الموضوع: سوبارو xv أفضل أم نيسان قاشقاى ؟؟

بص بقى يا استاذ محمد عشان حضرتك كل مرة تقارن بعربيتين باحبهم ولو معايا ثمنهم كنت جبتهم كلهم ههههههه

بس موضوع الشراء والبيع ده .. لازم الواحد يلغى فيه العواطف ويفكر بعقله اولا واخيرا
طبعا السوبارو عربية تحفة وركوبة وكل اللى بيركبوها بيحلفوا بيها ومش بيعرفوا يركبوا عربيات تانية بعدها زى الفولفو والبى ام كده ..
وطبعا تميزها انها دفع رباعى وديناميكية جدااااااا ومتطورة بس مشاكلتها فى مصر الاتى:
1.سعر اعادة البيع .. عكس نيسان انتشرت بشدة فى ال5 سنين الاخيرة
2.التوكيل ابو غالى فقط لا غير .. عكس نيسان عندها اتوايجيبت والسبع ومودرن بفروعه ويونايتد جروب وغيرهم حسب مزاجك وراحتك فين
3.قطع الغيار وتوافرها واسعار الصيانات الدورية .. عكس النيسان قاشقاى صيانتها تقريبا زى الصنى وقطع غيار موجودة ووكيل اقوى
4.الكماليات واهمها السقف البانوراما .. القاشقاى اولا وبعدين السبورتاج ام 215 الف ثانيا (حسب رغبتك)
5.المساحة الداخلية والشنطة .. القاشقاى تكسب لأن السوبارو انا قعدت فيها فى السعودية ضيقة فى الصالون والشنطة كمان مفيش ارتفاع كبير واغلى من السبورتاج هناك كمان وبتنزل 2000 سى سى فقط
5.المحرك .. السوبارو يكسب لأنه تقنية البوكسر الفريدة لكن القاشقاى اكثر عملانية
6.الفتيس .. فى السوبارو cvt برضه لكن نيسان عندها الجيل الاحدث منه وتمتلك المصنع اللى بيورد كل الفتيس الcvt فى العالم (الجدير بالذكر ان نيسان كانت تمتلك اسهم فى سوبارو وباعتها فى 1999 عند تولى كارلوس غصن قيادة نيسان)
7.السوبارو xv بالسعر ده شايفه مش منافس وكان لازم تنزل ب190 الف بس وانت اولى بالفرق ده يعملك صيانات القاشقاى 100.000 كم اقل حاجة
8.السوبارو فى مصر لو لاقدر الله فى يوم هاتبيع هاتخسر جامد وانتشار الxv هايكون محدود زى الفروستر والليجاسى عكس الامبريزا مثلا
9.بالنسبة للبنزين ما يتحطش اقل من 92 فى الاتنين مفيش مشاكل يعنى
10. التميز الوحيد للسوبارو هو الدفع الرباعى الدائم الاساسى فى كل العربيات عكس القاشقاى والسبورتاج جر امامى فقط فى مصر
واخيرا .. استخير ربنا .. ولازم تكون مقتنع مليون فى المية باختيارك فبل الشراء .. ربنا يوفقك

المشاركة الأصلية كتبت بواسطة محمد سعد عبده

بجد مش عارف أقول لحضرتك ايه

ما شاء الله أوجزت وأبدعت
ولكن فيه نقطتين :
1- حضرتك مذكرتش نسبة استهلاك الوقود اللى مش عارف هيا فى سبورتاج عاملة ازاى !!
2- انا كنت بحاول أبعد قدر الامكان عن كيا سبورتاج بحكم انها كورى -بخلاف اليابانى- رغم شكلها القوى جدا وكمالياتها الكتيرة الرائعة .
ولكن اللى مخلينى متمسك بال xv هو نظامها الديناميكى الرائع بفضل الدفع الكلى طبعا .

وأخيرا لك جزيل الشكر على جهدك الرائع وردك القيم

جزاك الله خيرا ...,

والله مش هاقدر اجاوبك على الجزئية الاولى لأنى امتلك سبورتاج 2400 سى سى awd فى السعودية وهناك السوبارو بتنزل 2000 سى سى بس .. وما عنديش فكرة عن معدلات الاستهلاك لمحركات 1600 فى العربيتين
لكن رأيى انها مش هاتفرق بصورة كبيرة بينهم كلهم فى فئة ال1600..

بالنسبة للجزئية التانية الخاصة بالمقارنة بين القاشقاى والسبورتاج .. هتلاقى مقارنة مستفيضة ومشاركات ليا فى الموضوع التالى:
http://www.nilemotors.net/Nile/287715-a.html

الخلاصة ..
لو مكان حضرتك وهارتب التلاتة كباكدج على بعضه من جميع النواحى حسب الفئة السعرية واكيد هايكون لفئات الفل اوبشن هايكون:
1. نيسان قاشقاى
2. كيا سبورتاج .. فى حال وصلت حاجز ال215 الف
3. سوبارو xv .. فى حال وصلت حاجز ال215 الف

خلينى اوضحلك نقطه بس عشان وانت بتختار تختار صح .. القشقاى الى فيها كاميرا دى مش نازله من المصنع كده الحاجات دى متركبه هنا فى مصر من اوتو ايجبت حاجه شياكه كده عشان الاوفربرايس .. انما هيا فئه واحد زى السوبارو .. والاسبورتاج تدفع 40 الف وتستلم بعد 7 شهور لو عايز تستلم بالرسمى انما تسليم فورى سعر تانى بيكون بأوفر برايس .. وبتكون الفئه الاولى ب 190 الف والتانيه ب 206 الف والاخيره ب240 الف جنيه