هشترى ابيزا و محتاج مساعدة

**taha_eid** · 15-08-2012 07:07 AM

صباح الفل يا رجالة ...

مبدئيا كدة أحب أقولوكو ان ده أول بوست ليا ع السايت بس بجد و الله أنا ما قررتش أستشيركو الا بعد ما لقيتكو ما شاء الله ناس فهمة و رجالة بجد مش بتبخلو بالنصيحة على حد و ان شاء الله تفيدونى و ألاقى عندكم اجابة على أسئلتى...

أنا ان شاء الله قررت أشترى عربية مستعملة مع العلم ان خبرتى فى المجال 0 بحكم ان دى أول عربية أجيبها و اللى معايا مايزيدش عن 30000 فقررت أجيب ابيزا 1994 أو 1998 لأنى سمعت انها كويسة و أنا شخصيا بحب العربية دى عشان شبابية و نازلة بأوبشنز كويسة و كمان على قد اللى معايا..

عندى بس كام سؤال كدة هيفرقوا معايا أوى و يسهلو عليا الأمور ان شاء الله

1- أنا بدور على النت و لقيت الحمد لله أكتر من واحدة بس حاسس ان الناس مبالغة فى السعر أوى فياريت حد يعرفنى رينج الأسعار للحالات الجيدة من العربية دى.

2- ايه أفضل طريقة للكشف على العربية لأن دى بصراحة أكتر حاجة قلقانى بسبب قلة خبرتى زى ما ذكرت ... فهل الأفضل يكون معايا سمكرى و ميكانيكى ولا أكشف فى بنزينة ولا مركز كشف ؟؟ "يا ريت تدلونى على أماكن للكشف تكون كويسة و موثوق فيها" و هل ممكن توكيل العربية يعمل كشف على موديل قديم زى دة حتى لو هيكلفنى أكتر ؟؟

يا ريت يا جماعة تفيدونى لأنى بجد خايف ألبس عربية تكرهنى فى نفسى :)

و ياريت لو فى أى حاجة محتاج آخد بالى منها بردو قولولى و ربنا يكرم

متشكرين يا رجالة و آسف لو كنت طولت عليكم

**sakr_skoda** · 15-08-2012 08:43 AM

بصراحة الأبيزا 1994 مع واحد صاحبى مطلعة عينو فانا حاولت ابص عليها لقيتها عربية غير منظمة فيوزاتها كتير بتعمل مشاكل والموتور صعب تعمل فيه حاجة بنفسك : فانا انصحك بفليشيا مش علشان انا فليشياوى لأء والله الفليشية عربية بسيطة وسهل التعامل معاها فى اى موقفق تتعرض ليه وانتا مسافر يعنى مقلكش احنا احيننا بنمشى عليها من غير دينموا واحياننا من غير مروحة التبريد وبتتحمل يعنى من الأخر مشاء الله عربية خدمة شاقة ومتانه وثبات ولا بعد كده وهى نفس هيكل الابيزا وسعر متقارب بينهم.... وطبعا التقدير فى المسائل دى يرجع لحضرتك....*

**mahmoud ghanem** · 15-08-2012 10:23 AM

انا بقلك عكس الاستاذ sakr1964
انا معايا 98 والموضوع عادى يعنى العربية لو حالتها كويسة وانت مهتم فيها يبقى هتبقى تمام معاك واى ميكانيكى هيفهم فيها
وممكن العربية اللى بيتكلم عليها الاستاذ sakr1964 دى اصلاً تعبانه وصاحبه من الاول مش مراعيها علشان كدة قرفته .. واى عربية تعبانه وصاحبها مهملها هتقرفة حتى لو اية !!!
رنج 94 يبدا من 28000 الى 31000 حسب حالة العربية
رنج 98 يبدا من 31000 الى 35000 حسب حالة العربية

خد بالك اسعار الصيف اعلى من الشتاء
يعنى فى الشتاء الاسعار دى تقل 2000 على الاقل
ممكن فى اى بنزينه كبيرة و افضل مكان تكشف فيه بنزينة شل الهرم ... مهندسين شاطرين وبالبلدى بيفلى العربية وبيقلك على كل اللى فيها
وبيطلعلك تقرير عن كل حاجة فى العربية ( كبس الماتور - اساسيات العربية .. الخ )

