الموضوع: حصريا تحويل الشاهين من انجكشن الي كاربراتير بالصور

بسم الله الرحمن الرحيم

نوع السيارة شاهين هاف انجكشن 2005 المكان طنطا
بسبب البوهيجي ربنا يسامحه كنت برش باب في العربية وكنت سيبتله العربية كذا يوم لقيته بيتصل بعد مده وبيقول العربية مش بتدور ودي كانت لسه اول حاجه اعملها في العربية كنت شاريها لسه من ايام المهم كنت لسه مش فاهم فيها اي حاجه نشوف ميكانيكي يدورها يحاول لحد مافضي البطارية مافيش فايده يحاول يلعب في الكتاوت المسئول عن ضخ البنزين مافيش فايده المهم جاي ببص علي الطابلوه لقيت الاخ المحترم مخلي العربية مافيهاش ولا نقطة بنزين لمبة الاحتياطي قايده ولمبة الرشاش ويقولكك مش بتدور رايح جاي بيها لبيته كل يوم ومش هاين عليه يمونها المهم مونتها ونحاول ندور مافيش فايده المهم روحت لمحل كمبيوتر سيارات ولقيت العطل في لوحة الكونترول والرشاش طبعا اتسد وباظ من الرواسب في اعر التانك
اشتريت رشاش ب 150 جنيه مستعمل وصلحت اللوحه ب 250 جنيه اضطريت طبعا لذلك علشان العربية تدور وفعلا دارت لكن طبعا مابقتش عربية مبرجله جدا ومافيش سحب ارجع لمحل الكمبيوتر يقولي انا ماليش دعوه انت كنت عاوز تدورها وانا دورتهالك
المهم روحت لميكانيكي قالي نغير طرمبة البنزين اللي ورا وفعلا كانت باظت هيا كمان من الرواسب فغيرتها لكن بواحده صيني ب 60 جنيه وعملت تحسن مؤقت لكن كان صوت العربية عالي عرفت بعد كده ان العلو ده لان الكومبيوتر بيحاول يعوض ضعف ضخ طرمبة البنزين بانه يعلي الضخ
المهم حتي الان كانت العربية مش بتزيد عن 100 ومخنوقه المهم روحت لميكانيكي قالي غير حساس الايدل غيرته بيعمل 450 جنيه الاصلي جديد لكن مالقيتوش في شارع شامبليون المهم جبت استيراد ب 200 جنيه المهم حسن كتير يعني نقول العربية بقت 80% لكن استمرت اسبوع وضرب اروح للميكانيكي يقولي الحساس وحش مش عارف ارد اقوله ايه بصراحه
المهم ركبت الحساس بتاعي القديم اهوا شغال نوعا ما المهم العربية ماشيه لحد 100
اخيرا جت العربية تعبت تاني ومخنوقه قالي ده حساس الميه بايظ العربية شكالها فيها 50 حساس
المهم جبته ب 80 جنيه وغيرته العربية زي ماهي مخنوقه الميكانيكي يقولي استني علي لما ياخد دورته روحت ورجعتله تاني يوم العربية مخنوقه شال الفيشه لقي فعلا الحساس كان سليم المهم قالي روح للكهربائي ورحت كشفت كمبيوتر تاني بي 25 جنيه المهم قالي انت لوحتك بايظه روح لبتاع الكمبيوتر اللي انا اساسا كنت مصلحه عنده وطبعا ماروحتش لانه اخره بيصلح الشيبه اللي بتضرب دي وخلاص ومش فاهم حاجه تانيه
المهم اخر حاجه عملتها غيرت الطرمبه الصيني بواحده تركي ب 130 جنيه لاني كنت عارف ان اكيد الصيني ميته وفعلا غيرتها فوقت العربية لكن لسه العربية بتتخنق مني

وهنا قلت مش هدفع مليم تاني في الانجكشن وقررت اني اقلب العربية كاربراتير عاده وندمت اني ماحولتهاش من زمان وهنا نصيحتي لاي حد
( لو اللوحه ضربت عندك اقلب العربية واوعي تصلحها او اشتري لوحه وبيع العربية )

المهم روحت للأسطي رمضان فلوطه كتبلي الطلبات وهي كالتالي

اسبراتير عادي 65 جنيه وممكن الكتروني بي 400 جنيه
موبينه عادي ب 105 صناعه انجليزي وفي موبينه اليكتروني
كاربراتير تمبرا عامل 450 جنيه من مخزن الحاج ايمن اخر سكة المحله يمين وطبعا مش بيديهولك بالمسامير ولا بالعمه ولا بالمانفو العمه 100 جنيه المانفو 140 4 مسامير 40 جنيه
المهم الميكانيكي قالي مش مشكله العمه هحلها والمانفو هنجيب فلنشة كاربراتير ب 40 جنيه
1.5 متر خرطوم بنزين مقاس 10
عدد 6 كاليهات اللي هي افيز يعني
سلوك شاهين للاسبراتير مش عارف كنت كل لما اروح لميكانيكي يقولي هات طقم سلك جديد مش عارف الشاهين نازله بطقم وحش ولا ايه طبعا عاملين 30 جنيه
واخيرا رداخ ياباني عامل 170 جنيه

مصنعية 150 جنيه مدة العمل 10 ساعات

انتظروا مني الصور واداء السيارة بعد التحويل من حيث القوة واستهلاك البنزين