الموضوع: متسوبيشي لانسر بومه 2013

المشاركة الأصلية كتبت بواسطة sherif zayed

ألف مبروك يا باشا.... ربنا يديك خيرها ويكيفيك شرها
بسم الله ما شاء الله لاقوة إلا بالله العربية روعة وانا من معجبين اللانسر بشكل عام والبوما بشكل خاص........... عشان كدة انا استخرت ربنا وبالفعل حجزت سوبر اكشن 2013 ولون فيرانى بردة وإن شاء الله احتمال استلمها على اخر الاسبوع دة
والحقيقة انا كنت عايز منك طلبين:-
الاول:- وانا بستلم العربية من المعرض اخلى بالى من اية؟؟؟؟
التانى:- ما شاء الله الفرش اللى انت عاملة روعة ربنا يباركلك فكنت عايز اعرف تكلفتة كم وهل نوع الجلد اللى أنت عاملة دة بسعر معين وفى انواع تانية باسعار تانية ولا دة الموجود للبوما؟
وشكرا وربنا يباركلك

الله يبارك فيك ياباشا .. وعقبال ماتستلم عربيتك انت كمان ان شاء الله واللون الفيراني فعلا شيك أوي في العربيه خصوصا ان الألوان الحديثه في الموديلات 2012 و 2013 بقت ألإتح من الموديلات الأقدم شويه

أما بخصوص اسألتك بقى , فأولا ً : انا لما جيت استلم العربيه مادققتش أوي في الإستلام بس ده لأني كنت باستلمها من التوكيل فطبعا قولت دول ثقه عن المعارض اللي بره بس طبعا برضه دققت على حاجات كتير.

المهم .. إنت لو مشتري العربيه من معرض غير التوكيل لازم تاخد بالك من شوية حاجات كده هاقولك عليها :
- في لزق أبيض كده بيبقى ملزوق على العربيات الجديده .. لازم تخليهم في المعرض يشيلوه هم بمعرفتهم عشان ممكن يكون تحت اللزق ده العربيه واخده نقره كده أو كده ولا حاجه فطبعا لو لقيت حاجه لاقدر الله من حقك ماتستلمش العربيه .
- لو انت شاري السوبر أكشك اللي بتيجي بجنوط هاتلاقي في جزء كده بيركب في النص بيسموه الصره تقريبا ... ده بيكونوا خالعينوا عشان مايتسرقش تاخد بالك وانت بتستلم انهم يكونوا ركبوهم في الجنوط .
- خد بالك كمان من موضوع الجنوط ده .. المفروض ان الاستبن كمان بيكون جنط سبور مش جنط عادي.
- بخصوص كاسيت العربيه .. المفروض تتأكد انهم حاطين الكاسيت الأصلي اللي هو نوعه Kenwood وهاتلاقي في الظهر كده بعد ماتفك الوش الأمامي مرسوم على باب الكاسيت علامة ميتسوبيشي , وخد بالك لأن في معارض بيحطوا في العربيات كاسيت نوع سيمفوني أو حاجه غريبه كده صيني وطبعا ده وحش جدا بتجربة ناس كتير وبيبوظ بسرعه وانت من حقك طبعا تطلب الكاسيت الأصلي بتاعها .
- طبعا مش هاوصيك انك تلف حوالين العربيه من كل الجهات تشوف احسن تكون محكوكه كده ولا كده وان شاء الله مش هاتلاقي حاجه بس برضه احتياطي .
- العربيه بييجي معاها مفتاح العجل طبعا وكوريك ومفك .
- تتأكد ان الأوتوماتيك بتاع المرايات شغال ( اللي هو بيحرك المرايا فوق وتحت وشمال ويمين ) .
- وانت بتستلم مفتاح العربيه المفروض تستلم مفتاحين وخد بالك تحافظ عليهم كويس لأنك كمان لو حبيت تطلع عليهم لازم بيكون عن طريق التوكيل عشان المفتاح ده كمبيوتر يعني لو عملت منه نسخه عند أي بتاع مفاتيح هايفتح الأبواب بس مش هايدور العربيه .
- اتأكد كمان وانت يتستلم انك تستلم الإريال بتاع الكاسيت .
- خد بالك كمان من حاجه مهمه .. انك أول مابتستلم العربيه بيكون البنزين اللي فيها يادوب يمشيك لأقرب محطة بنزين تمون على طول أحسن تقف منك ويستحسن برضه بعد كده دايما تمون العربيه قبل ماالبنزين يفضى على الآخر يعني ممكن آخر شرطتين كده تروح تمون وده عشان ماتخليش شوائب البنزين توسخ الكاربراتير وتدخل بقى في قصص تنظيف وكده .
- في كمان حاجه مهمه جدا .. انك وانت بتستلم العربيه طبعا هايسلموك العقد بتاعها وشهادة البيانات اللي هاتروح بيها المرور ومعاها كمان الإفراج الجمركي عشان ماترجعش على حاجه منهم وفي حاجه كمان لازم المرور هايخلوك تعملها اللي هي اسمها استعلام أمني وده عشان يتأكدوا ان العربيه مش مسروقه .
- يستحسن كمان وانت بتستلم العربيه تستلم بالنهار عشان تقدر تشوف لو كان العربيه فيها خدش أو خبطه .. لأن في حاجات مش بتبان بالليل .

