الموضوع: تقرير صيانة 30000 كم لسيفيك الجيل التامن

صباح الخير
امبارح رحت التوكيل عشان صيانة ال 30000 كم طبعا كنت حاطط ايدي على قلبي لعدة اسباب
اولا كنت خايف ليكون المطب الزفت اللي فرقع العجله يكون اثر على العربيه و اكع دم قلبي
ثانيا العربيه الى الان ما اتحطش فيها غير زيت و فلتر فكنت متوقع فيلم اقله تيل امامي و خلفي و مصنعيات تغييرهم و سلطات و بابا غنوج
المهم سلمت العربيه الساعه 10بعد ما قلت كافة الملاحظات الخاصه بالعفشه و الفرامل
قعدت ملطوع لحد الساعه 2 و كل ما اسأل يقولوا لسه قلت ليكونوا طلعوا يجربوها و خيشوا بيها زي ما حصل مع واحد صاحبي و يروح عليا الكاوتش الجديد قمت متنرفز و قلت لموظف الاستقبال لو سمحت عايز اشوف عربيتي حالا راح مدخلني الورشه و لقيت العربيه مرفوعه قلت له شكلكم لسه هتعملوها قال لي يا فندم هي اتأخرت عشان خرطنا الطنابير قلت له طب ما غيرتش ليه في الضمان قال لي لسه التخانه بتاعتها في حدود الموصي به من اليابان و غالبا هيغيروها على ال40000 المهم بصيت بعيني على العربيه من تحت لقيتها تمام و الحمد لله و سألت على الجنب اليمين بتاع المطب قالوا ما فيهوش الهوا
فضلت قاعد لحد الساعه 4:15 لما كنت استويت و خدت الفاتوره عشان احاسب فوجئت ان التكلفهالاجماليه 408جنيه الخاصه بالزيت و الفلتر و المنظفات و المصنعيه معقوله بس؟
طب اخبار التيل ايه ؟ قالوا التيل قدام و ورا لسه قدامه 10000 كم كمان يعني على 40000 كم نشوف طب مافيش مصنعيه للخراطه ؟ مافيش
المفاجأه اللذيذه كان الاكصطدام الامامي منطور من جنب الرفرف و مفارق مهما ازقه لقيته مربوط فابريقه بصراحه ناس كلها ذوق و شياكه
ادي يا سيدي العربيه اللي عمالين يقولوا قطع الغيار مولعه هتقعد 40000 كم من غير مصاريف على كده ممكن الواحد يبيع مثلا و ما يحطش مليم زياده عن الزيت
و ادي ياسيدي التوكيل اللي بيقولوا عليه قرنات كان ممكن يغير في تيول و يحسب مصنعيات و كله مكسب
و كان فيه تقرير عن صيانة 30000 كم للفلوانس عمله زميلنا القديم يالهوي اللي فرط في الهوندا عشان العزل (اه لو يعرف موضوع الكاوتش) و اترزع 1980 جنيه وكل اللي عمله زيت و فلتر و ركب قطعة غيار تمنها 150 جنيه

المشاركة الأصلية كتبت بواسطة semsem kane

الف مبروك ياباشا على صيانة ال 30000 الف وعقبال كدة يارب ماتعمل 3,000,000 كيلو

وفعلا توكيل هوندا محترم جدا وجامد جدا , لان ببساطة الهوندا ماينفعش يتشغل فيها غير الجامدين بس

الله يبارك فيك
نفسي الناس لما تحسب التكلفه تحسبها بالنسبه لعمرها الافتراضي
و في الحاله دي هتلاقي قطع غيار الهوندا رخيصه
يعني مثال في الباسات غيرت التيل الخلفي على 15000 و الامامي 25000 يعني متوسط 20000 للاتنين نصف العمر الافتراضي للهوندا رغم انهم نفس القيمه
ولو طبقنا الكلام ده بالنسبه للكوري مش بعيد تطلع قطع غيار الهوندا ارخص اه معاك ان سعر الاكسسوار نار زي الفوانيس و المرايات بس ده لو حصل خبطه لا قدر الله و اللي راكب عربيه محترمه لازم يتحمل

المشاركة الأصلية كتبت بواسطة ahmedeihab

يا استاذى هو بيتكلم على عدد الكيلو مترات اللى عملها التيل الامامى و الخلفى

بمعنى ان ده نصف العمر الافتراضى اللى تيل الهوندا عمله

^_^

بالظبط كده و اللي فاكره ان التيل الخلفي بتاع الباسات بتركيبه عمل 750 جنيه (عمل 15000 كم ) مقابل 550 بالمصنعيه للهوندا( معانا ل 40000) نفس السواق و اسلوب السواقه عشان محدش يقول عيب سواق في الباسات

المشاركة الأصلية كتبت بواسطة gellish

معلش لي تعليق صغير على موضوع تيل الفرامل
التيل ملوش عمر افتراضي او كيلو متر يتغير عنده زي الزيت و الفلتر
تغيير التيل و العفشة بيكون على حسب الإستخدام
واحد صديقى معاه باسات 2010 لسة مغير التيل الخلفي فقط مع صيانة ال 55 الف و التوكيل قاله الأمامي ممكن يتغير مع صيانة ال 65 الف بس حيكشفوا عليه الأول

حضرتك انا عارف الكلام ده
بس لما نفس السواق و نفس المشاوير يبقى الكلام مظبوط مع العلم ان الهوندا بعد الباسات بسنتين يعني الزحمه اكتر بحكم ان كل سنه انيل من اللي قبلها
و الارقام اللي حضرتك قايلها طبعا وارده لو السواقه اغلبها طوالي

مبروك ياباشا