غيرت زيت فتيس الياريس والموتور بنفسى

**asemx1** · 27-08-2012 11:25 AM

السلام عليكم
امبارح قولت كدا اما انزل الغيار الزيت الى غيرته من 10 الاف كيلو لزيت الفتيس وكانت القصه انى غيرت الزيت بتاع الفتيس لاول مره على 80 الف كيلو فنتج عن كدا اتساخ مجموعه الفتيس وان الزيت كان نازل محروق نهائيا

فقولت بقى اما انزل اعمل الحوار دا وبالمره انزل زيت الموتور واغير الفلتر

هوب فكيت الاكصدام كله وطلعته بره وجيت للمنطقه الصعبه المصفحه تقيله بدرجه لا تتخيلوها وصلبه جدا
قولوا بسم الله ماشاء الله الياريس فعلا تستاهل دا وزن المصفحه لواحده معدى 20 كيلو ومش موجوده فى عربيات كتير زى الفولكس الباسات ( عن تجربه مع دكتور خبط فى بلاعه مش عايز اقولكم ان الماتور كان على الارض علشان الكراسى بتاعت الماتور اتدغدغت وكان على سرعه 50 كيلو بس )

بعد ما فكيت المصفحه فكيت المسمار بتاع طبه الزيت ونزلت الزيت كله
وبعدها قولت بقى بدام فكيت المصفحه ما افك الطبه كلها وانظف فلتر الزيت بتاع الفتيس
قومت فاكك 20 مسمار بالتمام والكمال ونزلت اخر فسفوسه زيت
فكيت الفلتر ونظفت الكلام دا كله بالكمبروسور وقمت مغير زيت المحرك وركبت كله والحمدلله

الصور هرفعهالكم بعد ما اخف من الام الجسم الشديده كل جسمى مكسر بسبب المجهود والنوم تحت العربيه
هيبقى بازن الله فى موضوع جديد

نرجو من الساده تغيير زيت الفتيس باستمرار انا فى رائى دا اهم من زيت الموتور زيت الفتيس لو اتاخر عن 40 الف كيلو بيعمل مشاكل فى النقل وممكن يبوظلك الفتيس كله وساعتها مش هتصلح دا انا هتغير

تحياتى لكم وانتظروا الموضوع الجديد بالصور

م\ عاصم جاد

**Motaz.Habib** · 27-08-2012 01:30 PM

سؤال
هو الفتييس لية فلتر علشان انا كل لما اسئل حد يؤلى رد مختلف
شوية صفاية و مش بتتغير لا دى بتتغير لا مفيش حاجة اسمها صفاية دة فلتر و فى واحد فاحمد سعيد متخخص فالكلام دة و التوكيل نفسة كان متخبط فكلامة فياريت تفدنى انا عامل بالعربية 90000 و غيرت الزيت مرتين عند 40000 و 80000 بس عايز اعرف حوار الفلتر او الصفاية دة اية ظروفهم

**myself112** · 27-08-2012 02:32 PM

ربنا يديك الصحة يا باشمهندس :)
مستنيين الصور ..........

**Ahmod** · 28-08-2012 10:35 AM

الف شكر ليك يا باشمهندس عاصم واحنا مستنين الصور !!

بس انا مش معاك في نقطة تغيير زيت الفتيس

هو عموما الكلام كتير في النقطة دي والواحد ماكنش عارف الصح فين !! اللى بيقول نغيره عند 60 الاف واللى بيقول نغيره عند 80 الاف واللى نقول تغيره عند 40 الاف !!

قمت فاتح الكتالوج بتاع العربية وقلت اشوف

دي صورة من كتالوج العربية

زي مانت شايف !! اللى بيكون مكتوب جمبه س عند كم معين معناه لازم يتغير !! اما ك ده معناه مجرد تفحص

+

في الصفحة اللى بعدها الكتالوج بيوصي بعدم تغيير زيت الفتيس تحت ظروف القيادة العادية

+

لو مسكت مقياس زيت الفتيس اللى موجود في حجرة الماتور في العربية هتلاقي مكتوب عليه التالي

No Need to change or replace the fluid transmission under normal driving conditions

اللى فهمته وبإختصار طول مالواحد سواقته عادية مش محتاج يغير زيت الفتيس خصوصا الاتوماتيك !! يعني من الاخر كدة الزيت اللى نازل في العربية Life long وقصة انه يفقد خواصه دي لو فعلا موجودة كانت اتذكرت في الكتالوج !!! ده كاتبين في الكتالوج وكمان على مقياس الزيت في حجرة المحرك !! الزيت مش محتاج يتغير

بعكس زيت الفرامل اللى كل الناس بتقول انه مش بيفقد خواصه الا ان الكتالوج بيوصي وبشدة تغييره كل 40 الاف كم

--------

كمان مكتوب في الكتالوج بالتحديد في صفحة 232 !!

