الموضوع: طلب تسعير صاروخ جولف 4 موديل 2002

أنا دارس الموضوع ده كويس لإنى كنت ناوى أنزل عربيتى من السعودية .
لازم تكون تاريخ شرائك للسيارة هو سنة 2002 -مافيهاش كلام - و معنى تاريخ شراء السيارة هو التاريخ بتاع برنت المرور يعنى شهادة المرور تكون مكتوب فيها إنك أول واحد طلعت إستمارة -رخصة- السيارة بإسمه و إنك إمتلكت السيارة سنة 2002 إلا إذا كنت مالى إيدك إن الأمير ده له سكك فى المرور يعرف يخلصها و أنصحك ما تدفعش الفلوس كلها إلا لو إدالك البرنت ده لإنه ممكن يخدعك و بعد ما تدفع تروح توثق فى السفارة ماتعرفش.
حاجة تانى حتقابلك هى توثيق شهادة المنشأ من الخارجية السعودية و دى لازم تبقى على فاتورة أصلية طالعة من البائع أو فى حالتك تبقى على أساس ورق الجمارك اللى العربية دخلت بيه من دبى .لازم يبقى بإسمك (إسأل فيها فى الغرفة التجارية الأول) لإن فى بعض الحالات بيعتبروا السعودى على إنه بديل للوكيل الأصلى

نيجى للجمارك . لاحظ إن أقصى خصم هو 10للسنة الأولى و 5 لكل سنة لغاية أول 5 سنين يعنى أقصاه 30% وبيتحسب من حاجة إسمها السيف وارد مش تمن العربية زى الناس فاهمة . السيف وارد cif يبقى تمن العربية + مصاريف الشحن 100دولار على كل مترمكعب من حجم العربية+التأمين 2.5% +التفريغ 1%
و خد بالك إن نسبة الخصم تطبق على سعر السيارة قبل حساب الجمارك بعد كدة حيحاسبك على 135% جمرك ثم 45% ضريبة مبيعات +8.5% رسم تنمية .تقريبى بيحسبوها 247.5 % من تمن السيارة قبل السيف . يعنى بالبلدى خد تمن عربيتك و إضربه فى 70% ثم إضرب فى 247.5%.

معلش أنا طولت عليك .سامحنى