · 08-08-2012 06:20 AM

المشاركة الأصلية كتبت بواسطة yones

هههههههه متقلقش يااستاذ خالد انا بسيب العربية شوية بعد التدوير وبعد كده لتحرك مش بتحرك على طول..... وربنا يكرم بجد والموضوع يعدى على خير وشكرا على النصيحة :)

لا والله انا مش قصدي عليك انا بتكلم علي حركه زباله بيعملوها الميكانيكيه
اول ما يدور العربيه (حتي وهي متلجه) يقوم شادد بنزين شادد شادد تقولش عبر انتصار اكتوبر المجيد :) وطبعا ومن الطبيعي تطلع دخان اسود عشان البنزين لسه ني تماما طبعا ده غير ان حتلاقي المؤشر نزل سنه لو ركزت معاه :)