سلام عليكم
من اسبوعين عملت تست درايف للاسترا الجديده و من يومها مفيش وقت اعمل الموضوع
الشكل الخارجي :
ممتاز و ان كنت متحفظ علي ارتفاع العربيه من ورا شويه...٩/١٠

التصميم الداخلي :
ممتاز والخامات ممتازه بس للوهله الاولي هتلاقي صعوبه في التعرف علي وظائف الزراير..و الوسع ممتاز بصراحه ٩/١٠

الاداء :
التسارع بتاع العربيه ضعيف شويه تحت ال ١٠٠ لكن بعد كده بتبقي فايقه
الفتيس للاسف مخيب للآمال ....نقله الفتيس محسوسه اوي تكاد تقترب من الايزي ترونيك لكن مفيش تنتيش الايزي ترونيك و التهييس بتاعه لكن يظل فتيس لا يليق بمستوي العربيه و اتقفلت منه بصراحه
الثبات ده الي فعلا غير عادي لان العفشه بتمتص الصدمات بشكل خيالي بكل هدوء و مرونه والعربيه عندها قدره رهيبه انها تفضل ماسكه في الارض و مفيش اي نوع من انواع الميل ...
التكييف معقول لكن تكييف الفيكترا السي احسن منه
الفرامل ممتازه
العزل ممتاز

ملخص الكلام : العربيه حلوه جدا و تستاهل سعرها ١٧٠ الف و العربيه هاديه مشرشقيه زي الفيكترا السي
الفتيس اكتر حاجه ضايقتني لان كنت متوقع فتيس لا يقل في السلاسه عن فتيس الاوكتافيا