وربنا يوفقك فى حاجة كويسة ان شاء الله

**khaled_rz78** · 16-08-2012 02:55 PM

طيب معلش انا كمان كنت بقارن بين الكيا برايد و الابيزا ممكن تقولي اسعار قطع غيار الابيزا تفرق عن قطع غيار البرايد باد ايه

**SYD** · 16-08-2012 04:58 PM

طبعا مع كامل احترامي لكل الأراء السابقة بس انا ليا رأي مختلف

الأبيزا عربية واضحة جدا وبسيطة جدا وسهلة جدا في صيانتها للي فاهمها
اللي مش فاهمها هيلاقيها معقدة جدا وصعبة جداً

الأبيزا عربية اعتمادية جدا جدا جدا
اعمل صيانتها بأنتظام وان شاء الله مش هتحس باي مشاكل نهائي

اهتم بالصيانات الدورية السريعة هتوفر عليك صيانات كبيرة

قطع غيارها اغلي شويتين من الكوري والياباني
بس بصراحة احنا بنقضيها استيراد - ودة بيوفر علينا كتير واحيانا بيبقي احسن واغلي من الجديد المضروب

العربية هتبص فيها علي قوايم وحوض وصدر وشنطة (هتكشف الكشف العادي بتاع الأساسيات لأي عربية)
الموضوع مش محتاج خبير ابيزا - الا لو انت عايز تعرف فيها حاجات متغيرة ولا دي حاجات بلادها
بالنسبة لكبس الموتور والكلام دة فدة مش مهم اوي
اللي يهمك طابلوه وصالون وعفشة وصاج

تحياتي

والله المستعان
،
،

**SYD** · 17-08-2012 04:55 AM

المشاركة الأصلية كتبت بواسطة khaled_rz78

طيب معلش انا كمان كنت بقارن بين الكيا برايد و الابيزا ممكن تقولي اسعار قطع غيار الابيزا تفرق عن قطع غيار البرايد باد ايه

في البداية اهلا بيك في قسم سيات

معلش بدون زعل ومع كامل احترامي للكيا برايد ولملاك العصفورة - بس مفيش اي وجه مقارنة بينهم او اي وجه تقارب بينهم غير في السعر وانهم الأتنين هاتشباك
بس دي ركوبة ودي ركوبة تانية خالص

انا هعملك مقارنة سريعة بينهم هما الأتنين لموديل 99

البرايد : موتور كربراتير 1100 سي سي
الأبيزا : موتور انجيكشن 1000 سي سي

البرايد : موتور مازدا ياباني متركب علي هيكل فورد امريكي وتصميم لم يتطور منذ سنين ودور ورا تاريخ البرايد هتعرف انها كانت مازدا وفورد
الأبيزا : موتور فولكس الماني متركب علي هيكل فولكس بردو وكانت في الأصل بولو بلايا polo playa - يعني الماني مأصلة بموتور وعفشة والات جر وهيكل وشاسيه والكترونيات وكل قطعة فيها الماني

البرايد : اقصي طوحك فيها انها تكون سنتر كهربا
الأبيزا : كاملة (تكييف - باور - 4 زجاج كهربا - مرايات كهربا - انذار وريموت في المفتاح - سنتر هوا - فوجات)

البرايد : مفتاح عادي
الأبيزا : مفتاح مشفر (ايموبلايزر) خريطة

البرايد : طابلوه فقير جدا بخامات رديئة نوعا ما
الأبيزا : طابلوه فاخر بأضاءة برتقالي الماني متميزة بخامات كويسة نوعاً ما

مش عارف اقولك ايه تاني بس كتوتال الأبيزا تكسب من جميع المقاييس ومفيش اي وجه للتشابه او المقارنة بينهم

تحياتي

والله المستعان
،
،

-

الموضوع: هشترى ابيزا و محتاج مساعدة

LinkBack

أدوات الموضوع

عرض

-

-

-

المواضيع المتشابهه

محتاج المشوره لان هشترى شقه باذن الله

محتاج مساعدة في تظبيط جسمي ؟! (لو في دكتور تغذية , محتاج حضرتك :)

للخبراء: خلاص هشترى ايبيزا 93 ان شاء الله محتاج مساعده

محتاج مساعدة من شباب بورسعيد - محتاج صنايعى فاهم ميكونش غالى

هشترى ابيزا 94

الكلمات الدلالية لهذا الموضوع

المفضلات

المفضلات

ضوابط المشاركة