الموضوع: كام استفسار

أيه يا عم محمد ماسورة الأسئلة دى ؟
الإجابات باللون الأزرق

المشاركة الأصلية كتبت بواسطة mohammedaladel

السلام عليكم
1_ أنا بغسل العربية بنفسى وبتكون باردة ومش بخلى المياه تيجى على الفرامل هل عادى إنى أغسل الطنبورة وأرش مياه على التيل وكدا ؟

عادى بس تكون العربية بادرة تماماً..........لو الطنابير سخنة ممكن تبوظ

2_ فتحت الغطاء بتاع العلبة اللى مكتوب عليها بوش اللى هى علبة زيت الفرامل فيها ماكس وماين العلبة من التراب مش شايف قوى لكن اكتشفت ان الزيت ناقص جدا بس عندى فى التابلوه مفيش لمبة بتنور والفرامل كويس معايا يكون إيه دا ؟ للعلم التيل الأمامى جديد والخلفى مش جديد

فيه minimum المفروض لو الزيت قل عنه أنها تطلعلك رسالة ستوب
غالباً أنت عندك موصلتش للمنيمم

3_ خلينى عايز أغير زيت الفرامل ينفع أغيره بنفسى ؟ وازاى ؟ بس مشكلة

تغيير صعب............تزويد أيوه.

لو هتغير هتحتاج تسحب الزيت اللى موجود فى الدورة بالكامل.........يستحسن تعمله عند حد
مع العلم أن فى صيانة ال 60 و مضاعفاتها بيبصوا عليه و لو محتاج تغيير بيغيروه

4_ مانوع زيت الفرامل اللى بيتحط فى التوكيل وبتاخد كام لتر ؟ أنا عارف إنه dot 4 قرأت كدا على الغطاء بتاع العلبة لكن عايز أعرف النوع المناسب

دوت 4 و أعتقد زى باقى الزيوت اللى التوكيل بيستخدمها ممكن يكون توتال.

5 _ ماذا يحدث لو قل زيت الفرامل عن الحد الطبيعى ؟

هتحس أداء الفرامل أقل و المفروض لو قل عن المنيمم تطلعلك رسالة تحذير.

6 _ لما أبطل العربية بدوس على دواسة الفرامل بتيجى معايا للآخر وبحس بهواء بدوس مرة تانى بتيجى للنص مثلا لحد ما تتحجر وما تنزلش معايا خالص عايز أعرف إيه اللى بيحصل طبعا لما بدور العربية بتفك

عادى المفروض تحصل فى أى عربية السيرفو بتاعها سليم............الفرامل تحجر من دوستين تلاتة طالما أنت مبطل العربية

7_ لو أنا واقف بالعربية وع المور وحد بيزقنى والعربية مبطلة هل لو دست فرامل هتمسك معايا العربية بصراحة مجربتهاش

مبطلة تماماً.........المفروض لأ
لو دوست نص دوسة فرامل مع تدوير العربية المفروض العربية هتكون فى حالة زى ما يكون الكونتاكت مفتوح.....أعتقد ان فى الحالة دى الفرامل تشتغل عادى.

8_ هل لو التيل حالته مش كويسة الفرامل أداؤها بيقل ولا عادى مش هلاحظ كدا ؟ يعنى مثلا لو كانت العربية بتقف باقل لمسة هحتاج دوسة أكبر عشان التيل يمسك

حسب اللى فاضل فى التيل و حسب الطنابير حالتها أيه..........ممكن يكون الفرق موجود بس مش ملحوظ و ممكن يكون ملحوظ

9_ التيل قدام كام قطعة قطعتين ولا أربعة واحدة برا وواحدة جوا لك ديسك

التيل قطعة واحدة لكل ناحية.

10_ ما هو مقاس ونوع ديسك الفرامل الأمامى والدرام الخلفى الأصلى فى الميجان وما خطورة عدم تغييره لو حالته مش تمام ممكن يتكسر مثلا ؟

قطر الطنابير الأمامى المفروض يكون 280 مللي و سمكها 24 مللي....اقل سمك ينصح به 21 مللي

الخلفى ديسكات برضه قطر 240 مللي و سمك 8 مللي جديدة .....أقل سمك مسموح للطنابير 7 مللي.

