الموضوع: دي بقي ال m11

السلام عليكم و رحمه الله

الحمد لله و بعد بحث طويل عن عربيه مش هقول سيراتو ولا الانترا "مع انها من رايي ما تفرقش حاجة عنهم " بس هقول ربنا رزقني بعربيه متوسطه الي ممتازه

اول حاجة العربيه جبتها من ابو الفتوح فـ الحجاز ب 72 الف جوندي بالتمام و الكمال

دفعت و استلمت و انا واقف امبارح و روحت النهارده اخد جواب المرور اللي بيتختم من

الدراسه

اول حاجة العربيه عاينتها و كلو تمام بعد ما اتغسلت و عدادها كان 24 كيلو ... و مشيت بيها حوالي 50 او 60 كيلو و مركونه من ساعتها
العربيه ناعمه جدا جدا جدا جدا الي اقصي الحدود " مقارنه ب الافيو و الاوبترا و الصني القديم اوتوماتيك" دي حاجة تانيه و حكايه رغم ان الجنوط 16 الا ان العربيه ما تحسش بيها ب اي حاجة لا نقره ولا حفره ولا مطبات ولا هبد خالص بس يا رب تفضل كدا علي طول :p

طبعا ما شغلتش التكييف الا و انا بعاين و من بعدها ما شغلتوش و الار بي ام ما عداش 2 و نص و السرعه ما عدتش 95 ب متوسط سرعه 90 لان دا اسماعيليه الصحراوي ف طريق سفر يعني

خلينا ف التفاصيل احسن عشان ما نطولش
المميزات :
كلها مميزات ما شاء الله الا ان ما فيش تحكم ف ارتفاع النور "اللوجان فيها"
1- جنوط 16 و كاوتش عريض لثبات كويس لحد دلوقتي علي سرعه لا تتجاوز 95
2- انسيابيه ف الهواء و كان بيعدي جمبي مقاطير ولا كانهم عدو جمبي
3- العزل فوق الممتاز بمراحل لا صوت موتور ولا عربيات و كمان دا من غير التكييف ما يبقي مفتوح
4- كراسي مريحه جدا
5- العداد واضح و انواره واضحه و مريحه للسائق
6- واسعه من ورا "تاخد اربعه علي الكنبه ورا
7- صوت سماعات نقي جدا "للاسف ما فيش سماعه ورا عند الزجاج الكبير .. حد عندو سماعه هناك ولا هيا بتنزل كدا
8- السحب ما شاء الله كويس جدا
9- ناعمه جدا مقارنه ب "افيو - اوبترا - صني شكل قديم - لوجان"
لو لقيت هقولكو

العيوب بقي ب كل امانه :
1- حاسس ان صوت الموتور عالي شويه لو واقف جمب العربيه
2- بتاخد وقت عقبال ما تسخن
3- الدركسيون لو باعد الكرسي و واخد راحتك ما تعرفش تمسكو و انتا مريح علي ايد الباب اليمين
4- ابعاد العربيه مش باينه خالص و المرايات حاسسها غريبه شويه "يمكن بالتعود"
5- دواسه البنزين ما كانتش مريحاني و كعب رجلي كان واجعني "يمكن بالتعود هعرف اظبط رجلي عليه"
6- فتح التانك من الداخل تحس ان الزرار هايتكسر مش عارف ليه "انا بحسس عليه تماما

دي العيوب لحد دلوقتي و كل ما اعرف حاجة ف المميزات او العيوب هقولكو
و دي صور ليها لحد ما اصور حبه كمان

المفتاح شكلو جميل جدا و فيه لمبه كمان "ما كنتش شايفها خالص الصراحه"












دي شاشه عرض كدا ما كنتش عارف طول الطريق دي بتاعة ايه الا لما روحت :D

اي سؤال سوغنتوت ف العربيه لحد دلوقتي هجاوبلكو عليه انا ف الخدمه
أيمــــن

المشاركة الأصلية كتبت بواسطة hanysamirzaki

ألف مبروك يا معلم على العربية الجديدة بالنسبة لصوت الموتور فدة عادي جدا بالنسبة لالزوايا فهيا حاجة وحشة جدا في العربية دة m11 w-m12 وكل متظبطها حترجع معاك تاني بعد فترة فلو عرفت حد كوويس فل موضوع ده يارت تقولي :)

استني اظبط مع الصيانة المجاني بتاعت الالف .... بس يا سيد هاني مين قال انها بترجع تاني ؟؟؟؟

انا مظبط زوايا 3 مرات فقط برة التوكيل ...
مرة بعد اول خبطة اللي جت كلها في العجلة اللي قدام يمين
مرة بعد الهبدة اللي طلعت بالونة لنفس العجلةعلي اكتوبر قبل ما يصلحوا مكان التوسعة بتاع منزل شبرا
مرة بعد تحيير عجل العربية كدة لله في لله

و مرة في التوكيل مع تغيير التيش

و بتفضل مظبوطة لحد ما يحصل حاجة خارجية ......مش بتفرط لوحدها ولا حاجة ....

لو عايز مركز محترم روح عند هنتر جنب محطة كوبري القبة ...ده انا مجربه ....
في ناس بتشكر في بتوع البنزينة اللي علي تقاصع عباس و النحاس بس ده علي سماعي مش مجربه

هنتر ب 50 بلبل يظبط قدام و ورا ...بس مشكلته عليه زحمة