قلقان ومحتار..ساعدونى يا خبراء ال505

**mohammed dodda** · 24-08-2012 12:28 AM

السلام عليكم ورحمة الله وبركاته....اسمى محمد وانا عضو جديد فى منتدى بيجو واتمنى انكم تقبلونى اخا بينكم...انا متابع المنتدى من شهور وانبهرت بمدى كفاءة وخبرة اهل البيجو على كل المستويات ....بسم الله ماشاء الله ناس محترمة وعاجنة الاسد وخبزاه كويس......المشكلة باختصار انى اعشق الاسد القديم 505 من زمان ووالدى الله يرحمه جرب ماركات كتير اليابانى والايطالى والكورى وانا جربتها على حسه طبعا...بس اول ما حوشت من مالى الخاص البيجو هو اللى معشش فى دماغى...روحت للميكانيكى اللى بنتعامل معاه وهو رجل خبرة لايستهان بها وعشرة عمر زى مابيقولوا 15 سنة بيصلحلنا عربياتنا وعرضت عليه فكرة ال505 ...للاسف حذرنى جامد من قطع غياره المولعة سواء المكنة او العفشة لكن فى نفس الوقت شكرلى فى ثبات العربية وسحبها وقوتها بس قالى انها فى الاخر تمانينات وجبلك واحدة كورى احسن الا لو ليك غية فيها...ارجو من اصحاب الخبرة واخص بالذكر الاستاذ الرائع هيرو والمحترم مازيراتى اللى اتعلمت من مجرد قراءة مشاركاتهم كتيييييييييييييييير جدا افادتى عن ال505....وربنا يجعله فى ميزان حسناتكم

**mohammed dodda** · 24-08-2012 12:41 AM

انا كنت مخصص ميزانية بحد اقصى 30 الف والموديل اللى نفسى فيه كان مع جوز خالتى زمان وهوه اللى حببنى فى البيجو كان تابلوه عادة وساعة ديجيتال وفتحة سقف روعة....على ما افتكر كان اسمه sr او اس حاجة مش متذكر...المشكلة ان كتير خوفونى من سوق الجمعة فى مصر وان التجار هناك يضحكوا على اجدع زبون والمبلغ ده كل اللى حيلتى.....ايه رأيكم فى المودبل ده وصيانته وقطع غياره واداؤه؟؟ والمبلغ ده ممكن يجيب حاجة فابريكة لانى مش عايز حاجة تبهدلنى...وربنا يجعله فى ميزان حسناتكم

**mohammed dodda** · 24-08-2012 12:44 AM

برضه ملاحظ حاجة غريبة فى المنتدى لو تسمحولى اقول رأيى وانا لسه جديد بينكم....الكلام عن ال505 قليل جدا بالمقارنة بانتشار الموديل وسمعته الممتازة مش عارف ليه..ده برضه من الحاجات اللى قلقانى

**atamim** · 24-08-2012 02:08 AM

و عليكم السلام ورحمه الله و بركاته اخى الكريم
طبعاالبيجو عربية رائعة جدا بس طبعا مع الوقت قطع الغيار بتقل و هية مش غالية للدرجة دى بس خلى بالك الماتور ال 2000 سى سى حاليا انت تقدر تصرف على بنزينه ؟

بص فية عربيات كتيرة غير ال 505 ممكن تلاقيها لف فى السوق و اتفرج و عاين و ربنا معاك

انا لقيت بيجو 106 الى هية ما بين ال 205 و ال 206 و نظيفة جدا و كنت عايز اتكلم مع الراجل فى 22 بس مش راضى العربية دى اى قليلة فى مصر بس قطع الغيار هية بتاعة ال 205 تقريبا بس انا لو جيت ابيعها حقعد جمبها فترة كبيرة

فية عربيات بياعة
لو انت لقيت حاجة كورى نظيفة ب 30 حتلاقى لها سوق كبير فكر فى ال هيونداى اكسل تكييف و باور و ازاز كهرباء و قطع غيار رخيصة

فكر فى الالمانى البولو و الكورسا تسعينات

**mohammed dodda** · 24-08-2012 02:09 AM

ايه يارجالة ال505 انتوا مش موجودين ولا ايه؟ 16 مشاهدة ومحدش عبرنى بمعلومة! اى عضو خبير يفيدنى الله يكرمكوا عشان مغلطش واندم على اختيار اخدته بدون علم :( :(

**mohammed dodda** · 24-08-2012 02:15 AM

المشاركة الأصلية كتبت بواسطة atamim

و عليكم السلام ورحمه الله و بركاته اخى الكريم
طبعاالبيجو عربية رائعة جدا بس طبعا مع الوقت قطع الغيار بتقل و هية مش غالية للدرجة دى بس خلى بالك الماتور ال 2000 سى سى حاليا انت تقدر تصرف على بنزينه ؟

بص فية عربيات كتيرة غير ال 505 ممكن تلاقيها لف فى السوق و اتفرج و عاين و ربنا معاك

انا لقيت بيجو 106 الى هية ما بين ال 205 و ال 206 و نظيفة جدا و كنت عايز اتكلم مع الراجل فى 22 بس مش راضى العربية دى اى قليلة فى مصر بس قطع الغيار هية بتاعة ال 205 تقريبا بس انا لو جيت ابيعها حقعد جمبها فترة كبيرة

فية عربيات بياعة
لو انت لقيت حاجة كورى نظيفة ب 30 حتلاقى لها سوق كبير فكر فى ال هيونداى اكسل تكييف و باور و ازاز كهرباء و قطع غيار رخيصة

