الموضوع: استفسار بخصوص نيسان صني الجديدة الأوتوماتك ..

المشاركة الأصلية كتبت بواسطة Youssef.Awad

اكيد شرف لينا انضمامك للقسم سواء كان معاك نيسان او لأ ..

زى ما قالك الباشمهندس حسين
لو اغلب مشاويرك جوة البلد واشارات وزحمة يبقى اتوماتيك
اما لو سفريات وطوالى كتير يبقى المانيوال

بالنسبة لموضوع الاتوماتيك وقفشة الفتيس .. هاتكلم بوجه عام وعن نيسان صنى بوجه خاص
زى ما الاعضاء وضحوا ان فيه زرار بيفك التعشيقة وينقل على الn او المور وتزقها على جنب الطريق فى حالة الطوارىء فقط

لكن فى اى عربية اتوماتيك لو تعطلت ووقفت او البطارية فصلت .. لا ينصح بتاتا بالزق مهما كانت الاسباب حتى لو كانت على الn ولازم تتنقل على مسطحة او ونش او على الاقل تترفع من المقدمة زى ونش المرور بحيث تتحرك على العجلات الخلفية بعد تحرير فرامل اليد
اما اذا كانت دفع خلفى زى المرسيدس والبى ام دبليو يفضل رفعها من الخلف وجرها على عجلاتها الامامية
واذا كانت دفع رباعى لا يجوز سحبها بالطريقة السابقة ولازم تتشال مرابعة على ونش مسطح
وذلك للحفاظ على الفتيس والتروس .. وده مذكور فى اى مانيوال لاى عربية حسب فئتها ..

كل عام و انت طيب يا عم يوسف و ارجو انك تكون قضيت عيد سعيد
بس عشان افهم يا عم يوسف ايه المشكلة ان العربية تتحرك على n مش كده التروس مفصولة ولا ايه؟؟
و لو فيه مشكلة انك تحرك العربية على n هل المشكلة دى لو العربية مطفية بس ولا لو دايره مافيش مشاكل؟ اصل العبد لله احيانانا بجيب العربية على n لو هافرمل و داخل على اشارة او هافرمل و هاخد مطب او باخد ملف

المشاركة الأصلية كتبت بواسطة Youssef.Awad

وانت طيب يا دكتور .. حسب معلوماتى المتواضعة فى عالم السيارات ..
اولا: اللى اعرفه ان الn مش معناه ان التروس مفصولة تماما زى المور فى المانيوال
والمشكلة فى الحركة على العجلات الدافعة سواء الموتور داير او مطفى (الامامية فى حالة الجر الامامى - الخلفية فى حالة الدفع الخلفى - العجلات كلها فى حالة الدفع الرباعى) وده موصى به فى اى كتالوج سيارة
لكن مسموح بالحركة البسيطة مثلا عند عطل السيارة فى وسط الطريق فطبيعى ان تتحرك الى يمين او خارج الطريق لحين اصلاحها او نقلها بونش
ثانيا: بالنسبة لكلام حضرتك بخصوص المور او الn عند الفرملة او قبل الوقوف فى اشارة او المطبات او الملفات .. نفس الكلام ده سمعته وشوفت واحد صاحبى بيعمله فى عربياته ذات الجر الامامى (الانترا - لانسر - ماتريكس) وتفسيره لما سألته كان للحفاظ على الكبالن !!!
انا شخصيا مش مقتنع بالكلام ده ولا بتفرق من تعشيق التروس او لأ لأنه كده كده المفروض الملفات تتاخد على اقل سرعة ممكنة وكده كده الفتيس الاتوماتيك بيفصل لوحده عند الفرملة وكمان عشان ما تفقدش فرملة الموتور عند التوقف فى اشارة او عند توقف الطريق على سبيل المثال
وافتكر ايضا ان فصل وتعشيق التروس فى الفتيس الاتوماتيك وانت ماشى بيأثر سلبيا على المدى الطويل والافضل نترك النقلات تحدث اتوماتيك حسب برمجة كل عربية

ملحوظة: اكيد الكلام ده فيه اللى هايتفقوا او يختلفوا معاه .. ارجوا ان تتفهموا انه من واقع خبرتى وقناعتى الشخصية ويحتمل الصواب والخطأ العلمى

بص يا عم يوسف انا كنت باعمل موضوع عن الحكاية دى لانى شايف انها مهمة
بس الكهربة قطعت فالموضوع ضااااع
انا بعد اذنك حاخد مقططفات من ردودك و حدور شوية على النت و كمان انا جبت شوية صور من كتالوج العربية عندى كمان و بعدين اعمل الموضوع
اصل انا شايف انه حيكون نقاش مفيد جدا