تقريبا كده دي أهم الحاجات اللي تاخد بالك منها وانت بتستلم , غير كده بقى انك لما تستلم ان شاء الله على خير وانت ماشي بالعربيه ماتخليش العداد بتاع الـ RPM مايعلاش عن 3 عشان العربيه لسه في التليين طبعا وده خلال أول 1000 كيلو بس وخد بالك مش معنى كده انك تمشي بالراحه لأ .. لأن عداد الـ RPM مالوش علاقه بالسرعه أوي قد ماهو ليه علاقه بدوست رجلك على دواسة البنزين وبالسلامه ان شاء الله .
في حاجه كمان عايز اقولك عليها بخصوص زيت الموتور .. طبعا العربيه بييجي فيها زيت اللي بيسموه زيت التليين .. وده لازم يتغير بعد أول 1000 كيلو .. بعد كده التوكيل بيحطلك في الموتور زيت TOTAL وده بيقعد معاك لغاية صيانة الـ 10000 .. انا بصراحه ماكنتش مقتنع بيه أوي بس حاولت أقولهم أغير نوع تاني أجيبه معايا من بره ... قالوا ماينفعش بس بعد كده لقيت انه زيت كويس وإلا ماكانش التوكيل استخدموه .
طبعا أكيد في زيوت أحسن منه بره بس انت مضطر تلتزم بتعليماتهم على الأقل في خلال فترة الضمان .

ثانيا بقى ياباشا , بخصوص الفرش بتاع عربيتي اللي انت شوفته في الصور , ده ياباشا فرش جلد عملته تفصيل طبعا مش جاي مع العربيه ولا حاجه .. اللي بتنزل بفرش جلد السوبر أكشن .
المهم انا عملت الفرش ده عند جينز كار ... هو غالي شويه بس ده عشان انا اخترت خامة جلد كويسه .
وانت لو هاتروح هناك هاتشوف الموديلات والخامات ومش هاتستخسر في عربيتك لأنهم بسم الله ماشاء الله هناك صنايعيه زي الفل .. وكفايا كمان معاملة الحاج أحمد مشعل .. بجد قمه في الكرم والأخلاق .. ربنا يباركله , وبالمناسبه انا كنت عامل الفرش بتاعي ده بـ 1300 جنيه بس عشان كان عاملي خياطه دبل وزي ماقولتلك انا اخترت خامة جلد نضيفه , بس في حاجات تانيه بتبدأ من 700 جنيه , ده غير ان الحاج أحمد عمل معايا واجب وعملي فرش لأرضية الشنطه ببلاش , وكمان كافر للدرج اللي جنب إيد السواق وكفر لفرامل اليد واداني كمان كفر للطاره .. ربنا يارب يكرمه ويرزقه رزق خير ويباركله فيه .

بالمناسبه كمان .. لو نويت تروح عند جينز كار تعمل فرش .. ابقى قولهم انك عضو في نايل موتورز لأنهم بيعملوا خصم 10 % للأعضاء وانصحك برضه انك تتعامل مع الحاج مشعل نفسه لأنه راجل طيب كده وهاتحب التعامل معاه , بس هم هناك الشهاده لله كلهم كويسين بس يمكن راحه نفسيه مش أكتر .

معلش انا طولت عليك أوي بس أنا حاولت أوضحلك كل اللي أعرفه عشان دي نصيحه والنصيحه لله , وبالتوفيق ان شاء الله ياباشا في الإستلام وربنا يستر طريقك وطريقنا كلنا . ولو احتجت مني أي مساعده انا تحت أمرك ومش هاتأخر عليك .

وفي نصيحه أخيره .. ياريت تتابع المنتدى هنا دايما لأن الأعضاء بسم الله ماشاء الله ماسابوش حاجه إلا لما اتكلموا فيها .. بجد استفدت منهم حاجات كتير أوي ولسه العطاء مستمر .

في أمان الله