طلب مساعدة - هشتري ايفو و متردد

**MorSee** · 25-08-2012 04:24 AM

بسم الله ..

قريت موضوع ا.وائل الرهيب عن البونتو ايفو هنا :
http://www.nilemotors.net/Nile/189478-pk2.html

و اعبجت بالعربيه جدا بالصراحة ، لدرجة الوهم ..

بس متردد جدا في شرائها لسببين رئيسيين :
- الـ resell بتاع العربيه ، خصوصا ان سعرها جديدة مرتفع اصلا بالنسبه لحجمها ..
- الـ"ـتوكيـــــل" و ده الاهم ، لان حسب سماعي ففيه مشاكل كبيره في التوكيل بتاعها و فيه حاجات بيبوظوها و حاجات بتبوظ و مبيعرفوش يتعاملوا معاها ..
و خصوصا اني معنديش استعداد اشتري عربيه زيرو و تتعبني في اول 4 سنين في الصيانة و بهدله قطع الغيار

افيدونا يرحمكم الله

و شكرا مقدما ( :

**medoghaly** · 25-08-2012 07:35 AM

نصيحة ابعد عنها توكيلها زفت و فيه ناس بتظهر معاها عيوب

**tarabily** · 27-08-2012 02:19 PM

انا شخصيا العربيه معايا بقالها سنتين مفيش منها مشاكل خالص والحمد لله مرتاح معاها
بالنسبه للتوكيل انا مفيش معايا مشكله معاه لأن بعمل الصيانه الدوريه فقط مفيش غير مره واحد كسرى الفانوس الأمامى جيبته منهم 1450 جنيه وده بالمقارنه [اسعار الأوروبى عادى

**maxx** · 27-08-2012 05:45 PM

بخصوص موضوع العيوب اللي بتظهر ... مفيش موديل بينزل و كل عربياته تطلع 100 % سليمة

موضوع ان عيب يطلع فى عدد من العربيات ده بيحصل فى الكل ...

المشكلة ان يبقي في عيب عام ... و ده ما سمعتش عنه فى الفيات الايفو تماماً مفيش حاجة شوفت الناس هنا على المنتدي بتشتكي منها بشكل متكرر على العكس من حاجات تانية

بخصوص التوكيل ... أغلب الوكلاء مستواياتهم سيئة (خد لفة فى المنتديات المختلفة للسيارات هنا) نادر ما تلاقي حد بيشكروا فيه (الوحيد اللي شوفت الناس بتشكر فيه نيسان) و الباقي ما بين تقييمه من جيد ل عادي ( كيا و رينو) و شكوى (منصور و غبور ) و يلحق بهم عن جدارة اوماترا توكيل فيات

بس العربية كل اللي جابها بيشكر فيها جداً ... شوف المواضيع بنفسك على المنتدي ...

بخصوص قطع الغيار ما تسمعش اللي بيقولك غالية و نار و الكلام ده ... قارن على ارض الواقع بين قطع الغيار في الايفو و قطع الغيار فى نفس الشريحة السعرية من الكورى و الياباني من موديلات نفس العام

هتلاقي ان الفروق مش كبيرة ابداً و اللي دفع دي يدفع دي خصوصا انها حاجات ما بتتغيرش الا كل فترة مش قليلة

الإيفو نفس قطع غيار البرافو و اكيد الجراند بونتو و اللينيا و حاجاتها يمكن مش موجودة عن كل الناس زي الهيونداي / الكيا الخ ... بس في محلات ليهم برا و هتلاقي في المنتدي مواضيع لناس اشترت حاجات ليها من محلات برا التوكيل و اشهرهم ... كيلاني

العربية انتشارها بدأ يزيد (او يمكن انا اللي مركز معاها d: ) و ده في مصلحة زيادة توافر قطع الغيار خارج الوكيل

بص ... انت تاخد لفة فى مواضيع المنتدي

يعني مثلا اكتب فى البحث بتاع المنتدي (ايفو) هيجبلك المواضيع اللي مذكور فيها الكلمة و اللي اغلبها هيكون متعلق بالعربية - هتلاقي موضوعات عن تقارير - قطع غيار - مشاكل و ازاي الناس اتغلبت على المشاكل دي

المشاكل دي بتبقي حاجات فردية مش عامة و متكررة ... و دي بتبقي حظ كده فى العربية تجيب عربية زيرو حتى لو فيرارى و يطلع فيها حاجة مش مظبوطة :(

و علشان تتأكد من النقطة دي خد لفة اختها فى اقسام تانية هتلاقي الشكاوي عموماً نوعين
متكررة و عامة فى موديل معين
و فردية حالات كده بتحصل بالحظ مع ناس ...

ممكن تلاقي حالات فردية مع فيات ايفو
بس عامة انا قلبت المنتدي و اماكن تانية على النت ما لقتش شكوى متكررة :)

انا مش معايا العربية بس ناوي ان شاء الله على السنة الجديدة و ربنا يكرم يا ايفو زيرو ... يا برافو مستعملة :)

**macdiv** · 27-08-2012 05:50 PM

خليك في المانيوال احسن

**sweetvolcanoo** · 28-08-2012 06:56 AM

العربية ماشاء الله زي الفل.انا كان معايا سيراتو و اضطريت ابيع واحدة فيهم و بدون تفكير او لحظة تردد قولت للسيراتو........طيري انتي

**sweetvolcanoo** · 28-08-2012 06:59 AM

و علي فكرة و عن تجربة الفتيس الدوالوجيك ده حاجة ممتعة لما تاخد عليه اوعي حد يقلقك منه و ده عن تجربة و احلي كمان من الاوتوماتيك العادي اللي لازم تفضل دايس فرامل طول ما انت واقف و حاجة تشل

**ahmedsiyam** · 28-08-2012 11:44 AM

خدها قاعدة
اى عربية اوروبى ركوبة محترمة و فخيمة جدا جدا
الايفو عربية جميلة جدا جدا و انا كنت هاجيبها زيرو لكن بالنسبة ليا حسيت انها صغيرة شوية علشان كده جبت برافو مستعملة علشان الحجم
انما ان شاء الله مش هاتندم وربنا يوفق