فكر فى الالمانى البولو و الكورسا تسعينات

ربنا يكرمك يا غالى ويجعله فى ميزان حسناتك...كفاية انك عبرتنى وبتساعدنى.....انا لسا اخويا متصل بيا من ساعة و جايبلى عربية 405 1600 مو 94 على 35 ألف.....الصراحة يا استاذنا ان اتمنى ركوب البيجو ...عربية ناعمة ومحترمة...وقطع غيارها على ما اسمع بتعمر جدا...ايه راى حضرتك فى ال405

**mohammed dodda** · 25-08-2012 05:15 AM

طيب.....انا ممكن اعدل السؤال عشان تفهمونى : عايز عربية معمرة ( يعنى مش هغيرها قريب) تستحمل السفر 120 كم 5 ايام اسبوعيا وفى حدود من 30 الى 35 الف جنيه حد اقصى حسب امكانياتى

**Unendlich** · 25-08-2012 02:15 PM

شوف يا فندم
ال 505 (و ال 504 أكتر منها) عربيات لن تتكرر تاني أبداااا. كانت تجسد ال over engineering على أبوه (ضيف عليهم التمساحة كمان). زمان كان التفكير ازاي يركبك العربية أطول فترة ممكنة بأقل تكاليف ممكنة و شوف كده average تاكسي قالب عداد كام مرة و صارف كام. انهاردة للأسف هو بيدور ازاي ينفخك من غير متحس, يعني تعالي شوف تيل فرامل حاجة من الجديد تلاقيه بـ 400-500 جنيه و لما بيتشقلب بيقعد 15 ألف كيلو, تقوله ليه كده يقولك اصلنا شيلنا منه ال asbestos عشان نحافظ على البيئة و قيس بقى على كاتينة كاوتش, جلب ... الخ الخ.

نرجع لموضوعنا, ال 505 عربية ممتازة و ركوبة ملهاااااااش حل و لو حالتها تمام مش هتبقى عايز تنزل منها. قطع غيارها جايز تكون طبعا أقل من زمان عشان التاكسات ربنا يسامحهم كانوا بيشفطوا قطع غيار الحاجات دي شفط (ال 504 أكتر طبعا) و الحاجة طبعا معدتش رخيصة زي زمان بس لو العربية already حالتها حلوة مش مشكلة خلاص.

بالنسبة لل 405 فهي برده عربية ممتازة و صاجها برده تقيل نسبيا و عفشة ممتازة و باور و تكيف و الذي منه و قطع غيار متوفرة بسهولة جدا. مظنش ال budget اللي أنت حاطه يجبلك واحدة حالة اوستيك شغل فنادق انما لو تقدر تعلي شوية فهي بالتأكيد مش هتخليك تندم.

ربنا يوفقك

**mohammed dodda** · 25-08-2012 07:41 PM

مشكور جدا يا سيدى الفاضل ....لكن للاسف دى اقصى ميزانية اقدر عليها....ممكن تكون قليلة على 405...لكن على 505 موديل عادة !!! ده يبقى افترا والله من اصحابها....

**atamim** · 25-08-2012 07:48 PM

المشاركة الأصلية كتبت بواسطة mohammed dodda

ربنا يكرمك يا غالى ويجعله فى ميزان حسناتك...كفاية انك عبرتنى وبتساعدنى.....انا لسا اخويا متصل بيا من ساعة و جايبلى عربية 405 1600 مو 94 على 35 ألف.....الصراحة يا استاذنا ان اتمنى ركوب البيجو ...عربية ناعمة ومحترمة...وقطع غيارها على ما اسمع بتعمر جدا...ايه راى حضرتك فى ال405

اخى الكريم

كل عربيات البيجو رائعة المهم الحالة
و زى ما اخ فاضل قال ان 35 الف الله اعلم بحالتها اى لان فية ناس بتطلب اكتر
روح شوفها لو لقتها نظيفة و مش محتاجة اى شغل هات ميكانيكى يشوفها
لو كلة تمام توكل على الله

لو ملقتش انا عندى نصيحة قولتهالك فى مشاركتى السابقة
30 الف ممكن تجيب بيهم عربية المانى شبابى نظيفة
زى البولو و الكورسا 1200 سى سى موديلات التسعينات
و قطع الغيار الالمانى معمرة جدا زى الفرنساوى
و قطع غيار استعمال الخارج موجودة

البيجو القديم ياخد بنزين 80 و مواتيرة 1600 و 2000
البولو و الكورسا مواتير 1000 و 1200 بنزين 90
يعنى الفرق هو هو بالنسبه لمسافات المشاوير ماتور اكبر بنزين ارخص و ماتور اصغر بنزين اغلى

اهم من كل دا فى اى عربية انها تحس انها مش متهانه و صاحبها مهتم بيها
سواء كانت عربية كورى ولا ألمانى ولا فرنساوى
اهم حاجة الحالة
يعنى لوحد قال لك العربية مكيفة يعنى لازم يكون التكييف شغال و ما بتسخنش
ما ينفعش يتقال مكيفة و مش شغال او بتسخن
فهمتنى

يعنى الحالة الى بيعرضها للبيع جيدة جدا و مطابقة للى فى العربية

و كل العربيات الاوروبية تسافر مشاوير

انا هنا فى السعودية كنت اشتريت بيجو 206 و فيرنا
الاتنين رحت بيهم عمرة
المسافة بين الرياض لمكة 1100 كيلو رايح و زيهم راجع يعنى 2200 كيلو فى 24 ساعة
باخدهم حته واحدة فى 9 ساعات سواقة على سرعة 140/150 بدون اى راحة لدرجة رجلى تخشب على دواسة البنزين

فهمتنى
العربية النظيفة مهما ضغط عليها عمرها ما حتزعلك ولا تندل معاك

و ربنا يوفقك