السلام عليكم..
كل سنة و انتم طيبين جميعاً, و عيد سعيييييد " و يا ليلة العيد أنيستينا و الحركات دى "
ربنا يعيد الأيام دى بخير, و البلد حالها ينصلح ياااا رب..
كنت عايزة اتكلم عن حاجة حارقة دمى أوى.. قلت افضفض معاكم..
هواا مييييييييييين مسؤول عن الركنة الموازية للأرصفة فى مصر, بمعنى أصح, مين مسؤول عن إنى لما أجى اركن, ألاقى واحد كده ناطلى من تحت كبوت العربية يقولى الركنة هنا ب 20 جنيه !!!
يعنى حصلى موقفين, مرة كنت جاية أركن قدام سيتى ستارز من الشارع اللى ورا, ألاقى واحد يقولى 10 جنية " أصل انا هاخلى بالى من العربية !!" طبعاً هوا كان صغير و انا كان معايا واحدة صاحبتى فدخلنا فيه شمال و سبناه ومشينا..
مرة تانية كنت جاية أركن فى الحسين موازى للرضيف, واحد بردو جالى كده " بس شكله سوابق" و بيقولى " 20 جنيه يا مداااام " ( طبعاً انا اتحرق دمى عشان مدام دى, هههههه).. المهم من هنا لهنا قعدت أقاوح فيه مع صحابى بردو و اديتله 10 فى الأخر.. و الغريب انى بقوله الظابط هناك أهو هاروح أقوله, يقولى بكل بجاحة " ما هما كمان بيسترزقوا معانا !! "
ومكانش أمين واحد واقف, لأ الحسين فيه صف ظباط كده محترم " عشان مكان سياحى بقى, و باقى البلد تولع مش مهم! "
هوا بجد البلد وصلت لكده, انا اللى اعرفه عن مهنة السايس انه بيساعد فى الركنة و خلاص وانا طالعة بديله اللى فيه النصيب برضايا, مش بلطجة كده !!
و طبعاً لا بياخدوا بالهم ولا بينيلوا, واحد أخو صاحبتى ركن و ادى بردو فلوس لواحد, جيه حرامى شاله المرايات الجانبية, وطبعاً بخ بقى السايس ولا البلطجى ده..
بجد ايه الحل فى الناس دى؟؟ ماهو مش رصيف ابوهم يعنى عشان ندفع بالهبل ده؟؟ لأ ومتضمنش لو مدفعتش ممكن يحصل إيه فى العربية..
بجد حسبى الله ونهم الوكيل فيهم
المفضلات