التيل سمكه 18 مللى و أقل سمك ينصح به 6 مللى سواء ورا أو قدام ( أعتقد الخلفى سمكه و هو جديد أقل من 18 مللى بس مش متأكد)


فيه مراحل كتير ممكن يوصلها بس الكسر صعب قوى

بعد الرغى ده كله لقيت صور..........أحسن من الرغي

الأمامي





الخلفي





11_ هل ممكن أغير الدرام ورا وأركب ديسك بنفس مقاس الدرام أو أركب ديسك زى الأمامى ولا مش مستاهلة ؟

راجع الرد السابق

12_ حد يقدر يعرف إزاى اعرف مستوى زيت الفتيس خلى مفيش طريقة للمستخدم العادى ممكن يعرفها فلنفرض إن الزيت نقص هل فيه رسائل بتظهر ع الشاشة ؟ زى مثلا تشيك جير بوكس ؟ او جير بوكس أوفر هيت ؟

معتقدش فيه طريقة للمستخدم العادي...........و فى حالة نقص الزيت غالباً هيطلعلك رسالة

13_ ليه نور الشبورة فى الميجان لمبة واحدة وشمال فقط وهل ينفع أعدل الضفيرة اليمين وأخلى اللمبتين ينورو ؟

عادي فى معظم الأوروبي.......من غير تعديل
لو رحت لحد فاهم شوية هياخد وصلة من اللمبة الشمال و يوصل سلك للناحية اليمين و و يركب لمبة و شكراً

14_ هل عادى وأنا بغسل العربية أرش مياه على الرادياتير من فتحات التهوية بالخرطوم ولا لا خصوصا إن فيه كهرباء للكلاكس ؟

عادى طالما العربية مش دايرة و مفيش أسلاك عريانة

15_ ما أعراض تلف قواعد الموتور وبتبقى فيه بالظبط قواعد الموتور ؟

هتحس برعشة غير الطبيعية فى العربية لما تكون جايب ال d و واقف و دايس فرامل....و تزيد مع التكييف..........و بتختلف حدة الرجة حسب درجة بوظان القواعد............أعتقد كانو 3 قواعد.....مش فاكر بالظبط.

16 _ ما أعراض تلف قواعد الفتيس ؟

غالباً بتحس برجة أو نتشة غير معتادة مع النقل

17 _ ما أعراض تغيير فلتر الهواء يعنى مثلا هتحس بإن العربية متكتفة ؟ ومش هتجرى معاك ولا مش هتلاحظ قوى ؟؟

ممكن تحس ان العربية مكتومة و مش بتجرى زى العادة....و ده طبعاً ممكن يكون سببه حاجات كتير غير الفلتر....ممكن علشان تقطع الشورت فى البسين تشيل الفلتر خالص و تطلع تجرب.....لو لقيت فيه فرق يبقى الفلتر......بس متمشيش كتير و أنت شايله......يا دوب على قد التجربة

و عموماً هو بيبان من شكله أذا كان ينفع يتنشف أو لأ

18_ما أعراض تغيير البوجيهات ؟ وهل لو مش ملحوظ قوى إن فيه مشكلة من البوجيه اللى مفروض إنه يتغير على 20 ألف كيلو أمشى بيه عادى يعنى هحس بفرق فى السحب وصوت الموتور وكدا ؟

المفروض نفس أعراض الفلتر يزيد عليها تقطيع مع دوسة البنزين ( وبرضه الحاجات دى مشتركة مع مسببات تانية زى الطرمبة برضه)

المفروض مع التغيير لو هما منتهين تحس بفرق فى السحب

19_ ما أفضل نوع بوجيه للميجان

مش فاكر التوكيل كان بيستخدم بوش ولا ngk

20_ وأنا سايق لو سبت الدريكسيون العربية بتروح شمال يبقى إيه دا زوايا ؟ وإيه خطورة إنى أمشى كدا سبحان الله عندى العجلة بتاعتى بتحدف شمال برضه لكن بسبب حادثة هههههههههه
ما أعراض تلف المساعدين سواء أمامى أو خلفى ؟ هل ممكن العربية توطى أكتر على الأرض لو المساعد بايظ ؟

- شيك على ضغط الهوا
- أتأكد أن الميل مش من الشارع نفسه
- أتأكد أنك مش بتعدى على مطب و لو صغير لأنه ممكن يأثر على الإتجاه
- أمشي مسافة 30 أو 40 متر فى شارع مرصوف كويس و مستوى بقدر الإمكان فى إتجاه معين و أرجع أمشى فى نفس الحتة عكس الإتجاه ده.
لو الحدفة أتغيرت يبقى مفيش مشكلة.السبب هو الشارع
لو فضلت فى نفس الإتجاه أكشف زوايا.

