أهمية الصيانة الدورية المجانية لسيارات رينو

**Ahmed Selim** · 29-06-2008 09:59 AM

السلام عليكم
كان فى مشاركة تانية أتضح فيها أن فى بعض الأعضاء مش عارفة أهمية الصيانة الدورية اللى بتتعمل كل 5000 كم
المهم قلت أوضح أهمية الموضوع عشان اللى ميعرفوش

من المعروف أن فى صيانة كل 10000 كم ودى اللى بيتم فيها تغيير الزيت بصفة أساسية مع بعض الحاجات التانية اللى ممكن تتغير وممكن لأ زى البوجيهات والتيل والفلاتر

رينو عاملة صيانة مجانية كل 5000 كم يعنى على ال 5000 و ال 15000 وال 25000 كم وهكذا للمراجعة على العربية بالكامل ( نسب المياه والزيوت, الكهرباء و تربيط العفشة ) بالأضافة الى كشف سريع لملاحظة أى نوع من أنواع التسريب ( مياه أو زيت ) وكمان عشان الكمبيوتر بتاع العربية لو فيه أى ملاحظات مسجلها يشوفوها وهى دى بالذات مربط الفرس.......... ليه ؟

عشان كمبيوتر العربية من الذكاء أنه يعرف العيب فى بداية ظهوره وقبا ما يتحول الى مشكلة حقيقية مما ينتج عنه حل السبب فى العيب قبل تحوله الى مشكلة.

الجدير بالذكر أن مهندس أعرفه فى التوكيل قاللى أن الصيانة الدورية المجانية شرط أساسى لعدم الخروج من الضمان لأنها تمكنهم من كشف عيوب بسيطة قد تؤدى الى مشاكل كبيرة فيما بعد.

الرجاء المحافظة على الصيانة الدورية المجانية على قدر الأمكان