الموضوع: قلقان ومحتار..ساعدونى يا خبراء ال505

المشاركة الأصلية كتبت بواسطة atamim

اخى الكريم

كل عربيات البيجو رائعة المهم الحالة
و زى ما اخ فاضل قال ان 35 الف الله اعلم بحالتها اى لان فية ناس بتطلب اكتر
روح شوفها لو لقتها نظيفة و مش محتاجة اى شغل هات ميكانيكى يشوفها
لو كلة تمام توكل على الله

لو ملقتش انا عندى نصيحة قولتهالك فى مشاركتى السابقة
30 الف ممكن تجيب بيهم عربية المانى شبابى نظيفة
زى البولو و الكورسا 1200 سى سى موديلات التسعينات
و قطع الغيار الالمانى معمرة جدا زى الفرنساوى
و قطع غيار استعمال الخارج موجودة

البيجو القديم ياخد بنزين 80 و مواتيرة 1600 و 2000
البولو و الكورسا مواتير 1000 و 1200 بنزين 90
يعنى الفرق هو هو بالنسبه لمسافات المشاوير ماتور اكبر بنزين ارخص و ماتور اصغر بنزين اغلى

اهم من كل دا فى اى عربية انها تحس انها مش متهانه و صاحبها مهتم بيها
سواء كانت عربية كورى ولا ألمانى ولا فرنساوى
اهم حاجة الحالة
يعنى لوحد قال لك العربية مكيفة يعنى لازم يكون التكييف شغال و ما بتسخنش
ما ينفعش يتقال مكيفة و مش شغال او بتسخن
فهمتنى

يعنى الحالة الى بيعرضها للبيع جيدة جدا و مطابقة للى فى العربية

و كل العربيات الاوروبية تسافر مشاوير

انا هنا فى السعودية كنت اشتريت بيجو 206 و فيرنا
الاتنين رحت بيهم عمرة
المسافة بين الرياض لمكة 1100 كيلو رايح و زيهم راجع يعنى 2200 كيلو فى 24 ساعة
باخدهم حته واحدة فى 9 ساعات سواقة على سرعة 140/150 بدون اى راحة لدرجة رجلى تخشب على دواسة البنزين

فهمتنى
العربية النظيفة مهما ضغط عليها عمرها ما حتزعلك ولا تندل معاك

و ربنا يوفقك

لك جزيل الشكر أخى الفاضل.....أنا فهمت قصد حضرتك ان المهم (شرط الحالة النضيفة) لأى مستعمل....أنا شوفت النهاردة 505 مو82 2000 سى سى gr وان شاء الله ناوى افحصها سمكرة وميكانيكا وربنا يسهل ...لو دواخلها نضيفة والمكنة مثلا اوريجينال وشغالة 70 %....تتمسك على كام؟؟ طب تفرق معايا لو المكنة متسقطة؟ يعنى لو لقيتها متسقطة اصرف نظر عنها ولا مش مشكلة ؟؟ ومعروض عليا برضه جولف 2 مو 89 1600 ب 30 ألف....انا محتار الصراحة !!...ربنا يقدم اللى فيه الخير

المشاركة الأصلية كتبت بواسطة unendlich

شوف يا فندم
ال 505 (و ال 504 أكتر منها) عربيات لن تتكرر تاني أبداااا. كانت تجسد ال over engineering على أبوه (ضيف عليهم التمساحة كمان). زمان كان التفكير ازاي يركبك العربية أطول فترة ممكنة بأقل تكاليف ممكنة و شوف كده average تاكسي قالب عداد كام مرة و صارف كام. انهاردة للأسف هو بيدور ازاي ينفخك من غير متحس, يعني تعالي شوف تيل فرامل حاجة من الجديد تلاقيه بـ 400-500 جنيه و لما بيتشقلب بيقعد 15 ألف كيلو, تقوله ليه كده يقولك اصلنا شيلنا منه ال asbestos عشان نحافظ على البيئة و قيس بقى على كاتينة كاوتش, جلب ... الخ الخ.

نرجع لموضوعنا, ال 505 عربية ممتازة و ركوبة ملهاااااااش حل و لو حالتها تمام مش هتبقى عايز تنزل منها. قطع غيارها جايز تكون طبعا أقل من زمان عشان التاكسات ربنا يسامحهم كانوا بيشفطوا قطع غيار الحاجات دي شفط (ال 504 أكتر طبعا) و الحاجة طبعا معدتش رخيصة زي زمان بس لو العربية already حالتها حلوة مش مشكلة خلاص.

