لا مش مستخبيه بس واضح انك اساسا مش عايش في مصر
هى عربية كويسة بصراحة
بس انا شايف المشكلة ان بسبب الكماليات الكتير اوى اللى فيها سعرها طلع لفوق اوى
و المنافسة بقت شديدة اوى معاها
يعنى 132 سعر الهاى لاين الخليجى يجيبوا فئة كويسة من الالنترا او سيراتو او فلوينس و دول فئة اعلى
تيجى لو عايز حاجة صغيرة هاتشباك زى الريو تلاقى الكورسا الهاى لاين ارخص منها و بصراحة انا شايفها احسن
عموما العربيات اذواق و اختيارات و كل واحد بيشوف ايه اكتر عربية مناسبة ليه و اكيد محدش هيروح يدفع 132 الف و هو مش عارف هو هياخد بيهم ايه فالمسألة فى الاخر موضوع اقتناع و نصيب مكتوب لكل واحد
و بالتوفيق لكل مالكين السيارة و يا ريت لو حد منهم يعملنا تقرير جميل كده عن العربية نتعرف عليها اكتر
انحك بسمير ريان عنده كل الفئات و الخليجي و الوكيل
و انصحك بالخليجي ارخص و كماليات اكتر و غير كدة مش قصة لمة تشتري ضمان ب 2100 جنيه 3 سنوات او 60 الف كيلو
و حيكون سعر العربيه مع فلوس الضمان بسعر العربيه الوكيل لكن تفرق معاك الكماليات اكتر و التكييف اقوى
مين قال ان الريو بـ132 ؟ دي معلومة جديدة بس غلط لان سعر الريو هاي لاين 122 الف :)
والهاي لاين من الريو فيها abs و ebd تعال قول لي الالنترا الـfully loaded بـ156 الف ومفيهاش الا abs :)
ياريت تراجع مواصفات الالنترا ومواصفات الريو
ياجماعة مره تانية اللي معندوش العربية ميحكمش عليها لان باين ان العربية دي سر ولا ايه كل اللي مش معاه مش عارفها ونازل كلام سئ عليها رغم انها معندوش :s
أنا بصراحه معنديش معلومات كافيه عنها لأنها مش منتشره كتير بس ليا تعليق بعد قرايه الموضوع والنقطه اللي هتكلم فيها موجوده في مواضيع تانيه كتير.
ليه بناخد الكلام بشكل شخصي وبحساسيه شديده؟ يعنى لما فلان يقول ان عربيتك مش عاجباه ده مش معناه انك انت مش عاجبه. لازم نفصل بين الكيانين السياره ومالكها ونبقى كول كده ونعرف انها ازواق وكل واحد حر في اختياره لأن محدش دفع لحد حاجه كل واحد اشترى عربيته بفلوسه وواللهي كله في الاخر بيوصلنا لأى مكان احنا رايحينه (مع اختلاف التجربه فى النص طبعا) بس الفكره ان كل واحد بيدور في العربيه اللس هيشتريها على ميزه معينه.
لما فلان يجيب عربيه معينه وفرحان ومنزل صور تلاقى واحد داخل يقوله طب ما كنت بنفس التمن جبت كذا وموتورها مش عارف كام حصان (أكتر من اللي انت اشتريتها) طب ومين قالك ان الراجل تاجر مواشي؟ هوه اشترى العربيه عشان شنطتها كبيره (ده سبب فعلا) أو ان شكلها عاجبه بغض النظر عن الفنيات أو ان واحد قريبه جابها وشكر فيها أو لأنه عنده اسره 4-5 أفراد وكل اللي يهمه مساحه كبيره تريحهم وهما في العربيه وأسباب تانيه كتير ملهاش علاقه بقوه الموتور خالص. واللهي يا جماعه فيه ناس ميهمهاش كام حصان وكام حمار هيه عايزه حاجه معينه لقتها فى العربيه الفلانيه فاشترتها وملوش لازمه بقى أى كلام يتقال بعد الشرا لأن ده بيكره المشتري في عربيته اللى هوه كان مبسوط بيها قبل ما يقرا الكلام اللي قراه فى موضوع هوه عمله عشان الناس تشاركة فرحته بعربيته وتباركله مش عشان يخلوه يندم على اختياره.
وأخيرا: الكلام اللي أنا قلته ده مش موجه لصاحب الموضوع ولا لفرد بعينه بس لقيت انه مناسب في موضوع تحول لخناقه فيها كل واحد بيدافع عن عربيته وكأن كل الناس لازم يكون اختيارها نفس اختياره. احنا كلنا جايين نتعلم من بعض عشان نستفيد أكتر من عربياتنا ونعرف ازاى نصونها كويس مش عشان نكرَه بعض في عربياتنا.
اعذرونى للاطاله.
أخوكو أحمد
يا باشا مش انا اللى سعرتها و الله
انا لسه شايفها عند اوتو سمير ريان الهاتشباك اعلى فئة جنوط 17 فتحة سقف بلوتوث فرش جلد و حاجات تانية كتير و دا كان سعرها و كانت خليجى مش توكيل كمان
و انا عارف 132 الف يجيبوا فى الالنترا و السيراتو ايه برضه مش نفس كماليات الريو اه بس هيجيبوا حاجة محترمة برضه فيها abs/airbags
انا مقولتش كلام سىء يا باشا و معيبتش فى العربية و لا حكمت عليها لأنى اصلا مركبتهاش فمش هحكم عليها .. انا اتكلمت فى نقطة واحدة بس اللى هى السعر و قارنتها بالعربيات المنافسة ليها و قلت رأيى الشخصى برضه انى شايف ان فى الفئة السعرية ديه فى حاجات احسن منها