محددلك امتى تبقى محتاج تغير زيت الفتيس

اللى مكتوب كالتالي

1- لو بتستخدم العربية في حالة : قطر مقطورة / استخدام عربية رحلات او حاملة سقفية

2- القيادة المستمرة بسرعة عالية (80% او اكثر من السرعة القصوى للسيارة ) يعني الناس اللى بتعدي ال 140 بشكل مستمر

طيب الحالتين دول يغيرو زيت الفتيس امتى !! ؟؟

مكتوب تفحص !! عند 40 الاف وتغير عند 80 الف !! ومش جايبين سيرة عن فلتر زيت الفتيس نهائيا !!

وبالنسبة للمانويل يغير كل 40 الاف كم !!

اعتقد بعد كلام الكتالوج اللى يغير زيت الفتيس الاتوماتيك قبل 80 الاف كم هيبقى بيصرف فلوس على الفاضي !! الواحد ممكن يبقى يغيره من باب الاحتياط ليس الا لكن حرام ينزله على كم قليل

انا نزلته على 40 الاف كم وبصراحة مش حاسس باي فرق يذكر

**احمد فهمى** · 28-08-2012 01:43 PM

مجهود كبير وفى انتظار الصور بس زيت الفتيس بيتغير من ٦٠ ل٨٠ حسب الاستخدام لكن ٤٠ دى مده قليله جداً

**Y a r i s** · 29-08-2012 04:19 AM

واللهِ برافوا عليك يا باشمهندس عاصم. بس ياريت يا غالي لمن تنزل الصور تحط عليها علامة مائية باسمك لاني كل ما اروح منتدى هنا ولا هنا ابص الاقيهم منزلين موضوعك وسارقين مواضيعك
تيبكل بالصور ..... وبجميع التفاصيل ..... وبالذات موضوع عزل اليارس

ده حتى تويوتا فور عرب. الي ولدوا جابلوا كاسيت من السعودية واتثبت الموضوع فوق
واحد جه خد الموضوع من عندنا هنا بالصور بتاعتوا من نايل موترز وحطو بعنوان اجمل كاسيت للكورولا ههههههههه في منتدى اخر لا ومجمع جميع اسئلت الاعضاء هنا ومختصر وكاتب جميع الاجبات بتاعت تيوتا فور عرب علشان محدش يسئلوا ومن غير كملة منقول حتى
وفي انتظار موضوعك يا غالي ههههههه ويمكن جميع منتديات تويوتا. مستنية موضوعك ههههههه

**Ahmod** · 29-08-2012 09:27 AM

المشاركة الأصلية كتبت بواسطة حماده المصري

ياباشا ومين قالك انه القياده في مصر عاديه

دي قياده ال stop and go هي دي من اكتر الحاجات الي بتتعب العربيه على عكس لما تكون في مدينه نضيفه اشاراتها محدهه بتمشي في الشارع فتره جميله بعدين تقف انه تقعد كل شويه تمشي وتقف وتمشي وتقف وتيجي تدي كيك داون او يجي الغيار ينقل للاعلى فجاه واحد يرمي عليك تقوم دايس فرامل مينقلش الفتيس يقوم هوا ياخد باله ويرجع لحارته تقوم انت دايس كيك داون دي حاجه زي الزفت

وبعدين الراجل لما غير زيت الفتيس اول مره كان محروق تماما وده هو الخطر بعينه لو مكانشي غيره كان الفتيس هيضرب منه والحمد لله انه غيره واشتغلت تمام
الفكره بقى لو الزيت الي انت لسه منزله ده نزل نضيف يبقى الجير زي الفل
لو نزل محروق مع انه لسه مبقالوش 10 الف يبقى في حاجه بس متفتحش على نفسك فتحه مالهاش لازمه

ب

يا باشا الزحمة مش هتاثر في الفتيس الاتوماتيك العادي زي مانت متخيل !! ؟

الزحمة ماشي معاك تاثر في الفتيسات اللى اساسا مانويل وفيها دبرياج كهرباء زي ال DSG وال MMT

لان كتر النقل بالفتيسات دي بيعملها مشكلة ولخبطة

اما الفتيس الاتوماتيك العادي اللى موجود في الياريس طول مانت في الزحمة طول مالعربية على الاول يعني مافيش اي مجهود على الفتيس !

وبعدين ماهو حددلك في الكتالوج الظروف الخاصة اللى تبقى محتاج فيها انك تغير زيت الفتيس !!

وماجبش سيرة الزحمة نهائيا !! ؟

وبعدين اقولك حاجة لو كان الزيت بيستهلك في الزحمة كان هيبقى ليه عمر افتراضي بعد x من الشهور هيقولك يتغير

لكن طول مالزيت Life long يبقى الزحمة او كتر الاستهلاك مش هيفرق معاه في حاجة !!

انا مش معترض على ان الواحد يغيره من باب الاحتياط لكن ماحدش يغير على كم قليل

وفي حاجة برضوا ان انت لو فرضا رحت غيرت زيت الماتور وعملت مشوار واحد ورحت نزلته هتلاقيه برضوا نازل لونه متغير