الموضوع: صني ولا اوبترا ولا النترا 2007-2008 اوتو

المشاركة الأصلية كتبت بواسطة Dawns_Mist

التلات عربيات دول أنا مجربهم كتير جدا .. و تقريبا مافيش أسبوع غير و أسوق واحده فيهم ...

لو أوتو ... يبقى سحب الصني ممتاز ، بعديه سحب الإلنترا ، و الأوبترا سحبها في الأوتو أقل منهم ..
العفشة و قوة التحمل ... الصني وحش بس مش طرية زي الإلنترا و الأوبترا ..
الصالون ... إلنترا هي الأوسع من الداخل ، بعدها الأوبترا بعدها الصني .. بس الفروق مش كبيرة خالص زي مانت متخيل .. يعني برضه الصني بتاخد 5 أشخاص مستريحين ، لكن مشكلة الأطوال هي اللي بتعمل أزمة أحيانا مش أكتر ..
الاعتمادية و الصيانة .. الصني عمرها مازعلتني ... الإلنترا هي الأسوأ .. أوبترا في العادي يعني ..
الثبات و الأمان .. برضه الصني ماتتقارنش بيهم خصوصا لو طقم جنوط 16 عريض .. أوبترا أفضل من إلنترا ..

* أنا لو مكانك هفكر في الصني أكيد ... و مدام قدامي اختيار مضمون مش هجرب حاجة تانية ..

المشاركة الأصلية كتبت بواسطة Dawns_Mist

الصني فعلا ضيقة من ورا خصوصا لطوال القامة ... غير كده بصراحه عربية ماتتعايبش غير إن شكلها قدم شوية لكن صاجها محترم بيخلي شكلها مايبانش عليه العمر خالص ..

الإلنترا مش سيئة للدرجة دي .. بس يمكن من كتر انتشارها بقيت بشوف فيها عيوب كتير ممكن تكون العيوب من سوء الاستخدام لإنها منتشرة ، لكن فيه حاجات ملفتة جدا ..
لما ألاقي عند ميكانيكي واحد 6 عربيات في يوم واحد بيغيروا دسك و اسطوانه إلنترا موديل سنة فاتت ، و لما عربية واحد صاحبي ماشية 30 ألأف كيلو و صياناتها في التوكيل و تجيب بلي دبرياج و العملية تفتح لمشاكل أكبر .. و اللي كان بيضايقني إن أي مشكلة من دي بتحصل بتعمل مضاعفات كتير ... على عكس الياباني معايا بوما و جوز أختي تويوتا .. ممكن نمشي بيها 60 ألف كيلو و هي عايزه تغير مساعد مثلا و العربية عمرها ماتعمل أي مضاعفات ، أو مثلا يكون فيه مشكلة كبيرة في التبريد و أفضل ماشي بيها 15 ألف كيلو و عادي جدا ولا تزعل الموتور في حاجة و بعد مانضف الردياتير ترجع زيرو .... و لإني مهندس ميكانيكا و دخلت مراكز صيانة كتير كمهندس يعني فشوفت استهبال كتير بصراحه من عربيات كوري .. ممكن يكون من كتر انتشارهم مع سوء الاستخدام هو اللي خلى الشكل سيء كده .. لكن ده برضه يخليني دايما أبقى قلقان من صناعاتهم !!!

خلاصة الكلام عن الإلنترا ...
عربية طرية و ناعمة من جوه جدا بالنسبة لموديل 2007 - 2010
موتورها قوي
واسعه من جوه
لكن ثباتها سيء على السرعات العالية بالنسبة للفءة السعرية بتاعتها
الباور بتاعها عايز تعود لإه خفيف بزيادة طول الوقت
عايزه صاحبها يكون مهتم بيها دايما و يشيك عليها من وقت للتاني علشان يتجنب أي مشاكل

بصراحة ده اكتر كلام منصف وعادل جدااااااااااا فى المقارنة بين ال3 عربيات دى فى المنتدى ده من اول اشتراكى فيه ..
الف مليون تحية ليك فعلا يا باشمهندس ..
وانت جبت الخلاصة اللى كتير من اصحاب الكورى مش قادرين يصدقوها او حتى يسمعوها ..
ربنا يباركلك