الموضوع: عظـــــــــــــــــــــمة الالماني

بجد الله يبارك لكم و ينور عليكم
انا عارف انى مش هاضيف جديد بالنسبة للخبراء اللى زيكم لان انا كل علاقتى بالعربية انى اسوقها بسسسسسسس و ما افهمش اى حاجة تانى (بس يبدو كده ان الفورد هاتعلمنى الادب )
عموما انا ركبت عربيات كتير مختلفة المنشأ و فعلا فيه فرق كبيررررر
بس السوق عموما عرض و طلب و قطع الغيار هى اللى بتحكم سعر العربية يعنى العربية سعرها عالى عشان قطع غيارها رخيصة او هى رخيصة عشان قطع غيارها عالية (او مش موجودة )
ده طبعا من غير الكلام فى عمر قطعة الغيار يعنى قطعة الغيار الاوروبى المستوردة بتعيش اقل حاجة سنتين ده لو انت مفترى انما باسم الله ما شاء الله الكورى بتغيرها مرتين فى السنة لو انت من المحافظين (و حاليا فى الجديد قطع الغيار عالية برضه مش رخيصة زى القديم )
هى العبرة كلها لو هاتقدر على مصاريفها هاتها لانك فى الغالب مش هاتعرف تنزل منها الا لحاجة فى نفس المستوى اوروبى برضه ان لم يكن نفس النوع مهما كانت مشاكلها (الا لا قدر الله الظروف)
ما ينفعش تقارن الاوروبى عموما بالكورى حتى لو من نفس الفئة (ده رايى الشخصى)
يعنى لو قلنا الصاج احنا مش جايبينها عشان نخبطها ماشى طيب تعمل ايه لما تنزل فى امان الله من البيت تلاقى الباب اليمين حاضن الباب الشمال دى طبيعة البلد يا سيدى اللى بتخليك تفكر فى الصاج
لكن كله كوم و الفرامل كوم تانى حد فكر يجرب فرامل الانترا 2007 على 160 فجاة لاى ظرف ؟؟
(استثنى فرامل السيفيك اليابانى ) و جرب فرامل البى ام 92 على 220 ؟؟؟؟؟؟؟؟؟؟ ربنا ما يحكم عليكم ابداااااااا
حد يقول ان الماروتى تعمل total lost فى الانترا 2007 على 140 ؟؟؟ و البى ام تنزل من 220 ل 120 فى 6 متر و تاخد بيها غرزة نجاة و تعلى تانى ل 180 فى ما فيش ؟؟
مع العلم ان دى 2007 و دى 1992 ؟؟؟؟؟؟؟؟
و لا الثبات يا نهار اسود جرب كده تعدى بين مقطورتين بالفيرنا او اللانوس و احمد ربنا انك عديت ما فيش تحكم بالعربية و الهوا بيوديك زى ما هو عاوز اركب بقى الفكتر a 1995 تحس انك مكلبش فى الارض و تسمع صوت الكاوتش بينطر الاسفلت و يخلعه من مكانه و العربية بتروح زى ما انت عاوز (الحمد لله ) مش زى ما هى عاوزة
استثنى من ذلك الكورولا الجديدة و السيفيك فى الثبات و استثنى السيفيك فقط فى الفرامل
اما الصاج كله زى بعضه
و زى ما قال طنانى باشا قبل كده
كويس ان الناس مش عارفة قيمتها عشان اللى عارف قيمتها يعرف يركبها

المشاركة الأصلية كتبت بواسطة ahmed_fahmy

هي الادا مش مصممه صح يعنى الناس قيمت قوة الادا عشان فتيسها ناشف ودركسيونها والصاج من بره تقيل بس ده مش مقياس القوه لا التصميم انا كنت فى الاسكندريه من ٨ سنين او اكتر وكان معايا فيكترا بى وقررت اخود ملف للطرق التانى على البحر والفيكترا مبيفرقش معاها الكلام ده بس كان فى لادا معرفش طلع منين المهم خبط بالرفرف الخلفى فى رفرفو الامامى عايز اقولك ان الادا بقنت انسيابيه من اودام زى السويفت لأن تصميم التربيعى ده مبيوزعش الخبطه وانا حصل تطبيقه بحكه عاديه جداً والاكتر ابن عمى معاه لانسر الشكل الجديد من سنه دخل فى لادا فى اكصدامو الخلفى والادا جابت روبع امامى ومش هتصدق ان الانسر كل اللى حصل الاكصدام خرج من مكانو ودخل لجوه شويه واستعدلناه تانى يوم فى ثانيه الادا مش مقياس وفعلاً العظمه لله بس الالمان عرفين يعنى ايه انسان ولازم يتحافظ عليه يعنى مثلاً اوبل فيكترا من٨٨ الى الان لو حصلت مصادمه اماميه عنيفه الدركسيوت بينفصل عن القطمه ودواسات الفرامل والدبرياج والبنزين بتفصل عن كل حاجه عشان ميكسروش رجلك وده مش موجود فى ايلانترا ٢٠٢٠ ولا سيراتو مثلاً وعايز اقولك عبط المصريين ان اول عربيتين اليابان تراعى فيهم الامان والسلامه هم الانسر الشكل الجديد اللى فشلت فى مصر والكرولا الجديده ده تستنتج منو كم الجهل المتقدم جداً فى مصر ويروحو يشترو الموديل القديم مستعمل اغلى من الشكل الجديد يعنى حاجه تكسف ده لو حد نشر الموضوع ده عالمياً هنتفضح والله المستعان

طبعا برضه ما فيش كلام بعد كده و ارجع اقول انا لو سالتني عن اي حاجة في العربية مش هاعرفها لو عطلت مني لا قدر الله باسيبها و امشي و اتصل بالميكانيكي
بس مقاييس الامان موحدة في العربيات الاوروبي و هي علم اكتر منها صاج يعني انا كنت باشوف اختبارات التصادم العربيات الاوروبي مش مهم بالنسبة لهم العربية بس الكابينة لازم تبقي سليمة و الكابوت او الشنطة يمتصوا الصدمة بالكامل المهم الانسان يطلع سليم
انما أحلى حاجة في المصريين تلاقي واحد بيتصل: حضرتك فلان الفلاني
: ايوة انا مين معايا
: مستشفي كذا ابن حضرتك عمل حادثة جامدة بالعربية و هو موجود عندنا دلوقتي
: و العربية جرالها حاجة ؟؟؟!!!!!!
المهم
يعني تلاقي الموتور سقط لتحت عشان ما يدخلش الصالون و الدريكسيون فك من مكانه عشان ما يطبقلش صدرك و تلاقي العربية بتفك من بعضها حتة حتة و كل جزء بيتفك محسوب بيمتص نسبة قد ايه من الصدمة و وسادة هوائية وقصة جوة الكابينة ربنا يسترها مع الجميع و ما يعرض حد لحاجة زي دي ابداااااا
انما اللادا يا جماعة برضه ما ينفعش تقارنها لانها بنفس التصميم من السبعينات و برضه كانت عربية شعبية يعني رخيصة و بتمشي كويس و هو ده اللي كان مطلوب وقتها انما رفاهية و أمان مافيش فارجوكم ماتظلموهاش