بالنسبة لل 405 فهي برده عربية ممتازة و صاجها برده تقيل نسبيا و عفشة ممتازة و باور و تكيف و الذي منه و قطع غيار متوفرة بسهولة جدا. مظنش ال budget اللي أنت حاطه يجبلك واحدة حالة اوستيك شغل فنادق انما لو تقدر تعلي شوية فهي بالتأكيد مش هتخليك تندم.

ربنا يوفقك

:b4_388::b4_388:
اللهم امين...نحن واياك يا استاذنا الكريم....كلام حضرتك زى ما بيقولوا (صادف هوى فى نفسى)...وبعدين طالما انا عايز اداء وتحمل وسفر يومى يبقى ميهمش سعر قطع الغيار طالما معمرة ومتوفرة

المشاركة الأصلية كتبت بواسطة y a r i s

واللهي الاخوة الاعضاء كفوا ووفوا
بس انا احب اضيف كلمتين .... بالنسبة لقطع غيار البيجو ٥٠٥ مش غاليه ولا حاجة
بس اغلبها الي مكتوب عليه ميد ان فرانس يعني صنع في فرنسا
هتلاقيه متصنع تحت بير السلم في عمارة في امبابة
وتيجي تركبوا من هنا وتبوظ من هنا وده الي خلاني ابيعها والكلام ده من ست سنين
فما بالك دلوقتي

@@@@@@@@@@@

بالنسبة لحتت البانزين بامكانك تقلبها غاز طبيعي وهتوفر معاك جامد
@@@@@@@@@@

انا معاك انها ركوبة. وعضم وسحب. وفتحت السقف دي غرام غرام غرام
بس كل وقت وليه أزان
مش عاوز اقولك كنت ببلطج على التريلات فيه وعلى سواقين النص نقل
ومره اتوبيس النقل العام كان. ايميها لونو احمر في ابيض. خبطني من الرفرف العربية اترفعت ونزلت تاني
ولا كان حصلها حاجة والاتوبيس كان بيهزر معاها

ومره كنت نازل من منزل كوبري. لقيت عربية بطيخ من ام حمار كاروا في وشي ملحقتش اضرب فرامل
مش عاوز اقولك الحمار طار فوق عمود النور والبطيخ اتفرش كده على الارض
وانا يادوبك غيرت شبكة وفنوس واستعدلت الكبوت

بس كان عيوبها فعلاً قطع غيار في السوق مضروبة ٩٥٪
في عندك كمان عيب خطير فيها الكهربا بتاعتها مقرفة وكل شوية تزبط تاكيهات
وكل شوية تلاقي العربية بطلت منك ولازم تفك حاجة صفرة كده في الكربريتر اسمها بيك سالانسية
ولازم يكون معاك ابرة ولا دبوس وتسلكو وتنفخ فيه ببوقك
وحاجة اجارك الله. .... ياراجل ده انا اتعلمت الميكانيكه على حسها
وكل اسبوع او يومين لازم تاخودها عن المكانيكي يبصلك عليها
ويزبطلك الموبينا

بس غير كده هيا عربية اسسسسسسسسد. وانا كان معايا الي هيا الشكل الطيارة الجديد

@@@@@@@@@@

بس خلي بالك انتا هتجيبها دلوقتي سيبك من ان بتوع القاهرة غشاشين
ههههه ( لان تصحيح للمعلومة اغلب تجار العربيات من الاقاليم )
وهما الي خربوا السوق ومولعين الاسعار
بس سيبك انتا .... عربية شوف عدى عليها كام سنة واكيد مش هتلاقيها فابريكة
ده اذا مكنتش مغيرة نص ولا ربع
ومكنتش كمان البارومة وكلاها وسرحه في كل حته

@@@@@@@

انا رأيي الشخصي هاتلك عربية سوزوكي ماروتي جديدة او كسر زيروا
قطع غيارها متوفره وعلى قد الايد وبتشم البنزين شم
وكل فين ولا فين لمن تاخودها على الميكانيكي. لان بهدلت الميكانيكية مش عاوز اقولك
وعطلة عطلة وطول ما انتا واقف عندوا تعزم بسجاير شوف تمن اقل علبة سجاير بكام دلوقتي
وعلى عناب وعلى حاجة ساقعه وكوبايت شاي على قهوة على حلبه
بتمن مشاريب بس كنت جبتلك عربية زيروا واشتريت دماغك هههههههه

@@@@@@@@@

وان كانت اسرتك كبيره يبقى هتلك بيجو ٤٠٥ وربنا يقدرك على مصاريفها
بس قطع غيرها برضوا يابلاش

@@@@@@@@
وتحياتي وتقبل مروري

حضرتك تشرف دايما....بس بأمانة صعب عليا الحمار هههههههههههههه
هوه موضوع قطع الغيار المضروب ده اول مرة اسمعه منك الصراحة...اللى انا اعرفه انه غالى بس اصلى !!!