21_ أنا عندى كاوتشات قدام ارتفاع 60 وهغير قريب إن شاء الله وناوى أجيب 55 زى اللى ورا السؤال بقى هل الاختلاف فى الارتفاع فى الوضع الحالى مأثر على الثبات ؟ وعلى قراءة عداد السرعة وعلى العفشة ؟؟؟ ولا عادى ؟

بيأثر بس ممكن تكون بدرجة غير ملحوظة...
السؤال التانى لازم نعرف المقاس الأصلى كام و اللى متغير كام بالظبط
يعنى مثلاً الأصلى 15/195/60 و أنت مغير ل 15/205/55 و لا أيه بالظبط


22- أنا سواقتى للعربية هادية شوية مش عنيفة بجرى آه لكن حبة حبة على الاكسراتير ملاحظ إن العربية بتجيب الرابع على 70 هل دا تفسير إن العربية ليها أربع أوضاع قيادة ؟ بتتأقلم مع رجل اللى بيدوس ؟

طبيعي طالما أنت مش بتحرق أن العربية تنقل بدون ما يكون فيه حمل زيادة على الموتور.

23_ بما إن عربيتنا أوتو وسمعت كتير أن الأوتو يستهلك تيل بسرعة أكبر من المانيوال أنا شايف العكس صحيح الأوتو يستهلك أقل لأنك على طول ماشى على الدى لو هتهدى على المطب برضه على الدى الموتور والتروس بيساعدوك مع الفرامل ليه الناس بتقول إن الأوتو بتاكل تيل أكتر من المانيوال لنفس نوع السيارة ؟

تخيل الموقف الأتى............أنت واقف فى إشارة على وضع ال d و دايس فرامل.............أيه اللى بيحصل ؟
أنت بتقول للعربية أتحركى و فى نفس الوقت مانعها من الحركة...........مين الضحية فى القصة دى ؟
هى دى الفكرة...........علشان كده فيه ناس بتقولك لو واقف فى إشارة أكتر من دقيقة جيب العربية على ال n و دوس فرامل عادى.
فيه ناس تانية بتقولك كتر تحريك الفتيس بيضر بيه على المدى الطويل......أخنا لسه تايهين بين الناس دولهما و الناس دوكهما :)
عموماً فيه موضوع على ما أذكر فى قسم نيسان بيتكلمو على القصة دى............أنصحك تشوفه.

المشاركة الأصلية كتبت بواسطة mohammedaladel

24_ ما سعر جلدة الباب ؟

مش عارف بس أعتقد فيه ناس غيرته بحوالى 200 أو 300 جم بس مش فاكر للأربع أبواب ولا أتنين و لا أيه.

المشاركة الأصلية كتبت بواسطة mohammedaladel

أشكرك أستاذنا الكبير على صدرك الرحب وتواضعك من أجل منفعة الآخرين ليا ملحوظات كالآتى
بالنسبة للنقطة رقم 9 وأجابتها
اكتشفت ان التيل قدام 2 قطعة فى كل ناحية يعنى مجموع أربع قطع دى من برا

ودى من جوا بس مش هتبقى باينة غير لو فكيت النظام

ورا لاحظت نفس الحوار مع صغر حجم التيل

بالنسبة للطنبورة الخلفية الحوافى بتاعتها أكثر بروز يعنى لو مشيت إيديك على الإطار بتاعها هتلاقيه بارز أما المكان عن المكان اللى بيحك فيه التيل ولكن هى نفسها مستوية مفيهاش عالى وواطى يكون إيه دا ؟


بالنسبة للنقطة 21 دا كان رد حضرتك (بيأثر بس ممكن تكون بدرجة غير ملحوظة...
السؤال التانى لازم نعرف المقاس الأصلى كام و اللى متغير كام بالظبط
يعنى مثلاً الأصلى 15/195/60 و أنت مغير ل 15/205/55 و لا أيه بالظبط)
المقاس الاصلى لميجان عندى 16/205/55 وأعتقد إن الميجان ليها كذا مقاس أصلى مش مقاس واحد بس ولا حضرتك شايف إيه ؟


فى النهاية بقى يعنى إيه تطبيع التيل لما يكون جديد ؟؟

النقطة رقم 9..........معلش غلطة مطبعية...........كلامك صحيح.

البروز اللى فى الطنبورة الخلفية عادى من الإستهلاك.

الميجان كانت بتنزل ب 15/195/60 أو 16/205/55 فى مصر.....مش عارف نفس النظام ينطبق على اللى بينزل بره ولا لأ.

تطبيع التيل هى أن التيل ياخد نفس شكل الطنبورة ( لو فيها عالى و واطى حتى لو بنسبة صغيرة ممكن أنت مش تلاحظها ) و ده علشان التيل يمسك فى الطنبورة بأكبر قدر ممكن.